پەرلەمانی كوردستان بۆ گفتوگۆ لەبارەی دۆخی رۆژئاوا كۆدەبێتەوە


ژیان:
پەرلەمانی كوردستان ئامادەكاری دەكات بۆ دانیشتنێكی تایبەت سەبارەت بە دۆخی رۆژئاوای كوردستان و هاوكات داواش دەكات كۆتایی بە ئۆپەراسیۆنی سەربازیی سوپای توركیا بهێندرێت.

لە راگەیەندراوێكی سەرۆكایەتیی پەرلەمانی كوردستاندا هاتوە"پەرلەمانی هەرێمی کوردستان بە نیگەرانییەکی قووڵەوە لە لەشکرکیشی سوپای تورکیا بۆ سەر چەند ناوچەیەکی جیاجیای رۆژئاوای کوردستان دەروانێت و داوا دەکەین هەرچی زووە ئەم ئۆپەراسیۆنانە بوەستێنرێن و لە رێگای دیالۆگ و چارەسەری ئاشتییانەوە کێشەکان چارەسەر بکرێن".

دەشڵێت "دۆخی ناوچەکە هێشتا لە قۆناخێکی هەستیار و ناجێگیردایە، شەڕی تیرۆر کۆتایی نەهاتووە و گەلانی ناوچەکە لە نەهامەتی و ناسەقامگیریدا دەژین و پێمانوایە ئەم لەشکرکێشیە نەک چارەسەری کێشەکان ناکات، بەڵکو ئاسۆی چارەسەری و ئاشتی دوورتر دەخاتەوە".

سەرۆكایەتی پەرلەمانی كوردستان داوای لە کۆمەڵگای نێودەوڵەتی كردووە، بە تایبەتی ئەمریکا و رووسیا و بەریتانیا و فەرەنسا، هەموو هێز و توانایان بخەنە گەڕ بۆ وەستاندنی ئەم دۆخە نەخوازراوە و رێگرتن لە ناسەقامگیری زیاتر و هەوڵدان بۆ رەخساندنی هەلومەرجی نوێ بۆ دانوستاندن.

لە بەشی كۆتایی راگەیاندراوەكەدا هاتووە"بە توندی ئیدانەی هەر جۆرە پەلامارێک دەکەین کە هاولاتیانی سیڤیل بە ئامانج بگریت لە هەر لایەکەوە بیت. پەرلەمانی کوردستان پشتیوانی تەواو لە بوونی دیالۆگ و گفتوگۆ دەکات لە سەر ئاستی هەریمایەتی بۆ دۆزینەوەی چارەسەری هەمیشەیی کیشەکانی ناوچەکە. گەلی کوردستان، بە شانازییەکی زۆرەوە پیشەنگی خەبات و قوربانی بووە لە شکست پێهێنانی تیرۆریستانی داعش و هێنانەدی ئاشتی و سەقامگیری ناوچەیی و جیهانی. بەردەوامی ئەم دۆخە نەخوازراوە سەربازییەی سەر رۆژئاوای کوردستان، زەمینەی زیاتر بۆ تیرۆریستان دێنێتە ئارا و دەستکەوتەکانی شەری تیرۆر لە ناو دەبات و بەوەش ئاشتی هەریمایەتی و جیهانی دەکەویتە بەردەم هەرەشەی جیدیەوە. پەرلەمانی کوردستان بەردەوام پشتیوانی چارەسەری ئاشتییانە و دیموکراسییانەی دۆزی رەوای خەلکی کوردستانە لە هەر پارچەیەک بێت. داوا لەسەرجەم هیز و لایەنە کوردستانیەکان دەکەین ، هەموو ناکۆکیەکی سیاسی بخەنە لاوەو لە سەر بنەمای حیکمەت و دووربینی سیاسی ، پیکەوە لە خەباتی ئاشتییانەو دیپلۆماسیانەو مەدەنیانە بەردەوام بن بۆ کۆتایی هینان بەم دۆخە نەخوازراوە. پەرلەمانی کوردستان بەردەوام بە دواداچوون بۆ ئەم دۆخە دەکات و ئامادەکاری بۆ دانیشتنێکی تایبەت لەسەر دۆخی رۆژئاوای کوردستان دەکات".