ئیلهام ئەحمەد: داوا لە وڵاتان دەکەم نوێنەرایەتیان لە تورکیا بکشێننەوە

ئیلهام ئەحمەد

ژیان:

سەرۆکی دەستەی جێبەجێکاری ئەنجومەنی سوریای دیموکرات رایگەیاند، ئەمریکا بەڵێنى پێدابووین کە سنورەکان چۆڵ ناکات و رێگرى لە هێرشەکانى تورکیا دەکات، دەشڵێت داوا لە وڵاتان دەکەم نوێنەرایەتیان لە تورکیا بکشێننەوە.

ئیلهام ئەحمەد، لە کۆنفرانسێکی رۆژنامەنوسیدا لە یەکێتی ئەوروپا ڕایگەیاند،  ئەوان لە ئەمریکا نیگەرانن، چونکە بە گوێرەی لێکتێگەشتنی نێوانیان دەبوایە دوای جەنگی دژی داعش، واشنتۆن پابەندی بەڵێنەکانی بۆ پاراستنی ئیدارەی خۆسەری رۆژئاوای کوردستان بوایە، بەڵام ئەمریکا بەڵێنەکەی نەبردە سەر و ڕۆژئاوای بەجێهێشت.

وتیشى" هێرشەکانى تورکیا دوژمنکارانەیەو مافى تورکیا نییە هێرش بکاتە سەر ناوچەیەک کە ئارامەو خەڵکەکەى بە ئاشتى دەژین".

ناوبراو داواشى لە ئەمریکا کرد کە لە بڕیارەکەى پەشیمان بێتەوەو رێگرى لە هێرشەکانى تورکیا بکات، چونکە بەوتەی خۆى بەهۆی ئەو بریارەوە کارەسات لە باکورى سوریا روودەدات.

دوێنێ رەجەب تەیب، ئەردۆغان، سەرۆک کۆماری تورکیا دەستپێکردنی ئۆپەرسیۆنی سەربازی بۆ سەر رۆژئاوای کوردستان راگەیاند، ئەوەش سەرەڕای هۆشداریەکانی کۆمەڵگەی نێودەوڵەتی.