بەڵایەكی تر یەخەی ئاوارەكان دەگرێت

شێرپەنجە ئاوارەكانی دهۆك هەراسان دەكات
ئاوارەکان

ژیان: عەمارعەزیز 

سوال خودێدا، خەڵكی ناحیەی باشیكە ماوەی پێنج ساڵە لەقەزای زاخۆ دەژیت دەڵێت، ژیان لەئاوارەی‌و پاشان بڵاوبوونەوەی نەخۆشی ژیانمانی وێرانكردووە.

سوال خودێدا، بۆ ژیان وتی "هاوسەرەكەم تەمەنی 60 ساڵە نەخۆشی دڵی هەیە، دووجار نەشتەرگەری بۆكراوە‌، پێنج منداڵم بەنەخۆشی دڵ‌و گورچیلە ماڵئاوایان كردووە، ئێستاش خاوەنی كچێك‌و كورێكە یەكێك لەمنداڵەكانم شێرپەنجەی هەیە".

وتیشی، كچەكەم نەخۆشی دڵ‌و گۆچیلەی هەیە لەتەمەنی 6 مانگیەوە نەشتەرگەریەك بۆ كراوە لەوڵاتی توركیا، بەڵام پزیشكەكەكان بەمنیان وتووە كچەكەی تۆ پێویستی بەسێ نەشتەرگەی تر دەبێت لەتەمەنی سێ ساڵ‌و شەش ساڵ‌و هەژە ساڵی".

لەئێستا كچەكەی سوال چەند رۆژێكی ماوە تەمەنی ببێتە سێ ساڵ‌و پێویستی بە نەشتەرگەری دووەمە لەوڵاتی توركیا، زیاتر لە6 هەزار دۆلار پێویستە‌و ئەو برە پارەیەمان نییە، لەولاشەوە منداڵەكەی ترم نیشانەكانی شێرپەنجەی لێ دەركەوتووە.

سوال وتیشی، هەموو ئاواتم لەژیان ئەوەیە كچەكەم لەم نەخۆشیە رزگاربێت، چونكە زۆرم خۆشمدەوێت.

لەم ماوەیە بەشێكی تری نەخۆشانی شێرپەنجە رەوانەی بەغداد دەكەین

"چارەسەری كچەكەم تەنیا لەدەرەوەی وڵاتە داوام لەزۆر بەرپرس‌و فەرمانگەكەی حكومەتی بەغداد‌و هەرێم كردووە دەڵێن، ئەوەی پێویست بێت بۆ ئێوە دەكەین، بەڵام تاوەكو ئێستا هیچ شتێك نەكراوە". سوال وای وت.

ئیبراهیم خەلیل، ئاوارەیەكی ئێزیدیە لەكەمپی شاریا دەژیت، ماوەی چوار مانگە خوشكێكی تۆشی نەخۆشی شێرپەنجە بووە بۆ  ژیان وتی "خۆشێكێكی من كەناوی (بەسێ)یە تەمەنی16ساڵە ماوەی چوار مانگە توشی نەخۆشی شێرپەنجە بووە، رۆژانە پێویستی بەچارەسەریە‌و هەر چونێك بێت دەبێت دەرمان بۆی بكڕین تاوەكو تۆزێك بحەسێتەوە".

ئیبراهیم وتیشی، باوكم بەتەمەنە ناتوانیت هیچ كارێك بكات منیش برای گەورەم‌و رۆژانە كرێكاری دەكەم، هەر پارەیەك كۆبكەمەوە بۆ خەرجی ماڵ‌و كرینی دەرمانە، جگە لەمەش 6 ملیۆن دینار قەرزدارم.

"چارەسەری خۆشكم لەوڵاتی هندستانە‌و پێویستی بەپارەیەكی زۆرە، هەركاتێك خوشكم دەبینم خەمێكی زۆر گەورە دەمگرێت‌و فرمێسك بەچاوەكانم دێنە خوارەوە". ئیبراهیم وای وت.

حوسێن حاجی عوسمان، لێپرسراوی بەشی راگەیاندن لەرێكخراوی رۆژا شنگال بۆ ژیان وتی "ئێمە پرۆژەیەكی تایبەتمان هەیە بۆ ئەو كەسانەی توشی نەخۆشی درێژ خایەن بوونە لەسەرەتای ئەم مانگەوە پشكنینی نەخۆشی شێرپەنجە بۆ ( 100) ئاوارەمان كردوە پشكنینەكان ڕەوانەی هەولێركراوە، هەر یەكێك نەخۆشی شێرپەنجەی هەبێت بۆ مەبەستی چارەسەری ڕەوانەی بەغداد‌و هەولێر دەكەین، لەماوەیەكی نزیكدا دووبارە دەست بەپشكنینەكان دەكەینەوە‌و بەردەوام دەبین تاوەكو هەموو كەمپەكانی سنوری پارێزگای دهۆك تەواو دەكەین".

حوسێن وتیشی، بەدووجار نەخۆش بووەكانی شێرپەنجەمان رەوانەی بەغداد كردوە بەمەبەستی چارەسەركرد، لەم چەند رۆژە بەشێكی تر دەنێرینە بەغداد كەسێ كەسن نەخۆشی شێرپەنجەیان هەیە.

خدر ئەلیاس، سەرۆكی لیژنەی تەندروستی لەئەنجومەنی پارێزگای نەینەوا بۆ ژیان وتی "بۆ ماوەی سێ ساڵ ئیدارەی پارێزگاری نەینەوا پرۆژەیەكی تایبەتیان هەبوو بۆ وەرگرتنی چارەسەری پزیشكی بێ بەرامبەر بۆ ئاوارەكانی سنوری پارێزگای دهۆك، ئەویش بەرێگای گرێبەستێك لەگەل نەخۆشخانەی ڤینی ئەهلی لەشاری دهۆك، لەو ماوەیەدا سەدان ئاوارە لێی سودمەندبوون".

خدرلە درێژەی قسەكانی باسی لەوەشكرد، بۆ ساڵی 2019 داوامان لەپارێزگای نەینەوا كردوە بڕی یەك ملیار دینار تەرخان بكرێت بۆ چارەسەری پزیشكی تایبەت بۆ ئاوارەكان‌و دووبارەكردنەوەی ئەو پڕۆژەیە، بەڵام تاوەكو ئێستا ڕازی نەبوون، بەڵام ئێمە بەردەوام دەبین لەكارەكانمان ئومێد دەكەین لایەنە پەیوەندارەكان بەدەنگمانەوە بێن.