نێچیرڤان بارزانى پەیامێکی بڵاوکردەوە

"لەهەوڵی بەردەوامداین بۆ ڕاگرتنی شەڕ"
نێچیرڤان بارزانی، سەرۆکی هەرێمی کوردستان

ژیان:

سەرۆکى هەرێمى کوردستان ڕایگەیاند، هەرێمی کوردستان ئامادەیە بۆ هەموو نێوەندگیرى و هاوکارییەک بۆ راگرتنى شەڕ و بۆ ئەم مەبەستەش لە هەوڵى بەردەوامداین، داواش لە کۆمەڵگەى نێودەوڵەتى و ئەنجوومەنى ئاسایش دەکات رۆڵى خۆیان بۆ راگرتنى شەڕ و گێڕانەوەى ئاشتى بگێڕن.

نێچیرڤان بارزانی، سەرۆکی هەرێمی کوردستان دوانیوەڕۆی ئەمڕۆ پێنجشەممە پەیامێکی لەبارەی هێرشەکانی تورکیا بۆسەر رۆژئاوای کوردستان بڵاوکردەوە و دەڵێت "هەر لە سەرەتاوە بە وردى چاودێریى دۆخەکە دەکەین و بە دڵگرانى و نیگەرانییەکى قووڵەوە لە ئۆپەراسیۆنە سەربازییەکانى ڕۆژهەڵاتى فورات لە سووریا دەڕوانین بەتایبەتى کە گرووپە توندڕەوەکانى ئۆپۆزسیۆنى سووریا تیایدا بەشدارن. شەڕ، دەرگا بە سەر کوشتار و دەربەدەرى و ئاوارەبوونى خەڵکى سڤیل و دروستبوونى ناسەقامگیرى لە تەواوى ناوچەکەدا دەکاتەوە و هەڕەشە و مەترسیى سەرهەڵدانەوەى تیرۆریش جددیتر و گەورەتر دەکات."

ئاماژە بۆ ئەوەش دەکات "ئێمە کە لە هەرێمی كوردستان و عێراق قوربانییەكی زۆرمان بۆ تێكشكاندنی تیرۆر داوە و مەینەتییەکانى شەڕمان بینیوە، زۆر بە نیگەرانى و هەستیارییەوە لە ئاڵۆزبوونی دۆخەكە و تێکچوونى ئاسایش و نەمانى سەقامگیرى دەڕوانین کە دەرەنجامى چاوەڕواننەکراو و مەترسیدارى بۆ ناوچەکە و جیهان لێ دەکەوێـتەوە، بۆیە لەپێناو ڕاگرتنی شەڕ و دروستكردنی ئارامیدا، لە هەوڵى بەردەوامداین و بۆ هەموو نێوانگیری و هاوكارییەك ئامادەین."

لە بەشێکی دیکەی پەیامەکەی سەرۆکی هەرێمدا هاتووە، شەڕ و پێکدادان تەنیا ئاڵۆزى و پشێوى و مەترسی لە ناوچەکە زیاد دەکات، دەسکەوتەکانى تێکشکاندنى داعش لەناو دەبات و لە بەرژەوەندیى هیچ لایەنێکدا نابێت، بۆیە داوا لە کۆمەڵگەى نێودەوڵەتى و ئەنجومەنى ئاسایش دەکەین چارەسەرێکى دادپەروەرانە بۆ ئایندەى سووریا بدۆزێتەوە بە جۆرێک مافى هەموو پێکهاتەکانى تیادا پارێزراو بێت و بە جددى ڕۆڵى خۆى بۆ ڕاگرتنى شەڕ و گەڕانەوەى سەقامگیرى و پاراستنى ئاشتى و دیالۆگ و ڕێگەچارەى سیاسى بگێڕێت و ڕێگە نەدرێت خەڵکى سڤیل دەربەدەر و ئاوارە ببن.