کچانی کەلار بۆ تەماشاکردنی فیلم؛ دەچنە چایخانە

کچێک: ویستم ئەو ڕێچکەیە بشکێنم کە کچان ناتوانن بچنە چایخانە
چایخانەی میللەت

ژیان: هەستی ئەحمەد

كچان‌و ژنانی لەچاخانەكەدا لەریزی پێشەوە دانیشتبون، سەیری سینەماییان دەكرد، ئەوان بەخۆشیەكی زۆرەوە سەیری دراماكەیان دەكرد، دڵخۆش بوون بەم كارەو بۆ شكاندنی ئەو ڕێچكەیەی كچان نابێت بچنە چایەخانە.

پڕۆژەی سینەما كلتور پڕۆژەیەكی هونەری چایخانەی میللەتە كەهەفتانە شەوانی هەینی هەر جارەو فیلمێك نمایش دەكرێت، بەڵام ئەم جارە بەجیاوازتر كچان بەشدارییان تێداكرد.

لەسنوری ئیدارەی گەرمیان تاوەكو ئێستا زۆر بەدەگمەن كچان لەچایەخانەدا دانیشتون، بەڵام لەدوای پەخشكردنی سینەماییەك  لەلایەن واحیدی كفری كاری بەرهەمهێنان‌و ئامادەكردنی بۆكرابو بانگهێشتی دوكچە چالاكوان كرا، كردنی ئەم كارەش دەنگۆیەكی زۆری بەدوای خۆیدا هێنا.

لەیلا ئەحمەد، كچە چالاكوانێكی شاری كەلارە بۆ ژیان وتی "دوای بانگهێشت كردنم لەلایەن دەرهێنەری فلمەكەوە هاتم بۆ سەیركردنی، ویستم ئەو رێچكەیە بشكێنم كەكچان ناتوانن بچن بۆ سەیری فیلم لەچاخانەیەكدا‌و تەنها بۆ كوران قۆرخكراوە"

ئاماژەی بەوەش كرد"لەلایەن پیاوانی چایەخانەكەوە ڕێزی زۆرمان لێگیراو رێزی پێشەوەمان بۆ ئامادەكراو ئامادەی سەیركردنی فلیمەكە بوین".

كردنی ئەم كارەی كچان دەنگۆیەكی زۆری نایەوە لەتۆڕە كۆمەڵاتیەكاندا، بەڵام ئەم كچانە بەئاسایی لەبارودۆخەكەیان ڕوانیوە.

ژینۆ خەلیل، تەمەن ٢٧ سال كچێكی ترە لەتەماشاكەرانی سینەماكەدا بۆ ژیان وتی "كردنی ئەم كارەی ئێمە قسەو قسەڵۆكی زۆری بەدوای خۆیدا هێنا، ئێمە لەبەر ئازادی‌و ڕزگاربونی كۆیلایەتی ژن ئەم كارەمان كرد، بەڵام بەشێكی ژنانیش لەبری دەست خۆشی‌و هەنگاو نان بۆ پێشەوە تانەیان لێداوین".

باسی لەوەشكرد، لەناو خەڵكدا دیمەنی پیاوان بەدڕندە نیشاندراوە، لەناو خەڵكدا پیاوان زۆر بەداخراو سەیر دەكرێن، بەڵام بەو جۆرەش نیە.

فیلمەكە لەلایەن واحیدەوە ئامادەكرا پێكهاتبوو لە٣ كورتە فیلم بەناوەكانی (بریار، ئابرو‌و باشترین خەڵات)  لەچایەخانەی میللەت لەرێگای داتاشۆ پەخشكرا.

واحید مەجید، ناسراو بەواحید كفری، دانیشتوی قەزای كفریە، دەرهێنەری فیلمەكەبوو، خاوەنی دوو فیلمی دۆكیۆمێنتاری‌و ٧ كورتە فلمی سینەمایە.

تائێستا بەشداری ٢٧ فیستیڤاڵی ناوخۆیی‌و نێودەوڵەتی كردوە، هەروەها خاوەنی ١٧ خەڵاتە كە٧ ی لەدەرەوە بەدەستهێناوە، بەشداری ٢٥ فیستیڤاڵی كردوەو خاوەنی ١٦ خەڵاتی ناوخۆیی‌و نێودەوڵەتیە لەوانە ئەمریكا، بریتانیاو ئیسپانیاو چەند وڵاتێكی تر گەڕاوە.

سەبارەت بەبەشداری كردنی ئافرەتان لەسینەمادا بۆ ژیان وتی "زۆر دڵخۆشم ژنان بەشداری سینەما دەكەن‌و بینەرن‌و دێنە چایەخانە".

باسی لەوەشكرد، ئەم كارە بەهەنگاوێكی سەرەتا دادەنرێت كچانیش وەك‌و كوڕان مافیان هەیەو ئازادن لەڕووكردنە چاخانەدا.

چایخانەی میللەت، تەنها چایەخانەیەكی ئاسایی نیە، بەڵكو بەردەوام چالاكی هونەری، ئەدەبی، كلتوری‌و فكری تێدا ئەنجام دەدرێتـ كەلە٢٤ی تشرینی یەكەمی٢٠١٤ دروستكراوەو ڕۆژانی هەینی بەهۆی نەبونی شوێنەوە بۆ نمایشكردنی سینەما لەو چایەخانەیەدا فیلمەكان نمایش دەكرێت.

ئارام مەلا نوری، خاوەنی چایەخانەی میللەت دەڵێت، پێش ئەمە ژنان هاتونەتە چایەخانە، بەڵام وەكو ڕێژەی پێویست نییە، ئەو بۆ ژیان وتی "بەلای منەوە شتێكی ئاساییە، ئێمە لەم پرۆژەدا هەر لەسەرەتای چایەخانەكەوە بەئامادەبونی هاوسەرو خوشك‌و هاورێیانمان دەستمان كردوە بەچالاكیەكان".

وتیشی "ئەم كارە لەسنوری گەرمیان نامۆیە، بەڵام كچانیش مافی خۆیانە روو لەچایەخانە بكەن".