هونەرمەندە میللیەكان بازاڕیان گەرمە

كچان لەگەعدەكاندا بەشداری دەكەن

ژیان: هەستی ئەحمەد

كچان‌و ژنان لەگەعدەكانی شەوان هاوشانی پیاوان بەشداری دەكەن، بۆ بەسەربردنی كاتێكی خۆش ڕوو لەو شوێنانە دەكەن زۆربەشیان كچی بەرپرس‌و كەسە دەوڵەمەندەكانن.

 ئەڤین، تەمەن ٢٥ ساڵ، ناوی خوازراوی كچێكی دانیشتووی شاری سلێمانییە، سەبارەت بەبەشداری كردنییان لەگەعدەكاندا بۆ ژیان دەڵێت، شەوانە لەگەڵ هاوڕێكانم دەڕۆینە ئەو شوێنانە، كاتێكی خۆش بەسەر دەبەین، تاوەكو بۆمان بكرێت پیاوان نابەین لەگەڵ خۆمان، چونكە ئاسوودە نابین بەتەنیا چێژی زیاترە.

ئەو كچانەی ڕوو لەو شوێنانە دەكەن كچی دەوڵەمەندەكانن تەنیا كچانیش نین ڕوو لەو شوێنانە دەكەن بەڵو ژنانیش دەچن.

سەمیرە، تەمەن ٤٠ ساڵ ناوی خوازراوی ژنێكی خەڵكی هەولێرە بۆ ژیان وتی "زۆرجار بەشداری گەعدەكانم كردووە كەهونەرمەندی میللی تێیدا گۆرانی وتووە، بەڵام بەبەشداری مێردەكانمان‌و كەسە نزیكەكانمان ناچین بەڵكو بەتەنیا دەچین، بەم جۆرە چێژی زیاترە بۆمان".

هونەرمەندێك: زۆرجار بانگ كراوم بۆ ماڵەوە بۆ ئەوەی گەعدە بۆ كچان ئەنجام بدەم

هونەرمەندێكی میللی جەخت دەكاتەوە لەبەشداری كردنی كچان‌و ژنان لەگەعدەكاندا داوای كرد ناوی پارێزراو بێت بۆ ژیان وتی "ژنان‌و كچان بەشداری دەكەن لەگەعدەكانماندا، زۆر جاریش بانگ كراوم بۆ ماڵەوە بۆ ئەوەی گەعدەیان بۆ ئەنجامدەم".

ئەو هونەرمەندە باسی لەوەشكرد، كردنی گەعدە پارەیەكی زۆری دەوێت لە٥٠٠ هەزار بۆ سەرەوەیە، بەڵام ئەوان كەسانی دەوڵەمەندن نرخی پارەكە بەلایانەوە گرنگ نییە، ئەو هونەرمەندە بانگهێشت دەكەن كەحەز بەدەنگیان دەكەن.

زیاتر هونەرمەندە میللیەكان بانگهێشتی ئەو ئەهەنگانە دەكرێن، كەگۆرانیەكانیان هەڵپەركێن‌و بەجۆش‌و خرۆشن.