سبەینێ لەبەردەم دادگای كەلار گردبونەوەیە


ژیان: 
رۆژنامەنوسان و چالاكوانانی مەدەنی شارچكەی كەلار سبەینێ بۆ ئازاد كردن و شەرمەزار كردنی هاوكارێكیان گردبونەوەیەكی ناڕەزایی لە بەردەم دادگای كەلار ئەنجا دەدەن. 

بە دروشمی "سبەینێ مەزاجێتی دادگا سەركۆنە دەكەین" رۆژنامەنوسان و چالاكوانانی شارۆچكەی كەلار هەڵمەتێكی بانگەشەیان لە تۆڕە كۆمەڵایەتیەكان دەستپێكردووە و تیادا دەڵێت "تا دێت دادگاكان دەبنە دادگای مەزاجی و بۆ فشارخستنە سەر ئازادیخوازان بەكاردەهێنرێن، بە تایبەت دادوەر یاسا بەشێوەی لاستیكی بەكار دەهێنێت، ئەمە پێویستی بە بەدەنگ هاتنی هەموومانە، چونكە یاسا بۆ ئێمەیە نەك بۆ دادوەر".

بە گوێرەی ئەو نوسینەی بڵاو دەكرێتەوە و وەك كەمپینێك مامەڵەی لەگەڵ دەكرێت دەشڵێن "تاوانەكان سزاكان دیاری دەكەن نەك مەزاجی دادوەر. بۆیە بۆ دژ وەستانەوەی ئەم مەزاجێتیە قەزائیە، سبەینێ پێنج شەمە، كاتژمێر ١٠ ی سەرلەبەیانی هەموومان لەبەردەم دادگای كەلار دەبین".

ئەوەش دوای ئەوەهات كە ئەمڕۆ دادگا بڕیاریدا ئازاد عوسمان بەڕێوەبەری رادیۆی دەنگ دەستگیر بكات لەسەر دۆسیەیەی پێشتر كە بە دانانی بارمتەی یاسایی ئازاد كرابوو.