پارەیێ گەنمێ جوتیاران پشتی هنارتنا نەفتێ دێ هێت


ژیان: علی سلیم

پشتی پروسەسا ئازادیا عێراقێ ناكوكیێن سیاسی دناڤبەرا هەرێما كوردستانێ‌و عیراقێ دا باندور ل سێكتەرێ جوداجودا كری یە گرنگترین ژی سەربازی‌و كەرتێ نەفتێ لێ ناكوكیان ژبو گەرا داویێ پارەیێ گەنمێ جوتیاران ژی ئێخستنە بەر هەرەشەێن دژوار، حكومەتا عێراقێ ژبەر ترسا جادەیا عێراقی دترسیت پارەیی َ جوتیاران فرێكەت‌و نوێنەرێن كوردان ژی ل بەغدا كێشا پارەیێ گەنمی ژی ب كێشێن دی ێن سیاسی ڤە گریدەدەن.

رجب زێوكی، جوتیارەكێ پارێزگەها دهوكێ بو ژیان گوت "بەریا نوكە دیڤچونەكا باش بو ڤە بابەتی دهاتەكرن‌و دادگەه بریار دایە كو دڤێت ئەو پارە بهێتە دان بەلێ نێزیكی سالەكێ یە ئەڤ بابەتە هاتیە بێدەنگكرن،‌و زور جاران لژنە ژ بەغدا هاتینە كو گەنمێ مە رێژەیا وی بهێتە كیمكرن ئەم داخازێ ژ حكومەتێ‌و جهێن پەیوەندیدار دكەن داكوكیێ لسەر مافێ جوتیاران بكەن داكو پارەیێ مە یێ سالێن بوری نەهێتە خارن".

ل گورەی زانیاریان پارەیی سالێن 2014 بەشەكێ زور ژێ هاتیە دان‌و سالا 2015 (50%) هاتیە دان‌و سالا 2016 (62%)‌و سەرجەمێ ئەو پارەیێ نەهاتیە دان تا نوكە یێ هەر سێ سالان دبیتە (178,027,338,750) كو ئەڤ پارەیە هاتیە ڤەگوهاستن بو وەزارەتا بازرگانیا حكومەتا عیراقێ‌و ژبەر كێشەیێن سیاسی یێن دناڤبەرا هەرێم‌و بغدا دا ئەڤ پارەیە بو هەرێما كوردستانێ نە هاتیە رەوانەكرن‌و سالا 2018‌و 2019 پشتی دانا گەنمی جوتیاران پارین خو وەرگرتی نە‌و بریار بو كو ئەڤ سالە ئەو پارەیی مای بهیتە دان بەلێ ب هنارتنا نەفتێ ڤە هاتە گرێدان.

هەرێما كوردستانێ یا رازی نەبو لسەر وەرگرتنا وی پارەیێ گەنمێ جوتیاران

صباح بابیری، سەروكێ لژنەیا چانندن‌و ژێدەرێن ئاڤێ ل ئەنجومەنێ پارێزگەها دهوكێ بو ژیان "بابەتی پارەیێن گەنمێ جوتیاران گرێدایی حكومەتا عیراقێ‌و دەستهەلاتێن ئەنجومەنێ پارێزگەهان د سنوردارن بەلێ سەرەرای ڤێ چەندێ وەكو لژنەیا چاندنێ هەولێن خوە دانیە‌و د دوو كومبونان دا دگەل نوینەرێن خەلكی ل پەرلەمانێ عیراقی مە بحس لڤی بابەتی كریە‌و مە داخازەكا فەرمی ژی یا كری بو چەندین بابەتێن گرێدای جوتیارێن هەرێما كوردستانێ‌و پارەیێ گەنمی ژی ئێك ژوان بابەتان بو‌و دگەل لایەنێن پەیوەندی دار د پەیوەندیێ دایە، بەلێ ب مخابنیڤە پارێت گەنمێ جوتیاران بویە كێشەیەكا سیاسی یا دناڤبەرا حكومەتا عیراقی‌و هەرێما كوردستانێ دا".

سیبان ئامیدی، ئەندامێ پەرلەمانێ كوردستانێ دبێژێت، پارێن سالێن بوری نە هاتیە دان‌و مە وەك لیژنەیا كشتوكالی بو دیڤچونا ڤی بابەتی سەرەدانا بەغدا كر‌و دگەل لایەنێن پەیوەندی دار‌و كوتلەیێن سیاسی روینشتینە داكو ئەڤ بابەتە بهێتە ئیك لایی كرن.

سیپان ئامێدی گوت ژی، وەك یا دیار ئەڤ بابەتە بویە بابەتەكێ سیاسی دیر ژ هندێ كو بابەتەكێ یاسایی بیت‌و بو دانا ڤی پارەی پێدڤی ب بریارەكا سیاسیە چونكی ئەڤ پارەیە یێ ئامادەیە‌و چویە سەر ژمارا بانكیا وەزارەتا بازرگانی لێ پێدڤی ب رەزەمەندیا سەروك وەزیرێن عیراقێ یە.

جمال كوچەر، ئەندامێ پەرلەمانێ عیراقی بو ژیان گوت "ئەڤ بابەتە دوو خالان بخوڤە دگریت خالا ئێكێ لسەر دەمی حیدر عبادی بریارەك یا دەركەتی كو ئەو پارەیە بهێتە راوەستاندن‌و نەهێتە هنارتن بو هەرێمێ‌و بو نە هێلانا ڤێ بریارێ پێدڤی ب بریارەكا دی یە ژلایی سەروك وەزیرێن نوكە، خالا دووێ بەریا ریفراندومێ عیراق داخاز ژ هەرێما كوردستانێ كر بهێت وی پارەی وەرگریت هەرێما كوردستانێ یا رازی نەبو لسەر وەرگرتنا وی پارەی‌و دگوتن یێ كێمە‌و تا نوكەژی 490 ملیار ژ وی پارەی د خەزینەیا وەزارەتا بازرگانی دانە".

هەرێما كوردستانێ یا رازی نەبو لسەر وەرگرتنا وی پارەیێ گەنمێ جوتیاران

جەمال كوچەر گوت ژی، پشتی ئەنجامدانا ریفراندومێ عەبادی بریار دا هەمی پارە بو كوردستانێ بهێنە راوەساندن ئەڤە ژی ئێك ژ وانا بو، د دوماهیك كومبونا مە دگەل عادل عبدالمهدی گوتیە مە ژبلی پارەیێ موچەیێ فەرمانبەران ئەز نەشێم هیچ برە پارەكێ دی بهنێرم تاكو حكومەتا هەرێما كوردستانێ نەفتێ رادەستێ مە نەكەت.