بەرپرسی پرۆتۆكۆلی حكومەتی هەرێم بڕوانامەی دكتۆرای پێ بەخشرا

بەدەر لەرێنمایەكان بۆی كراوە

ژیان: تایبەت

بەدەر لە رێنمایەكانی خوێندنی باڵا شێر ئازاد، بەرپرسی پرۆتۆكۆڵی حكومەتی هەرێم بڕوانامەی دكتۆرای پێبەخشرا، لەكاتی دەوامی فەرمانبەرایەتی.

شێرزاد ئازاد سوڵتان، بەرپرسی پرۆتۆكۆلی حكومەتی هەرێمی كوردستان رایگەیاند" لەبەشی كۆمەڵناسیی كۆلێژی ئاداب لە زانكۆی سەلاحەدین، بڕوانامەی دكتۆرام بەدەستهێنا".

بەپێی بەدواداچوونی ژیان، شێرزاد ئازاد، بەرپرسی پرۆتۆكۆلی حكومەتی هەرێمی كوردستان لەكاتی دەوامی ئاسایی خوێندكاری دكتۆرابووە لەزانكۆی سەلاحەدین، ئەمەش پێچەوانەی رێنمایی وەزارەتی دارایی و ئابووری تایبەت مۆڵەتی خوێندنە.

ژیان لەگەڵ چەند بەرپرسێكی وەزارەتی دارایی و ئابووری حكومەتی هەرێم قسەی كرد، سەرجەمیان باسیان لەوەكرد، بەپێی رێنمایی دارایی مۆڵەتی خوێندن، هیچ فەرمانبەرێك بۆی نییە لەكاتی دەوامی ئاسایی بخوێنێت، ئەگەر فەرمانبەرەكە خوێندنیشی تەواوكرد ئەوا راستاندنی بڕوانامەی بۆ ناكرێت.

ژیان زانیویەتی، بەخشینی بڕوانامەی دكتۆرا بە شێرزاد ئازاد، بە بەرسی پرۆتۆكۆلی حكومەتی هەرێمی كوردستان بەدەر لەرێنماكان بووە.

سعود هاشم، رۆژنامەنووس‌و فەرمانبەر دەڵێت، یەكێك لە رێنماییەكانی خوێندنی ماستەر و دكتۆرا بۆ فەرمانبەران پێویستە خوێندكار مۆڵەتی خوێندنی هەبێت‌و خۆی تەرخان بكات.

باسی لەوەشكرد، ئەگەر بەدەر لە رێنماییەكان بڕوانامە نەبەخشراوەتە بەرپرسی پرۆتۆكۆل‌و بۆی نەكراوە پێویستە زانكۆی سەڵاحەدین رونكردنەوە بدات، چونكە ناكرێت لەیەك كاتدا خویندكاری دكتۆرابیت و فەرمانبەریش بیت.

ئەو فەرمانبەرە نمونەی بەخۆی هێناوەتەوە‌و دەڵێت، حەوت ساڵە بڕوانامەم بەدەستهێناوە، بەڵام راستاندنم بۆ ناكرێت.