سەرباز هەورامی لەسەر مانشێتێکی پێشوی راپۆرتێکی رۆژنامەی ژیان رونكردنەوەیەكی بڵاوکردەوە


ژیان:
راوێژکارێکی پێشوی نێچیرڤان بارزانی، لەسەر مانشێتی راپۆرتێکی ژمارەی پێشووی رۆژنامەی ژیان رونکردنەوەیەکی بڵاوکردەوە و دەڵێت" بەدواداچوونی ورد بۆ باباتەکە دەکەم".

سەرباز هەورامی، راوێژکاری پێشوی نێچیرڤان بارزانی لە رونکردنەوەکەدا دەڵێت" لە ڕێگەی پارێزەرەکەمەوە بەدواداچوونی ورد دەكەم بۆ دەركەوتنی ڕاستییەكان، چونكە ناوی هەندێك كۆمپانیا و وڵات هاتووە تا ئەمڕۆ نە ناویانم بیستووە و نە سەردانی ئەو وڵاتانەشم كردووە".

دەقی رونکردنەوەکە:

هەفتەنامەیەك كە گومانی بەرچاو لە ئاڕاستەی كار و ئەجێنداكانیدا بەدی دەكرێ و پاڵنەری سیاسی مەبەستداری هەیە بە ناوی "ژیان" لە ژمارە (118)، ڕۆژی یەكشەممە 8/12/2019دا، بابەتێكی لە ژێر ناونیشانی "سپیكردنەوەی پارە"دا بڵاوكردۆتەوە، كە گوایە دۆسیەكی تێوەگلانی بەندە لە وەرگرتنی پارە لە هەندێك كۆمپانیا بڵاوكراوەتەوە.

ئەو سەرچاوەیەی هەفتەنامەكە پشتی پێ بەستووە، لە ساڵی 2005وە لەسەر بنەمای ڕاپۆرتی نادروست تەشهیر بە پارتێكی دیاریكراو دەكات. ئەم بابەتەی "ژیان"یش لە هەمان چوارچێوەدایە، دیارە كە لە بە ئامانجگرتنی كەسایەتی مندا، ئامانجی دیكەیان هەیە و دەیانەوێ خیانەتی 16ـی ئۆكتۆبەر و خاكفرۆشتن و دزینی نەوتی كەركووكی پێ بشارنەوە، بەتایبەت كە لەم كاتەدا كۆنگرەیان هەیە.

لە ڕاستیدا مەبەستم نەبوو هیچ ڕوونكردنەوەیەك یان وەڵامێك لەسەر بابەتی هەفتەنامەی "ژیان" بنووسم، كە بۆ ڕای گشتی كوردستان ڕوونە چ ئەجێندایەكی سیاسی هەرزان و مەترسیداری لە ناوخۆی كوردستان لە پشتە، بەڵام كاتێك پرسكە دێتە سەر بابەتی دۆسیەی دادگا و كەیسی گەندەڵی، ناچارم چەند ڕاستییەك بخەمەڕوو، كە تەواوی ئەو بابەتە ڕۆژنامەوانییە ناڕاست دەردەخەن.

لە بابەتەكەی "ژیان"دا كە لە سەرچاوەیەك كە هەر خۆیان لە پشتەوەین، بە ناوی (EKurd Daily) وەرگیراوە، دەشڵێن لە وەزارەتی دادی كازاخستان ئەو بەڵگانە دەستكەوتوون، لەكاتێكدا تائێستە ئەو وڵاتەم نەبینیوە. سەرەڕای ئەوەی كە ناوی چەندین كەسایەتی لە هەرێمی كوردستان و لە زۆرێك لە وڵاتان لە ڕاپۆرتەكەی (EKurd Daily)دا هاتووە، بەڵام تەنیا ناوی "من"یان زەقكردۆتەوە، لە كاتێكدا هیچ بەڵگە و دۆكیۆمێنتێكی فەرمی بڵاونەكراوەتەوە، كە لە ناوەندێكی باوەڕپێكراوەوە دەرچووبێ، هاوكات ئەم پرسە لە لایەن هیچ لایەنێكی فەرمی و نافەرمی پشتڕاست نەكراوەتەوە، بەڵكو ئەوەی پشتیان پێ بەستووە و وەك سەرچاوە بەكاریان هێناوەتەوە، تەنیا ئەو سەرچاوە ئینگلیزییەیە كە ناوی (EKurd Daily)ە.

لە ڕاپۆرتەكەی هەفتەنامەی ژیاندا دەستەواژەكانی "لەوانەیە، پێدەچێت و گومان دەكرێت" هەن، كە ئەم دەستەواژانە لە پرسێكی لەم جۆرەدا جێگەی متمانە و باوەڕپێكراو نین، چونكە ئەم وشانە بەڵگەن لەسەر نادروستی ڕاپۆرتەكەی هەفتەنامەكە. بۆ ئەم مەبەستە لە ڕێگەی پارێزەرەوە بەدواداچوونی ورد دەكەم بۆ دەركەوتنی ڕاستییەكان، چونكە ناوی هەندێك كۆمپانیا و وڵات هاتووە تا ئەمڕۆ نە ناویانم بیستووە و نە سەردانی ئەو وڵاتانەشم كردووە.

لەگەڵ ڕێزدا...

سەرباز هەورامی
12/12/2019