دژی بڕیارێکی لیژنەی فەتوا ڕێکخراوەکانی ژنان گردبوونەوە


ژیان:

ژمارەیەك رێكخراوی كۆمەڵی مەدەنی، چالاکوانان و ڕێکخراوەکانی تایبەت بە ژنان نیگەرانن لە بارەی فەتوای تایبەت بە سەركەوتنی ئافرەت بەتەنها لەگەڵ شۆفێری تاكسی و، داوا دەكەن فەتواكە بكێشرێتەوە.

ئەمڕۆ پێنجشەممە، چالاكوانان و رێكخراوه‌كانی ژنان له‌ هه‌ولێر دژی بڕیاری سەرکەوتنی ئافرەت بەتەنها لەگەڵ شۆفێری تاکسی  گردبونەوە و داوایان کرد حکومەتی هەرێمی کوردستان لێپێچینەوە لە لیژنەی فەتوای هەرێمی کوردستان بکات.

چالاکوانان یاداشتێكیان ئاڕاستەی هەریەكە لە سەرۆكایەتیی پەرلەمانی كوردستان، سەرۆكایەتیی هەرێم، سەرۆكایەتیی ئەنجومەنی وەزیران، ئەنجومەنی دادوەریی هەرێم، باڵیۆزخانە و كونسوڵخانەی وڵاتان و نەتەوەیەكگرتوەكانیان كردوە و لە پرێس كۆنفرانسێكدا ڕایانگەیاند: پێویستە ئەنجومەنی باڵای فەتوا لە یەكێتیی زانایانی ئایینی ئیسلامی كوردستان، فەتواكەی لەبارەی سەركەوتنی ئافرەت بەتەنها لەگەڵ شۆفێری تاكسی بكێشێتەوە و داوای لێبوردن لە ژنان و پیاوانی شۆفێری تاكسی بكات.

داواشیانکرد؛ زەمینەی ئەنجامدانی تاوان بەرانبەر ژنان نەهێڵرێت، وەزارەتی ئەوقاف و مامۆستایانی ئایینی-یش رۆڵ ببینن بۆ دوركەوتنەوە لە سوكایەتیكردن بە ژنان.

ئەوەش لەکاتێکدایە، ئەنجومەنی باڵای فەتوا لە هەرێمی كوردستان سەرەتای ئەم مانگە، لە فەتوایەکدا لەبارەی سەرکەوتنی ژنان لەگەڵ تاكسی رایگەیاندبوو "دەرچونی ژنان یان كچان لە تەك مەحرەمی خۆیدا هەركاتێك بێت بۆ هەر جێگەیەك بێت دروستە‌ و شایستەیە‌ و ئەصل وایە بەو شێوەیە بێت و فەتوای داوە کە جائیز نییە ژنان و کچان بە تەنیا بچنە تاکسییەوە"، کە ئەوەش کاردانەوەی جیاوازی لێکەوتەوە لەناو چین و تووێژەکاندا.