لە رووداوێكی هاتوچۆدا لە نێوان دوو بارهەڵگر كەسێك گیانی لەدەستدا


ژیان:

ئەمشەو لەسەر ڕێگای كەلار و باوەنور لەنزیك گوندی سەید محمود بەهۆی پێكدادانی دوو ئۆتۆمبێل لە جۆرەكانی میتسۆبۆشی بارهەڵگر و مان بارهڵگر، شۆفێری ئۆتۆمبیلی متسیۆبۆشی گیانی لەدەستداوە.

هاتوچۆی گەرمیان رایگەیاند، شۆفێری ئۆتۆمبێلەكەی بەرامبەریش بەسەختی بریندار بووە و گەیندراوەتە نەخۆشخانەی شەهید مەلا ئەحمەد. لێكۆڵینەوە لە هۆكاری رودانی روداوەكە لەلایەن تیمەكانیانەوە دەستی پێكردوە.

عێراق و هەرێمی كوردستانیش لە ڕیزی پێشەوەی وڵاتە مەترسیدارەكاندانە لە ڕووی هاتوچۆوە و ساڵانە نزیكەی یەك هەزار كەس لە هەرێمی كوردستان بە ڕووداوەكانی هاتوچۆ گیان لەدەست دەدەن و هەزارانیش بریندار دەبن.

ئەوە لە كاتێكدایە بە گوێرەی ئامارەكانی هاتوچۆی هەرێم لە ساڵانی رابردوودا هەموو دوو رۆژ جارێك چوار كەس بە رووداوی هاتوچۆ گیانیان لەدەست داوە و مانگانە ٦٩٢ كەس بریندار بوون. 

بەگوێرەی راپۆرتێكی رێكخراوی تەندروستیی جیهانی، لە ساڵی ٢٠١٨دا، یەك ملیۆن و ٣٥٠ هەزار كەس له جیهاندا به رووداوی هاتوچۆ گیانیان لەدەست داوە. لە هەر ٢٤ چركەیەكدا لە جیهان، كەسێك بە رووداوی هاتوچۆ گیان لەدەست دەدات.