ئیجە بووە دوا مەنزڵگەى خەونی گەنجێكی هەڵەبجە


ژیان:چۆمان عوسمان

هەردی شەوی ١٠ی ئەم مانگە نامەیەک بۆ سەلامی برای دەنێرێت ودەنووسێت "كاكه‌گیان، من ئه‌مشه‌ و به‌یه‌ختێك به‌ڕێده‌كه‌وم، توخودا دۆعای خێرم بۆ بكه‌ن"، بەڵام بۆ بەیانیيەکەی هەواڵی ئەوە دەگات بە سەلام، هەردی لەدەریای ئیجە خنکاوە، ئەو ڕۆژە دەبێتە ڕۆژێکی تاریک لەژیانی خێزانێکی هەڵەبجە.

هه‌ردی بارام، خەڵکی شاری هەڵەبجەی شەهیدەو تەمەنی 23 ساڵه‌، ١٨ی مانگی نیسانی ٢٠١٩ کوردستان بەرەو وڵاتی تورکیا جێدەهێڵێت، ئامانجی هەردی جێهێشتی یەکجاری کوردستان دەبێتو دەیەوێت بەڕێگەی پڕمەترسی و قاچاخ بگاتە یۆنان و پاشان بڕواتە ئەوروپا، بەڵام ١١ی ئەم مانگە هەواڵ بەکەسوکارەکەی دەدرێت کەوا هەردی بەهۆی وەرگەڕانی یەختێکەوە لەدەریای ئیجە گیانی لەدەستداوە .

سه‌لام بارام  چیرۆكی ناسۆری لەدەستدانی براکەی بەتەواوی بڕسی لێبڕیوو به‌ دڵێكی پڕبه‌ حه‌سره‌ته‌وه‌ باسی ئەوەی دەکرد، هەردی پاش ئەوەی زانکۆی تەواوکردووە بۆ ماوه‌یه‌ك سەرقاڵی کاری دووكانداریبووە، ئەو هەموو خه‌ونی ئەوەبوو ژیانێکی شایستە بژیت و کاری دەستکەوێت یان لەفەرمانگەیەکی دەوڵەت دابمەزرێت بەڵام ئەو کارەی دەستنەکەوت.

هەردی مانگی نیسانی ٢٠١٩ پاش ڕێکەوتن لەگەڵ قاچاخچیەکی کورد بڕیاریداوە کوردستان جێبهێڵت، ناوەڕاستی مانگی نیسان دەچێتە تورکیا بەڵام بەخت یاری نابێت و دەستگیردەکرێت، ئەو لەگەڵ کۆمەڵێک لەهاوڕێکانی پاش ماوەیەک زیندانی ئازاد دەکرێن، بەڵام جارێکی دیکە دەیانەوێت سنورە ئاوییەکانی تورکیا بەرەو یۆنان تێپەڕبکەن دووبارە دەستگیردەکرێت، پاش دووەم جار ئازادکردن ئەوان کۆڵنادەن و ڕۆژی ١٠ی کانوونی دووەمی ٢٠٢٠ خۆیو ٥٠ کەس لەدەریای ئیجە کاتێ دەیانەوێت بەرەویۆنان بپەڕنەوە یەختەکەیان لەئاودا نقوم دەبێت گیان لەدەست دەدەن.   

سه‌لام بارام، ئاماژەی بۆ ئەوەدەکرد، دره‌نگانێكی شه‌و دڵنیایان كردینه‌وه‌ هه‌ردی له‌ناو یه‌ختێك له‌ (ئیجه‌)دا خنكاوه‌، دواین نامه‌ی كه‌ بۆی ناردووم دره‌نگانێكی شه‌وی ١٠ ئه‌م مانگه‌بوو، بۆی نوسیبووم،"كاكه‌گیان، من ئه‌مشه‌و به‌یه‌ختێك به‌ڕێده‌كه‌وم، تووخودا دۆعای خێرم بۆ بكه‌ن"، بەڵام ئەوە کۆتا نامەی هەردی دەبێت ئەو شەوە دەبێتە کۆتایی چیرۆکی ژیانی نێوان هەردی و براکەی.

سەلام، زۆر بەخەمەوە باسی کۆتا ساتەکانی ماڵئاویی براکەی لەخێزانەکەی دەکات،   کاتێک کوردستانی بەجێهێشووە ئومێدێكی زۆری هه‌بووه‌و ڕۆژانه‌ له‌گه‌ڵ ماڵه‌وه‌یاندا قسه‌یكردووه‌، بڕوای وابووە ژیانێکی خۆش چاوەڕێیەتی، ووتی: "براكه‌م وەکو ئه‌و هه‌زاران گه‌نجه‌ی کوردستان سه‌ری خۆیان هه‌ڵگرت و به‌ره‌و ئه‌وروپا ڕۆشتن، ئه‌ویش ئومێدی ژیانێكی نوێی ده‌خواستو خواستیبوو ژیانێکی باشتربژی، بەڵام بەداخەوە نەیتوانی".

به‌ره‌به‌یانی ڕۆژی ١١ی مانگی کانوونی یەکەمی ٢٠٢٠ له‌كاتی كۆچكردنی پۆلێك په‌نابه‌ر كه‌ به‌نیازبوون له‌كه‌ناراوه‌كانی ووڵاتی یۆنان خۆیان بگه‌یه‌ننه‌ كه‌ناراوه‌كانی ووڵاتی ئیتالیا، له‌نزیك دوورگه‌ی (پاكسوس)ی یۆنان توشی ڕووداوده‌بن، زیاتر له‌ 50 كه‌سیان گیان له‌ده‌ستده‌ده‌ن و بێسه‌وشوێن ده‌بن له‌ناویاندا ٣ كوردی دانیشتووی سه‌یدسادق و گەنجێکی شاری هەڵەبجە گیانیان لەدەستدا.

ئاری جه‌لال سه‌رۆكی ده‌زگای لوتكه‌ بۆ په‌نابه‌ران، لەبارەی ئەو کەیسەوە ئاماژەی بۆ ئەوەکرد به‌داخه‌وه‌ بانده‌كانی قاچاخچیەتی زۆر بێڕه‌حمانه‌، مامه‌ڵه‌ له‌گه‌ڵ ئه‌و هاوڵاتیانه‌ ده‌كه‌ن، به‌شێوه‌ی نایاسایی له‌ كه‌ناراوه‌كانی ئیجه‌وه‌ ده‌ڕۆن بۆ ئه‌وه‌ی بگه‌نه‌ ئه‌و وڵاته‌ی خۆیان ده‌یانه‌وێت.
ده‌شڵێت: "ئه‌و ڕێگه‌ نایاساییه‌ زۆر سه‌خت و دژواره‌و ڕێگای مه‌رگە، چونكه‌ بانده‌كانی قاچاخچیەتی ئامانجیان پاره‌ی زۆر په‌یداكردنه‌ نه‌ك سه‌لامه‌تی گیانی هاولاتیان".

بەگوێرەی گێڕانەوەی میدیای جیهانی یه‌خته‌كه‌ی  كۆچبه‌ران به‌ ٥٠ سه‌رنشینه‌وه‌ ژێرئاو كه‌وتووه‌، چه‌ند كه‌شتییه‌كی بارهه‌ڵگری  پۆلیسی ده‌ریاوانی (كه‌ركه‌ره‌و ئیگۆمه‌نیچه‌)ی یۆنانی لێ ئاگادار كراوه‌ته‌وه‌ كه‌ توانیویانه‌ ٢١ كه‌سیان ڕزگاربكه‌ن و ته‌رمی ١٢  قوربانیان له‌ نێوده‌ریادا ده‌رهێناوه‌، له‌ئێستادا نزیكه‌ ١٧ په‌نابه‌ری دیكه‌ بێسه‌روشوێنن و پۆلیسی ده‌ریاوانی به‌رده‌وامه‌ له‌پڕۆسه‌ی گه‌ڕان به‌دوایاندا.