حکومەتی ھەرێم راگەیەندراوێکی بڵاو کردەوە


ژیان:

حکومەتی ھەرێم راگەیەندراوێکی لەبارەی گێڕانەوەی تەرمی ئەو گەنجانە بڵاوکردەوە کە لە رێگەی چوون بۆ ئەوروپا گیانیان لەدەستدا.

دوای ئەوەی دەزگای لوتکە بۆ کاروباری ئاوارە و پەنابەران رایگەیاند لە سەر ئەرکی لاھور شێخ جەنگی تەرمی قوربانیەکانی ئیجە دەگەڕێننەوە ھەرێمی کوردستان، سەرۆکی حکومەت دەزگاکانی حکومەتی ڕاسپاردووە ئاسانکاریی بکەن بۆ گەڕاندنەوەی تەرمی ئەو گەنجە کوردانە.

لە ڕاگەیەندراوێکدا جوتیار عادل، وتەبێژی حکومەتی ھەرێمی کوردستان، رایگەیاند: سەرۆکى حکومەتى هەرێم هاوخەمی خۆی بۆ بنەماڵە و کەسوکاری ئەو گەنجانە دەربڕیوە کە بەهۆی نوقمبوونی بەلەمەکەیانەوە لە نێوان تورکیا و یۆنان گیانیان لەدەستدا.

ناوبراو راشیگەیاندووە، مەسرور بارزانى دەزگاکانی حکومەتی راسپاردووە هەموو هاوکاری و ئاسانکارییەک بکەن بۆ گه‌ڕاندنه‌وه‌ی ته‌رمی قوربانییەکان بۆ هه‌رێمی كوردستان.
رۆژی ١١ی ئه‌م مانگه ‌یه‌ختێك كه‌زیاتر له‌٥٠ كۆچبه‌ری هه‌ڵگرتبوو بەرەو ئیتاڵیا به‌هۆی له‌كاركه‌وتنی بزوێنەرەکەیەوە ژێر ئاو کەوت و بەوهۆیەوە و بەشێک لە سەرنشینەکان گیانیان لەدەستدا کە نزیکەی ٢٠ کەسیان  هاوڵاتیی هەرێمی کوردستان بوون و ویستوویانە کۆچ بکەن.

دەزگای لوتکە بۆ کاروباری ئاوارە و پەنابەران رایگەیاند لەسەر ئەرکی لاھور شێخ جەنگی، تەرمی ئەو قوربانیانە دەگەڕێندرێتەوە ھەرێم.