هێرشێكی ئەلكترۆنی كرایە سەر دەزگای هەواڵگری میت


هاكەرانی یۆنان هێرشیكی ئەلیكترۆنی بۆ تۆڵەسەندنەوە دەكەنە چەند پێگەكی ئەلیكترۆنی توركی كە لە ناویاندا ئیمەیڵی چەند دامەزراوەیەكی ئەمنی توركیاشیان كردووەتە ئامانج.  

ژیان – یۆنان: گروپێكی هاككەری یۆنانی بە ناوی "Anonymous Greece" لە راگەیەندراوێكیاندا شەوی رابردوو ئاشكرایان كرد چەند هێرشێكی ئەلكترۆنیان بۆ سەر چەند دامەزراوەیەكی توركیا دەست پێكردووە و هەڵمەتەكەشیان بە هەڵمەتی "تۆڵە سەندنەوە" ناوهێناوە. 

بە گوێرەی راگەیەندراوەكەی ئەو گروپە ژمارەیەك ناوەندی ئەمنی و میدیای توركی كراونەتە ئامانج، هەریەكە لە پێگەی 112ی فریاگوزاری و خزمەتگوزاری هاككراون و ئیمەیڵی هەریەكە لە دەزگای هەواڵگری میت و پۆلیسی توركیا و هەردوو رۆژنامەی سەباح و حوڕییەت دەستیان بەسەردا گیراوە. 

گروپە یۆنایەكە باسی ئەوەیان كردووە: وەك چۆن دوێنێ توركەكان پێگەكانی یۆنانیان كردە ئامانج، بڕیارماندا بۆ رۆژی دواتر بەهەمان شێوە وەڵامیان بدەینەوە، هەر ئێستا هێرشەكان دەستیان پێكرد.

ئەوە لە كاتێكدایە رۆژی هەینی هاكەرانی تورك پێگە ئەلیكترۆنییەكانی سەر بە دەزگای هەواڵگری نیشتمانیی یۆنان "NIS" ، وەزارەتی كاروباری دەرەوە و پەرلەمان و وەزارەتی دارایی و بۆرسەی ئەسینایان هاك كرد و بۆ ماوەی نزیكەی كاتژمێرێك ئەو پێگانە لەكار كەوتن.

ناكۆكی نێوان هەریەكە لە یۆنان و توركیا بنچینەیەكی مێژووی هەیە و هەردوو وڵات یەكتری تۆمەتبار دەكەن بە هەوڵی  داگیركردنی خاكی وڵاتەكانیان.