خوپیشاندانەكانی عێراق درێژەیی هەیە و كوژراو بریندار هەن


لە بەرەبەیانی ئەمڕۆ دووشەممەوە 20-01-2020 شەڕ و رووبەڕوونەوەیەكی بەهێز لەنێوان خۆپیشاندەران و هێزە ئەمنییەكان لە گۆڕەپانی تەیەران دروستبووە. هێزە ئەمنییەكان بە گازی فرمێسكڕێژ هێرشدەكەنە سەر خۆپیشاندەران، خۆپیشاندەرانیش بەشێكی زۆری رێگە سەرەكییەكانیان داخستووە و رێگە نەدراوە فەرمانبەران بچنە سەر كارەكانیان. ژمارەیەكی زۆر خۆپیشاندەریش لەلایەن هێزە ئەمنییەكان دەستگیركراون بەتایبەت ئەوانەی دەیانویست ئەم بەیانە رێگە سەرەكییەكان بگرن.

ژیان _بەغدا : بە گوێرەی زانیارییەكان، رێگەی خێرای نێودەوڵەتی نێوان بەغدا و پارێزگاكانی باشووری عێراق داخراوە و هاتووچۆ لەسەر رێگەكە پەكی كەوتووە.
ئەمڕۆ ئەو مۆڵەتە سێ رۆژییە كۆتایی دێت، چالاكوانان و رێكخەرانی خۆپیشاندانەكانیش هەوڵەكانیان لەسەر تۆڕی ئینتەرنێت چڕكردووەتەوە بۆ ئەوەی خۆپیشاندانی ملیۆنی ئەنجام بدەن

بەگوتەی یەكێك لە خۆپیشاندەرەكانی گۆڕەپانی تەیەران لە بەغدا تەنها رۆژی یەكشەممە 19-01-2020 هێزە ئەمنییەكانەوە كوژراون. رۆژانی رابردوو خۆپیشاندەران هۆشداری ئەوەیان دابوو ئەگەر بێت و تاوەكو 20ی ئەو مانگە داواكارییەكان جێبەجێنەكرێت و كەسێك بۆ پۆستی سەرۆكوەزیران دەستنیشان نەكرێت كە بە دڵی ئەوان بێت، بەردەوام دەبن لەسەر خۆپیشاندانەكان.

بە گوێرەی زانیارییەكان لە  كەربەلا پردی سەرەكی "چریبە"ی ناوەڕاستی پارێزگاكە و چوار پردی سەرەكی پارێزگای موسەننا داخراون و هاتووچۆش لە هەر یەكە لە سەماوە و رومێسە پەكیكەوتووە، هاوكات رێگەی نێوان هەردوو پارێزگای زی قار و موسەنا داخراوە.

لە بەعقوبەش خۆپیشاندەران پردی "جمهوری"یان گرتووە و رێگەی هاتوچۆ نەماوە، لەلایەنی دیكەوەش رێگەی نێوان هەردوو پارێزگای دیوانیە و بابل گیراوە.
ئەوە لەكاتێكدایە پێشتر خۆپیشاندەران لە ناسریە مۆڵەتی سێ رۆژیان داوەتە حكومەتی عێراق بۆ ئەوەی داواكارییەكانیان جێبەجێ بكات، بە پێچەوانەوە هەڵوێستی توندتریان دەبێ.

لە بەیانی ئەمڕۆوە شەڕ و رووبەڕووبوونەوەیەكی بەهێز لەنێوان خۆپیشاندەران و هێزە ئەمنییەكان لە گۆڕەپانی تەیەران لە بەغدا روویدا و تاوەكو ئێستا بە دەیان خۆپیشاندەر برینداربوون  و هێزە ئەمنییەكانیش بە گازی فرمێسكڕێژ و گوللە هەوڵی بڵاوەپێكردنی خۆپیشاندەران دەدەن. 
جیا لە گازی فرمێسكڕێژ هێزە ئەمنییەكان بە گوللـە هەوڵی بڵاوەپێكردنی خۆپیشاندەران دەدەن، بەڵام خۆپیشاندەران پێداگرن لەسەر مانەوەیان لە گۆڕەپانی تەیەران و دەڵێن بەردەوام دەبن لە خۆپیشاندان تاوەكو داواكارییەكانیان جێبەجێدەكرێت.