دیسانەوە ڕیفراندۆم: پێویستە دوای لێبوردن بكەن


مەریوان وریا قانع
با واز لەوە بهێنین هەر چەند ڕۆژێك دوای ئەنجامدانی ڕیفراندۆمەكە، بكەرە سەرەكییەكانی ریفراندۆم. بە كردەوە لە ئەنجامدانی ڕیفراندۆمەكە پەشیمان بوونەوە و هەموو ھەوڵەكانیان بۆ ئەوە تەرخان كرد بگەڕێنەوە بۆ كەمتر لە دۆخی بەر لە ئەنجامدانی ڕیفراندۆمەكە. بەدوای كەسێكدا دەگەڕن لە بەغدا ئامادەبێت بیانبینێت و قسەیان لەگەڵدا بكات. دەرەنجامەكانمان بینیی و زانیمان ھەرێمیان بە چ دەردێك برد.

بەڵام لە ئێستادا هەمان ئەو بكەرانە تەنھا بە كردەوە نا، بەڵكو بە دەنگی بەرز، جارێك بە میدیای ئێرانی دەڵێن ”ڕیفراندۆم ھەڵە بوو” (ئەمە نێچیرەوان بارزانی وتی). جارێك ی تر بە میدیای فەرەنسیی دەڵێن ”ڕیفراندۆم تەنها بۆ زانینی خواست و ئارەزووی خەڵك بووە“ و ”هەرگیز كردەی ڕاگەیاندنی دەوڵەت لەئارادا نەبووە“.
 ئینجا هەمان ئەو قسەیە دووبارەدەكاتەوە كە زۆربەی كوردێك لەسەر بێشكەوە فێریدەبێت: ”باوەڕبوون بە سەربەخۆیی كوردستان و ئارەزوی سەربەخۆبوون شتێكە و واقیعیش شتێكی ترە“، (ئەمەیان مەسرور بارزانی دەڵێت).

بێگومان سەرجەمی ئەم قسانەی ئەو دوو ئامۆزایە لێرەدا دەیكەن تەواو ناكۆكن بەو هەڵمەتی پڕوپاگەندەیەی لە سەردەمی ڕیفراندۆمدا ئەنجامیان دا، هەڵەتێك تیایدا ”بای بای“ان لە عێراق دەكرد و جەغتیان لەسەر ”هەڵوەشاندنەوەی سایكس پیكۆ“ ئەكرد، كەسانێكیان هێنابوە سەر شاشەكان دەیانگوت ”لە قورئاندا پێشبینی دروستكردنی ئەو دەوڵەتە“كراوە.

ڤلادیمێر ئیلیتش لێنین لە شوێنێكدا دەڵێت ”سیاسیی باش ئەو كەسە نییە كە هەڵە ناكات، بەڵكو ئەو كەسەیە كە هەڵەی ستراتیژیی ناكات“. 
ئەم سیاسیە كوردانە لە جۆری ئەو سیاسیانەن كە بەردەوام هەڵەی ستراتیژیی دەكەن، مێژووی دوای ڕاپەڕین پڕیەتی لە هەڵەی ستراتیژیی یەك لەدوای یەك و ڕیفراندۆمیش دواهەمین هەڵەی ستراتیژیان نابێت و نییە. بەڵام كێشەكەدا لەوەدایە ئەمانە نایانەوێت و هەستی ئەوەیان تێدا كە پێویستە باجی ئەو هەڵانە بدەن. ئەوان هەڵەی ستراتژیی دەكەن و میلەتەكە دەبێت باجەكەی بدات.

ئێستا دوای ئەم هەموو دانپیانانە كاتی ئەوە هاتوە، لانیكەم، داوای لێبوردن لە هەموو ئەو كەسانە بكەن كە لەسەر ئەو قسانەی ئێستا خۆیان بە دەنگی بەرز دەیكەن، بە جاش و خائین و ناپاكیان دەكردن.

 ئەم داوای لێبوردنە سادەترین و سەرەتایترین شتێكە ئەنجامیبدەن.




تۆڕی هەواڵی ژیان بەرپرس نییە لە ناوەڕۆکی ئەم نوسینە