زیاتر لە 7 هەزار خێزانى عەرەب هاوردەى کەرکووک کراون


ئەندامێکى ئەنجوومەنى هەڵوەشێندراوەى پارێزگاى کەرکووک، پێیوایە هەڵوەشاندنەوەى ئەنجوومەنى پارێزگاکانى عێراق لەلایەن ئەنجوومەنى نوێنەرانەوە "قورس لەسەر کەرکووک کەوتووە" و  دەڵێ، لەوەتەى ئەنجوومەنەکە هەڵوەشێندراوەتەوە "کەسنییە چاودێریی پارێزگارى کەرکووک بکات و بێخەمانە، ئەوەى بییەوێت دەیکات".

ژیان - کەرکووک: جوان حەسەن عارف، دڵنیایە لەوەى کەرکووکییەکان زیانمەندترینى پارێزگاى عێراق بوون لە هەڵوەشاندنەوەى ئەنجوومەنى پارێزگاکان بەهۆى ئەوەى پارێزگاکە، هەستیارترین و پڕناکۆکى ترینە و پێیدەگوترێت ناوچەى کێشە لەسەر "پارێزگارەکەشى تاکڕەوانە مامەڵە دەکات و لە دامەزراندندا، کەسوکارەکەیی و عەشیرەتەکەیی و عەرەبەکانى کەرکووک پێشدەخات و نزیکەى 60 بەرپرسى کوردى بەشە جیاوازەکانى ئیدارەى کەرکووکی لاداوە و لە خەرجکردنى بوودجە و خزمەتگوزارییەکانیش، دادپەروەر نییە".

رؤذى 28.10.2019 لەژیر کاریگەریی و پاڵەپەستۆى خۆپیشاندەران و داواى هەندێک پەرلەمانتار، ئەنجوومەنى نوێنەرانى عێراق بڕیایدا، ئەنجوومەنی پارێزگاکانی عێراق، هەڵبوەشێنێتەوە و هاوکات تەواوی مووچە و ئیمتیازاتی سێ سەرۆکایەتییەکەی هەوەڵوەشاندەوەو، هاوکات بڕیاریدا بە پێکهێنانی لیژنەی گۆڕانکاریی دەستووریی کە نوێنەرانی سەرجەم پێکهاتەکانی تێدابێت لە ماوەی چوار مانگدا، پرۆژەى هەموارکردنەوەکە ئامادە بکەن.

هەر لەو دانیشتنەدا، پەرلەمانی عێراق دەنگیدا لەسەر ھەڵوەشاندنەوەی ھەموو ئمتیازاتەکانی ھەرسێ سەرۆکایەتییەکەی عێراق، ئەندامانی پەرلەمان، بەرپرسە باڵاکانی عێراق، ڕاویژکار و بریکارى وەزیرەکان، بەڕێوبەرە گشتییەکان، دەسەڵاتی دادوەریی، دەستەی نەزاھە، دەستە سەربەخۆکان و دادگای باڵا و پاریزگارەکان.

دواى هەڵوەشاندنەوەى ئەنجوومەنى پارێزگاى کەرکووک، ئەو پەرلەمانتارە کەرکووکییانە کاروبارەکانى ئەنجوومەنى پارێزگا بەڕیوەدەبەن، کە وەک نوێنەرى کەرکووکییەکان گەیشتوونەتە ئەنجوومەنى نوێنەرانى عێراق. بەڵام ئەو ئەندامەى ئەنجوومەنى هەڵوەشێندراوەى پارێزگاى کەرکووک، رەتیدەکاتەوە ئەوان بتوانن رۆڵى ئەندامانى ئەنجوومەن بگێڕن بەو پێیەى "ژمارەیان کەمە و بەکارى پەرلەمانتارییەوە سەرقاڵن و شوێنى کارکردنیان لە بەغدایە".

جوان حەسەن عارف، ئەندامێکى یەکگرتووى ئیسلامى بوو لە لیستى برایەتى کەرکووک و دەڵێ، کێشەى زەوى و زار لە نێوان جووتیارە عەرەبەکان و جووتیارە کوردەکان "لە لێوارى تەقینەوەدایە لە ناحیەى سەرگەڕان" بەهۆى ئەوەى، جووتیارە عەرەبەکان هەرەشە لە جووتیارە کوردەکان دەکەن و دەیانەوێ دەستبگرن بەسەر زەوییەکانیاندا. ناوبراو، نیگەرانە لەو هەموو خێزانە عەرەبەى لە ناوچەکانى دیکەى عێراقەوە چوونەتە پارێزگاى کەرکووک و بارى دیموگرافی پارێزگاکەیان شێواندووە "حەوت هەزار خێزانى عەرەب هاتوونەتە ناو کەرکووک و دەوروبەرى و پارێزگار ئاسانکاریی تەواویان بۆ دەکات".

ئەوەى زیاتر جوان حەسەن عارف،نیگەراندەکات، هێشتنەوەى بەشێک لەو خێزانانەى چەکدارانى داعشە، کاتى شەڕى داعش لە کەرکووک کۆکرابوونەوە و هێشتا بەشێکیان نە گەڕاونەتەوە شوێنى پێشووى خۆیان. هەربۆیە رەخنە لە بڕیارەکەى پەرلەمانى عێراق دەگرێت بە شێوازى هەڵوەشاندنەوەى ئەنجوومەنى پارێزگاکان و دەپرسێت: ئەنجوومەنى تازەى پارێزگا کەى دێت و کەى دەستبەکار دەبێت "ئەگەر ئەو ئەنجوومەنە دەستبەکار نەبێت و رەوشەکە ئاوا بمێنێتەوە، کێ لەپارێزگار دەپرسێتەوە لە بارەى چۆنێتى خەرجکردنى بوودجەى پارێزگاکە و پرۆژەکان و رەوشی ئیداریی و بەڕێوەبردنى پارێزگاکە؟"

بە بڕواى جوان حەسەن عارف، دەبێت وەک پارێزگایەکى تایبەت مامەڵە لەگەڵ کەرکووک بکرێت و رێگە بدرایە ئەنجوومەنەکەى لەسەر کارى خۆیان بەردەوامبن، تاوەکو ئەوکاتەى هەڵبژاردنێکی دیکە دەکرێت.