سوریا بەردەوامە لە کوشتنی سەربازە تورکەکان لە ئیدلب


وەزارەتی بەرگری تورکیا بڵاویکردەوە، ڕۆژی شەممە ٢٢ی شوبات سەربازێکی دیکەی سوپاکەیان لە ئیدلب لە بۆردومانێکی سوپای رژێمی ئەسەد کوژراوە و لە بەرامبەردا ژمارەیەک بنکەی سەربازیی سوریا، بۆردومانکراون.

ژیان_ ڕێبوار ئەحمەد: نزیکەی مانگێکە ئاڵۆزییەکانی ڕەوشی ئیدلب زیاتر بوون و سوپای تورکیاش بەردەوام هێزى سەربازیی زیاتر لە ناوچەکە کۆدەکاتەوە، ئەوەش پەیوەندییەکانی مۆسکۆ و ئەنقەرەی شپرزە کردووە، کە دوای چەندین دیدار و کۆبوونەوە، نەگەیشتونەتە ڕێککەوتن.

 ئیدلب لە سوپای وڵاتەکەی حەرامە و بۆ تورکیا حەڵاڵ؟
تورکیا هەزاران سەربازی خۆی بۆ سنوورەکانی ئیدلب گواستووەتەوە بۆ ڕێگریکردن لە سوپای بەشار ئەسەد، تاوەکو ئەو شارە کۆنتڕۆڵ نەکاتەوە، لەو چوارچێوەیەشدا، کۆتایی هەفتەی ڕابردوو هێرشی چەکدارەکانی سەر بە تورکیا و سوپای تورکیا بۆ کۆنتڕۆڵکردنەوەی ئەو ناوچانەی کە رژێمی ئەسەد لە نزیک ئیدلب وەریگرتنەوە، دەستیپێکرد.

بەپێی ڕاگەیەندراوێکی پارێزگاری عەنتاب، لە باکووری کوردستان، تەرمی سەربازەکە ڕۆژی شەممە ٢٢ شوبات دراوەتە دەست کەسوکارەکەی. بەپێی ئەو داتایانەی وەزارەتی بەرگری تورکیا بڵاویکردونەتەوە، لە هێرشەکانی سوپای سوریا بۆ سەر هێزەکانی تورکیا، نزیەکی ٢٠ سەربازی تورک کوژراون و 10ی تریش بریندار بوون.
هاوکات وه‌زاره‌تی به‌رگریی توركیا بڵاویكرده‌وه‌، له‌ دوای کوژرانی سەربازەکەیان لە ئیدلب، ٢١ پێگه‌ی رژێمی سووریا "ئاگرباران و خاپووركراون. "

ئەنقەرە و مۆسکۆ نەگەیشتونەتە ڕێککەوتن

ئەوەی ڕوون ئاشکرایە، هێرشەکانی رژێمی ئەسەد بۆ سەر سەربازانی تورکیا لە ئیدلب، بەبێ مۆڵەتی ڕووسیا ئەنجامنادرێن و گڵۆپی سەوزی مۆسکۆیان بۆ هەڵکراوە، لە کاتێکدا ئەنقەرە و تورکیا پەیوەندییەکانیان لەم دواییانە بەهۆی کڕینی سیستمی بەرگری ئێس ٤٠٠ بەرەو پێشچوون، لەگەڵ ئەوەدا لە سەر کەیسی ئیدلب ئاڵۆزیی کەوتووەتە نێوانیان.

لە دوایین هەوڵی گفتوگۆی هەردوو وڵات، ڕۆژی شەممە 22ی شوبات خولوسی ئاكار، وه‌زیری به‌رگریی توركیا، په‌یوه‌ندییه‌كی ته‌له‌فۆنی له‌گه‌ڵ سێرگی شۆیگو،هاوتا رووسییه‌كه‌ی ئه‌نجامداوە.

بەپێی ڕاگەیەندراوی وەزارەتی بەرگری تورکیا،‌ له‌ هه‌ژماری تویته‌ری وه‌زاره‌تەکەدا بڵاوكراوه‌ته‌وه‌، ئاماژه‌ به‌وه‌كراوه‌ له‌ میانی په‌یوه‌ندییه‌ ته‌له‌فۆنییه‌كه‌دا، خولوسی ئاكار و سێرگی شۆیگو، بیروڕایان له‌باره‌ی چاره‌سه‌ری كێشه‌كان له‌ ئیدلب ئاڵوگۆڕكردووه‌، بێئەوەی باسی هیچ ڕێککەوتن یان لێکگەیشتنێک بکرێت.

ئەردۆگان هەڕەشە لە هەموان دەکات!

لەوەتەی ئەردۆگان بووەتە دەسەڵاتداری یەکەمی تورکیا و تەواوی دەسەڵاتەکانی ئەو وڵاتەی لە دەست خۆیدا کۆکردووەتەوە، دۆخی سیاسی، ئابووری و ئەمنی تورکیای تووشی شڵەژان کردووە، بە جۆرێک نرخی دراوی وڵاتەکەی بەردەوام لە دابەزیندایە، پەیوەندییە سیاسیەکانی تورکیا لەگەڵ، ئەروپا، ئەمریکا و وڵاتانی دراوسێی، ئاڵۆزکردووە.

ئێستا تورکیا گیرۆدەی دوو دۆسێی جیاواز بووە کە لیبیا و سوریان، وڵاتانی جیهان بە دەستوەردان لە کاروباری وڵاتانى دیکە تۆمەتباری دەکەن، لە بەرامبەر ئەو تۆمەتانەدا سەرۆککۆماری تورکیا دەڵێ، ئەگەر خۆیان بێدەنگ بکەن لە ئاست لیبیا و سوریا، ئەوا سبەی باجەکەی دەدەن.

ره‌جه‌ب ته‌یب ئه‌ردۆغان له‌ میانی رێوڕه‌سمی كردنه‌وه‌ی رێگای مه‌نه‌مه‌ن-عه‌لی ئاغا-چاندراڵی له‌ پارێزگای ئیزمیر، وتارێكی پێشكه‌شكرد. ئه‌ردۆگان رایگه‌یاند: سیاسه‌تی توركیا له‌ هه‌مبه‌ر ره‌وشی سووریا و لیبیا بژارده‌یه‌كی نه‌كرده‌یی و بێباكانه‌ نییه "ئه‌گه‌ر ئێستا خۆمان له‌ هه‌ر تێكۆشانێك به‌دوور بگرین له‌ سووریا و لیبیا و ده‌ریای ناوه‌ڕاست و ناوچه‌كه‌مان به‌ گشتی، سبه‌ی قورستر باجه‌كه‌ی ده‌ده‌ین". 

سه‌باره‌ت به‌ دوا پێشهاته‌كانی ئیدلبیش رایگه‌یاند: "دوێنێ له‌گه‌ڵ به‌ڕێز پوتین قسه‌مان كرد، په‌یوه‌ندی ته‌له‌فۆنیم له‌گه‌ڵ ماكرۆن و مێركڵ ئه‌نجامدا. دوای تاوتوێكردنی ته‌واوی ئه‌مانه‌، نه‌خشه‌رێگامان دیارییكرد". 

ئەردۆگان جه‌ختی له‌وه‌ كرده‌وه‌،‌ له‌ هیچ یه‌كێك له‌ هەنگاوەکانیان ناگەڕێنە دواوە "ئه‌و كارانه‌ی كه‌ ده‌ستمان پێكردوون به‌ دڵنیاییه‌وه‌ درێژه‌یان پێده‌ده‌ین و، خوا یار بێت ده‌گه‌ینه‌ ئامانج".