وەزیری رۆشنبیری فەرمانی سڕکردنی كار و چالاكییەكانی گرووپی هونەری ئەستێرەكانی کەلاری راگرت


وەزیری رۆشنبیری بڕیاریدا بە راگرتنی ئەو فەرمانەی كاروچالاكییەكانی گرووپی هونەری ئەستێرەكانی لە كەلار سڕكردبوو.

ژیان_ کەلار: بەپێی نوسراوێك كە واژۆی حەمەی حەمە سەعید، وەزیری رۆشنبیری و لاوانی حكومەتی هەرێمی کوردستانی لەسەرە، بڕیاردرا بە راگرتنی فەرمانی كارگێڕی بەڕێوەبەرایەتی گشتی رۆشنبیری و هونەری گەرمیان ژمارە 153 لە 24/2/2020 (دەربارەی سڕكردنی كاروچالاكییەكانی گرووپی هونەری ئەستێرەكان لە كەلار)"

لە نووسراوەکەدا هاتووە، وەزیری رۆشنبیری بڕیاریداوە لە رێگەی لیژنەیەكی پسپۆڕەوە لەو بابەتە بكۆڵدرێتەوە، دواتر بڕیار لەسەر كاروچالاكییەكانی گرووپەكە دەدرێت.

دوای نمایشکردنی شانۆیەک لە لایەن گرووپی هونەری ئەستێرەكان لە كەلار، بەڕێوەبەرایەتی گشتی رۆشنبیری و هونەری گەرمیان کاروچالاکییەکانی گرووپەکەی راگرت.