هونەرمەند مستەفا ئەحمەد: هاوڕێیەکم لە قەڵادزەوە هاتبووە سلێمانى بۆ پرسەکەم

قۆناغى بەرنامەى بەرنامە بەسەرچووە و نایەتەوە

لە ساڵى 1947 لە شارۆچکەى عەربەت لە دایکبووە. لە سلێمانی خوێندنى سەرەتایی و ناوەندی و ئامادەیی تەواو کردووە. هەر لەرێگەى چالاکى قوتابخانەکانەوە هۆگری نواندن بووە و پەرەى بە تواناکانى داوە. دواتر بەوەتە ئەندامى کاراى تیپى پیشڕەوى شانۆى کوردى و ئەکتەرى درەوشاوەى فیلمەکانى خولەپیزە و خوولەچەخماخە و لانەوازان بووە و دواتریش  یەکێک لە کاراکتەرە سەرەکییەکانى بەرنامەى بەرنامە و کەشکۆڵ بووە. ئەوە وێڕاى بەشدارییکردن لە چەندین بەرهەمى دیکەى تەلە ڤزیۆنى و رادیۆیی.

ژیان: سلێمانى

ژیان: لای تۆش پیريی و هەزار عەیبە؟
مستەفا ئەحمەد:
دایکم بە رەحمەت بێت، هەموو جارێك ئەیوت، خۆزگە لە دونیا پیریی نەبوایە، بەڵام ئیتر ئەمە سوننەتی ژیانە.  ژیان بۆ كەس نامێنێت، مرۆڤیش دەبێت واقیعی بێت و هەر ئەو ڕۆژەی هاتینە دونیاوە بیتاقەی مردنەكە وەردەگرین، پیریش خۆشی خۆی هەیە، سەردەمی منداڵی ‌و گەنجێتی ‌و هەرزەكاری ‌و بەرپرسیارێتی ژیانی خێزانی‌و دواتر پیری، خۆ ئەگەر كەسانی باش بە چواردەورتەوەبن ‌و خزمەتت بكەن، پیرییەكە هەرناخۆش نییە.

ژیان: كاتێك گەنجێتی خۆت لەسەر ستەیج دەبینیتەوە، پێتوایە تەمەن كاریگەری چی لەسەر هونەرەكەت دروستكردووە؟
مستەفا ئەحمەد:
بە نیسبەت هونەرەكەمەوە، دەتوانم بڵێم ئەزموونى پێبەخشیوم، ئەو ساڵانەی گەنج بووم‌و لەسەر ستەیج كارم كردوە، بۆنمونە، من لە گەنجێتیدا هەندێك كاری هونەریم كردبێت، ئەگەر ئێستا ئەو كارانە بكەم بەو شێوەی ئەوسا نابێت، كاری هونەری‌و چەندین كاریی دیكەش هەتا خاوەنەكەی بچێتە تەمەنەوە، شتی زیاتر فێر دەبێت.

ژیان: بۆچی ئێستا ئەوەندە هەواڵی مردنت بڵاو دەبێتەوە هەواڵی چالاكییەكانت بڵاونابێتەوە؟
مستەفا ئەحمەد:
دایكم قسەیەكی دیكەی هەبوو ئەیوت، جام وتویەتی "بشكێم نەك بزڕێم"، مەبەستی لەو كەسانەیە كەناوبانگیان هەیە‌و دەردەكەون و دەبنە بنێشتەخۆشەی ژێر زمانی خەڵك، بەچاك یان بەخراپ باسیدەكەن، ئەو كۆمەڵگایەش هەر شتێك بێت، هەمووی تۆی خۆشناوێت، مەسەلەی حەسادەت‌و غیرە هەیە، هەندێكجار دەچێتە مەسەلەی دڵسۆزیيەوە بۆ ئەو كەسە، یەكێك لەو جارانەی لە سایت ‌و پەیجەكاندا هەواڵی مردنی منیان بڵاوكردبووەوە، یەكێك لە هاوڕێكانم بەناوی عەبدوڵڵا، خۆی‌و ماڵ‌و منداڵی لەقەڵادزێوە هاتبوون بۆ پرسەی من، لە نزیك پیرەمەگروون تەلەفون دەكات بۆ ئەحمەد جۆڵا، دەڵێت ئەوە پرسەی مستەفا ئەحمەد لەچی مزگەوتێكە، ئەویش دەڵێت بگەڕێرەوە، بەوخوایە زیندووە و هیچ كێشەیەكی نییە.

ژیان: زۆرتر بیری كام لەم بەرنامانە دەكەیت، كەشكۆڵ، بەرنامەی بەرنامە؟
مستەفا ئەحمەد:
هەموو چیرۆكی ئەو بەرنامانەی من كارم تێداكردوە، بەوردی بیرم لێكردووەتەوە . ئەو بەرنامە و بەرهەمانە پارچەیەكن لە جگەرم، وەك منداڵەكانم وان و هەموویانم خۆشدەوێت. كەشكۆڵ یان بەرنامەى بەرنامە، بۆ نمونە، خۆشترین‌و باشترین بەرهەم  کە کارم  تێداكردبێت لەسەر شانۆ، شانۆی گوڵەمێخەك بوو كە لەدوای ڕاپەرین پێشكەشمان كرد، ئەو كارە زۆر لام خۆشەویستە.

ژیان: ئەكتەرو هونەرمەندان لەسەرەتای نەوەتەكانەوە ڕەخنەگرێكی زۆر باش بوون لە ئەدای  خراپی حزبەكان، بەڵام دواتر سەنگەرگۆڕین‌و حزبایەتی، بەهاو نرخی كەمكردنەوە، ئەوە ڕاستە؟ 
مستەفا ئەحمەد:
بەڕاستی‌ و ئازایانە قسەبكەین، حزبایەتی، بۆ میللەتی كورد لەو ڤایرۆسی كۆرۆنایە خراپتر بووە، چونكە هەر خەریكی خۆیان بوون، بەنمونە، حزب هەبووە هەموو شتێكی ئەم كوردستانەی بۆ حزبەكەی خۆی ویستوە، ئەمجا لەناو حزبەكەیدا بنەماڵەیەك یان دوو بنەماڵە دەبێت كولفی كول بن. بەڵام هونەرمەندی ڕەسەنیشمان هەبووە، ڕەخنەی خۆیان گرتوە و كاری خۆیان دەكەن.

ژیان: پێتوایە نواندن كاریگەریی لەسەر گەندەڵی‌و خراپبەكارهێنانی دەسەڵات مابێت؟
مستەفا ئەحمەد:
بەڵی، ئەو كارانەی لە ساڵانی ڕابردوو هەبوون، كاریگەرییان لەسەر دەسەڵات هەبووە، زۆربەی ئەو سەركردانانەی ئێستا لەو حزبانەی كوردستان‌ ماون‌و نەماون، موتابەعەی ئەو بەرنامانەی ئێمەیان دەكرد، ئەوەی بزانن چی تێدایە لەسەر ئەوان و چیان پێدەڵێن و چی شتێك ئەوان دەگرێتەوە، بەڵام ئێستا پێموانییە بەو شێوەیە كاریگەریی مابێت.

ژیان: تۆ سەرو ڕیشت لەسەر ستەیج سپی كردووە، شتێك هەیە زۆر دڵخۆشت بكات؟
مستەفا ئەحمەد:
ئەو كارانەی ئێمە لەسەردەمێكدا كردوومانە، لە ماوەی شەست ساڵی كاركردنمدا ، بەناو ئەو هەموو سوڵتە و دەسەڵاتە خراپانەدا تێپەرمان كرد، هیچ كاتێك كارەكانمان بۆ ئەوان نەبووە، هەموو كاتێك كارەكانمان داكۆكیكردن بووە لەمافی ڕەوای میللەتی كورد، لەسەر ئەو زوڵم ‌و زۆرەی لێیكراوە، بێدەنگ نەبووین.

ژیان: كەس لەخێزانەكەت ڕێبازە هونەرییەكەی تۆی هەڵنەبژارد، بۆچی؟
مستەفا ئەحمەد
: منداڵەكانم ئارەزووی كاری هونەرییان دەكرد، چونكە هەرلە منداڵییەوە جاروبار لەگەڵ خۆم بەشداریم پێدەكردن لە شانۆگەری ‌و كارە هونەرییەكاندا، لەم كۆتاییانەدا یەكێك لە كوڕەكانم بەناوی هەڵۆ، لە تەمەنی چل ساڵیدا لە بەشی هونەر دەخوێنێت لە زانكۆی سلێمانی.

ژیان: بەرنامەت هەیە لە دراما و فیلمی نوێ دەربكەویتەوە؟
مستەفا ئەحمەد:
هەتا دوا هەناسە بەردەوام دەبم، هەتا بۆم بكرێت درێخی ناكەم هەوڵدەدەم، ئەوە ماوەی دە ساڵ زیاترە بە بەردەوامی لە ڕادیۆی نەوا بەرنامەیەكی هەفتانەم هەیە، بە بەردەوامی لە بەرنامەی مقۆمقۆ، بەشداریی دەكەم.

ژیان: بەڕاشكاوی ئێستا لەچی پەشیمانی؟
مستەفا ئەحمەد:
لەهیچ كارێكم پەشیمان نیم، چونكە كارێكی وەهام نەكردوە زەرەری بۆ میللەتەم هەبێت، بەڵام كارمان هەبووە  زۆر بەهێز نەبووە لەچاو كاری دیكەدا، دەبێت لەوە پەشیمان بووبم.

ژیان: لە ڤایرۆسی كۆرۆنا دەترسی؟
مستەفا ئەحمەد:
بەهیچ شێوەیەك لە ڤایرۆسی كۆرۆنا ناترسم، ئەوە ژیانە، مرۆڤ، هەموو ڕۆژێك لەشی ساخ نابێت و هەموو ڕۆژێك دەوڵەمەند نابێت هەموو ڕۆژێك هەژار نابێت.

ژیان: ئامادەی جارێكی دیكە لەگەڵ هاوڕێ كۆنەكانت بەرنامەی بەرنامە دەستپێبكەنەوە؟ 
مستەفا ئەحمەد:
كاتی خۆی وتم كوڕینە كە بەرنامەی بەرنامە داخراو بڵاوەمان لێكرد، هیچ هێزێك نییە كۆمان بكاتەوە، بۆیە دەست پێناكەین و ئەو قۆناغە بەسەرچوو و نایەتەوە.