چیرۆكی ئەو بەركەوتەیەی چەكی كیمیاوی لە هەڵەبجە گیانی لەدەستدا


بەركەوتەیەكی دیكەی كیمیابارانی هەڵەبجە گیانی لەدەستدا و بەوەش ژمارەی ئەو بەركەوتووانەی تاوەكو ئێستا گیانیان لەدەستداوە بووە110 كەس.

چۆمان عوسمان
ژیان : سلێمانی

لوقمان عەبدولقادر،سەرۆكی كۆمەڵەی قوربانیانی كیمیابارانی هەڵەبجە، بە (ژیان)ی ڕاگەیاند، دوای ململانێیەكی زۆر لەگەڵ ئازار و نەخۆشییەكەی، بەهۆی سەختی برینەكەیەوە،  دوا نیوەڕۆی ئەمڕۆ هاووڵاتی، زانا محەممەد ساڵح، یەكێك لە بەركەوتووانی چەكی كیمیاوی لە هەڵەبجە، گیانیلەدەستدا.

 ئەو هاووڵاتییە،تەمەنی 43 ساڵە و پێشتر بە مەبەستی وەرگرتنی چارەسەر، ڕووی لە بەریتانیا كردووە.

ئەبەدان سەعید، یەكێك لەهاوڕێ نزیكەكانی  زانا بۆ ژیان وتی،كاریگەری چەكی كیمیاوی بەسەر زۆربەی بەركەوتووانەوە ماوە، "خێزانەكەی زانا بەتەواوی بەر ئەو چەكە كۆمەڵكوژە كەوتوون لە ساڵی 1988."

ئەبدان هەروەها دەڵێ، دایك و باوك و برایەكی دیكەی زانا بەهۆی سەختی بەركەوتنیان بە چەكی كیمیاوی، گیانیان لەدەستداوە، زانا بەشوێن چارەسەریدا دەگەڕا و لە ساڵانێك لەوەوبەر ڕۆیشتە دەرەوەی وڵات بەمەبەستی چارەسەری  لە بەریتانیا چارەسەری وەردەگرت، "بەهۆی لەدەستدانی سیەكانیەوە بە چەكی كیمیاوی ئەمڕۆ گیانی لەدەستدا."

وتیشی،ئێستا دووخوشك و سێ برای دیكەی بەدەست ئازاری بەركەوتنیان بەچەكی كیمیاوییەوە دەناڵێنن، دووبرای لە وڵاتی ئەڵمانیا لەژێر چاودێریی پزیشكیدان كە خۆیان لەسەر ئەركی خۆیان چوونەتە دەرەوەی وڵات.

 تاوەكو ئێستا 900 بەركەوتەی چەكی كیمیاوی لەپارێزگای هەڵەبجە دەژین و  بەردەوام پێویستیان بەدەرمان و چارەسەری پزیشكی  هەیە و 400 لەوانە، پێویستییان بە چارەسەری بەردەوام و ناردنە دەروەی وڵات هەیە.

هەرچەندە نەخۆشخانەی چارەسەركردنی بەركەوتووانی چەكی كیمیاوی لە هەڵەبجە تەوابووە، بەڵام هیچ بەركەوتەیەك تائێستا لەو نەخۆشخانەیە  چارەسەر نەكراوە، لە دوای ساڵی 2003 وە هەزار و 110 كەس گیانیان لە دەستداوە.