تەندروستی سلێمانی رێگا چارەی دابەشكردنی مووچە ئاشكرا دەكات

سەباح نەسرەدین هەورامی، بەڕێوەبەری گشتی تەندروستی سلێمانی

تەندروستی سلێمانی رێگاچارەی دابەشردنی مووچەی فەرمانبەران دەداتە حكومەت و داواش دەكات قەدەغەكردنی هاتوچۆ تا ناوەڕاستی مانگی داهاتوو بەردەوام بێت، ئەو دەرمانەشی زۆرتر بۆ نەخۆشانی كۆرۆنا بەكار هاتووە ئازار شكێن بووە. 

ژیان- دەنگی ئەمریكا: سەباح نەسرەدین هەورامی، بەڕێوەبەری گشتی تەندروستی سلێمانی، رایگەیاند " بەپێی هەموو پێوەرە زانستیەكان سلێمانی ئەو شارەیە كەدەبێت زۆرترین حاڵەتی تێدا ڕوبدات لەتوشبوون بە كۆرۆنا. "

ناوبراو ئاشكرای دەكات "پێشنیارمان بۆ حوكمەت كردووە تا 15/4 كەرەنتین و قەدەغەكردنی هاتوچۆ بەم شێوە چڕەی ئێستا بەردەوام بێت وە ڕێگای هاتوچۆ بگیرێت بەم شێوەیەی ئێستا كەهەیە، لەدوای 15/4 ە وە بەقۆناغ ژیان دەست پێبكرێتەوە، ئەگەر حكومەت داوا لە ئێمە بكات ئێمە ڕێ و شوێنی تەندروستیان دەدەینێ چۆن مووچە دابەش بكات وە لەڕووی هونەرییەوە پێم وانیە ئەركێكی قورس بێت ئەگەر مەبەستیان بێت دەتوانن جێ بەجێی بكەن تا قەدەغەكردنی هاتوچۆ نەبێتە ڕێگری دابەشكردنی مووچە".

بەڕێوەبەری تەندروستی سلێمانی رەتیدەكاتەوە جیاوازی لە نێوان سلێمانی و هەولێر بكرێت لە ژمارەی پشكنینەكاندا و دەڵێت "ئەو قسانە ڕاست نین كەدەڵێن جیاوازی دەكرێت لە نێوان سلێمانی و هەولێر، ئەو كەسانەی ئەو قسانە دەكەن هیچ پەیوەندییان بەناوەندەكانی تەندروستیەوە نیە، ئیشی ئەوانیش نیە".

سەباح هەورامی دەشڵێت "ئەو كەسانەی لەسلێمانی هەڵگری ڤایرەسی كۆرۆنا بوون دوو جۆرن ئەوانەی نیشانەكانیان لێی دەركەوتووە، وە ئەوانەشی نیشانەكانیان لێ دەرنەكەوتووە بەگشتی حاڵەتەكان قورس نەبوون تا ئێستا وە چارەسەری قورسیشمان بەكارنەهێناوە ئەوەی بەكارمان هێناوە زیاتر پاراسیتۆڵ بووە بۆ ئەوانەی (تا) یان بەرز بۆتەوە".

بەڕێوەبەری تەندروستی سلێمانی لە دیدارێكی رۆژنامەوانیدا ئەوەشی وت" لە ئێستادا بارودۆخ لەسلێمانی جێگیرە بەڵام ئێمە ترسی داهاتوومان هەیە، پێشتر وتمان نزیكەی یانزە هەزار كەس بەقاچاغی هاتبونەوە و پشكنینیان بۆ نەكراوە وە لە ئێستاشدا پاش بڵاوبونەوەی نەخۆشیەكە لە وڵاتانی ئەوروپا ژمارەیەكی زۆر لەخەڵكی گەڕانەوە بۆ كوردستان بۆیە ئێستا ئەو دوو شوێنە (ئێران و وڵاتانی ئەوروپا) دوو سەرچاوەی بڵاوبونەوەی نەخۆشیەكانن لەكوردستان". 

ئەو بەرپرسەی تەندروستی زۆری ژمارەی توشبووان لە شارەكەی روندەكاتەوە و دەڵێت "بەپێی هەموو پێوەرە زانستیەكان سلێمانی ئەو شارەیە كەدەبێت زۆرترین حاڵەتی تێدا ڕوبدات لەتوشبوون بە كۆرۆنا بەهۆی ئەو ژمارە زۆرەی پێشتر ئاماژەم پێكرد كە بەقاچاغی گەڕاونەتەوە بەتایبەتی لە ئێرانەوە، بۆیە ئەوەی كە دەڵێت بارودۆخی سلێمانی خراپە ڕاستە، هەرلەبەر ئەوەیە ئێمە وەك بەڕێوەبەرایەتی تەندروستی سلێمانی هەموو هەوڵی خۆمان خستۆتەگەڕ، بەڵام ئەوەش ڕاستە بەهۆی هەوڵ و توانای بەردەوامی پزیشكان و كارمەندانی تەندروستیەوە ژمارەیەك توشبوو چاكبونەتەوە و تا ئێستا بارودۆخەكە كۆنترۆڵە بەڵام لەگەڵ ئەوەشدا ترسمان هەیە."

هەورامی ئاشكرای دەكات "ئەگەر حكومەت داوا لە ئێمە بكات ئێمە ڕێ و شوێنی تەندروستیان دەدەینێ چۆن مووچە دابەش بكات وە لەڕووی هونەرییەوە پێم وانیە ئەركێكی قورس بێت ئەگەر مەبەستیان بێت دەتوانن جێ بەجێی بكەن هەم بەڕێگای حسابی بانقی- یان تیمی مۆبایل -یاخود لەڕێگای پۆلێن كردنی فەرمانبەران دەتوانن هەر ڕۆژە و ژمارەیەكی دیاریكراو خەڵك بچن مووچە وەربگرن، بۆ نمونە من فەرمانگەیەكم هەیە پێنج سەد مووچە خۆری تێدایە ئەگەر بمەوێت موچەیان بدەمێ ڕۆژی مووچەی سەد كەس دەدەم وە ئەو سەد كەسەش دابەش دەكەم بەسەر كاتژمێرەكاندا بۆ نمونە دەڵێم ئەوكەسانەی بە پیتی (ئە) دەست پێدەكەن بەیانی كاتژمێر نۆتایانزە بێن وە دوای ئەوە بەپێی پیت بەسەر كاتژمێرەكاندا دابەشیان دەكەین واتە میكانیزم هەیە بۆ ئەوەی نەهێڵن قەرەباڵغی دروست بێت هەر لەسەر ئەو بنەمایەشە كە ئێمە دەڵێین بەبەرنامە ژیان دەست پێبكرێتەوە بۆ نمونە قەیسەریەك لەبازاڕدا سێ سەد دوكانە حكومەت دەتوانێت ناچارییان بكات هەر ڕۆژەی پەنجا دوكانیان بەنۆرە بكرێتەوە واتە ئەو بازاڕەش ناوەستێت خەڵك ئیش و كارەكانی دەڕوات و قەرەباڵغیش دروست نابێت."