بەهۆی گاڵتەكردن بەهێڵە گەرمەكەی كۆرۆناوە ئاسایش كەسێكی دەستگیركرد


ئاسایشی پارێزگای سلێمانی ڕایدەگەیەنێت،كەسێكیان دەستگیر كردووە كە بۆ گاڵتەپێكردن پەیوەندی بە هێڵی گەرمی ژمارە 122 كردبوو. 

ژیان_سلێمانی: ئەمڕۆ پێنج شەممە 26ی ئاداری 2020 ئاسایشی سلێمانی لە راگەیەندراوێكدا دەڵێت، شەوی 24-3-2020 هاووڵاتیەكی  دانیشتووی دووكان پەیوەندی بە هێڵی گەرمی ژمارە 122 تایبەت بە رووبەڕووبوونەوەی ڤایرۆسی كۆرۆناوە كردووە و پێی وتوون لە ئێران گەڕاوەتەوە وتووشی كۆرۆنا بووە، دوای بەدەنگەوەچوونی كارمەندانی تەندروستی، پەیوەندی پێوەكراوە و خۆی لێكردوون بەئافرەت، كارمەندانی تەندروستیش بۆیان دەركەوتووە ئەوكەسە فریوی داون و بۆ گاڵتەپێكردن پەیوەندیی پێوەكردوون. 

ئاسایشی سلێمانی ئاشكرایدەكات،دوای ئەوەی لەلایەن هێڵی گەرمی تایبەت بە كۆرۆناوە ئاگاداركراونەتەوە، ئەوانیش بەپێی فەرمانی دادوەر و بەگوێرەی ماددەی دووی یاسای خراپ بەكارهێنانی ئامێرەكانی پەیوەندیكردن كەسەكەیان دەستگیركردووە، كەسەكە دانی بەوەدا ناوە كە ئەو پەیوەندییەی تەنیا بۆ گاڵتەپێكردن كردووە و داوای لێبووردنی لە كارمەندانی تەندروستی و هێڵی گەرمیی ژمارە 122 كردووە.

هێڵی گەرمی تایبەت بە رووبەڕووبوونەوەی كۆرۆنا دوای بڵاوبوونەوەی ڤایرۆسەكە لە هەرێمی كوردستان كەوتە كار، چەند راوێژكارێكی پزیشكی وەڵامی ئەو كەسانە دەدەنەوە كە پەیوەندی بە هێڵەكەوە دەكەن و راوێژیان دەدەنێ لەبارەی ڤایرۆسی كۆرۆناوە ئەگەر نیشانەكانی ڤایرۆسەكە لەو كەسەدا هەبێت كە پەیوەندی كردووە تیمەكانی تەندروستی لێ ئاگاداردەكرێتەوە و رێكاری پزیشكی بۆ دەگیرێتەبەر.