لەبارەی رژانی گازی سارینەوە روونكردنەوە دەدرێت


بەرگری شارستانی پارێزگای هەولێر ڕایگەیاند، لەبارەی رژانی گازێكی ترسناك لەناوچەكانی هەرێمی كوردستان،زانیاری نادروست بڵاوكراوەتەوە وسەرلەبەری ئەو هەواڵانە ڕەتدەكەینەوە.

ژیان_هەولێر: لەروونكردنەوەكەی بەرگری شارستانی هەولێر دەڵێت،هەوالێك بڵاوبووەتەوە گوایە لەماوەی ٤٨ كاتژمێری داهاتوودا گازێك بڵاودەبێتەوە،سەرلەبەری ئەم هەواڵە دوورە لەراستی تەنها پروپاگەندەیە لەسۆشیال میدیا.

بەرگری شارستانی، باس لەوەش كردووە، بەپێچەوانەوە ئەم 48 كاتژمێرە كەلەلایەن وەزارەتی ناوخۆ و وەزارەتی تەندروستی دانراوە بۆ خۆپاراستن و دانانی میكانیزمی نوێ بۆ قەدەغەی هاتووچۆ، بۆیە دڵنیاتان دەكەینەوە پێویست بە شڵەژان ناكات هەواڵەكە دوورە لەراستی.

دوو رۆژە هەوالێك لە هەندێك پەیجی سۆشیال میدیا بڵاوكراوەتەوە كەگوایە گازێكی ژەهراوی لەهەرێم دەڕێژرێت، ئەم هەواڵانە دوورن لەراستیەوە.

لەلایەكی دیكەوە سریەی بەرگری كیمیاوی وەزارەتی پێشمەرگە،لە ڕاگەیەندراوێكدا دەڵێت، دەنگۆی بەكارهێنانی گازی سارین لەعیراق و كوردستان و ئێران لە لایەن وڵاتە زڵهێزەكانەوە درۆیەكی شاخدارە، و ئەسل و ئەساسی نیە.

گازی سارین GB - Sarin و چەند زانیارییەك
دەنگۆی بەكارهێنانی گازی سارین لە عیراق و كوردستان و ئێران لە لایەن وڵاتە زڵهێزەكانەوە درۆیەكی شاخدارە، و ئەسل و ئەساسی نیە.
گازی سارین گازێكی كیمیاویە، بەشێوەی شل و غازیش هەیە، كاریگەری لە سەر دەمار و مێشك (ئەعساب)ی مرۆڤ دەكات، ئەم گازە وەك چەكێكی كیمیاوی دادەندرێت لە بواری سەربازیدا، لەسەر ئاستی جیهان بە چەكێكی كۆمەڵكوژ دادەندرێت و قەدەغەیە بەكاربهێنرێت. لە ساڵی ١٩٣٨ لە ئەڵمانیا بۆ یەكەم جار دۆزرایەوە.
گازی سارین بێ بۆن و بێ تام و بێ رەنگە، لە هەوا قورسترە و لە شوێنە نزمەكان دەمێنێتەوە، توانای بڵاوبوونەوەی زۆری نیە، بۆ خۆپاراستن لێی باشترە بچێتە شوێنە بەرزەكان نەك لە ژوورەوە خۆی حەشاربدەی.
هەڵمژینی ئەم گازە یان بەرپیست كەوتنی دەبێتە هۆی تێكدانی مێشكی مرۆڤ، و وەستانی دڵ و كۆئەندامی هەناسە، نیو میلیگرام بەسە بۆ كوشتنی كەسێك.
نیشانەكانی بەركەوتووی گازی سارین:
شەلەل، گرژبوونی ماسولكە، ژانە سەرێكی زۆر، فراوانبوونی بیلبیلەكانی چاو، ئارەقەكردن، تشنج، كۆكە و تەنگە نەفەسی، ئاوی لووت و فرمێسكی جاو، سوتانی پیست، مێزكردن و سكچوون و ڕشانەوە، خێرایی لێدانی دڵ ... لە ئەنجامی هەموو ئەم كاریگەریانە، دەبێتە هۆی مردنی مرۆڤ و گیانلەبەران.
بۆیە، بەهیچ شێوەیەك گازی سارین توانای بلاوبوونەوەی نیە لە مرۆڤێك بۆ مرۆڤێكی تر وەك ڤایرۆسی كۆرۆنا. ئەوەی كەمێك شارەزایی هەبێت دەزانێت جیاوازی نێوان گازە كیمیاوییەكان و ڤایرۆس چیە، ئەگەر گازی سارین دژی شارێك بەكاربهێنرێت دەستبەجێ شارەكە هەموی وێران دەبێت خەلكێكی زۆر دەمریت، نەك لە كەسێكەوە بۆ كەسێكی تر بگوازرێتەوە. 
بەداخەوە، هەندێك پەیچ و ئەكاونت بۆ دەستهێنانی لایك و كۆمێنت ئەم جۆرە پۆستە درۆیانە بڵاودەكەنەوە بۆ ترساندنی خەلك.
لێرەوە، داوا لە پیشمەرگە قارەمانەكان و برا پۆلیس و ئاسایش دەكەین بەردەوام بن لە جێبەجێكردنی رێنماییەكان ھیچ مەترسیەك لەسەرتان نیە، ئەو ھەواڵانەی بڵاودەكرێنەوە راست نین و ھیچ بنەماییەكی زانستی نیە.
شایەنی باسە، گازی سارین لە لایەن ڕژێمی سەدام حسین لە شاری هەڵەبچەی شەهید بەكارهێنرا، هەروەها بەپێی زانیارییەكان ڕژێمی بەشار ئەسەد دژی خەلكەكەی خۆی بەكارهێنا.
تكایە پابەندبن بە ڕێنماییەكان
سریەی بەرگری كیمیاوی وەزارەتی پێشمەرگە
4 ی نیسان 2020