خۆپیشاندانەكانی عێراق! شیعە لەدژی شیعە

شاسوار هەرشەمی

نزیكەی تێكڕای ئەوانەی كەلەم چەند ڕۆژەدا، هەواڵی خۆپیشاندانی بەغدا‌و شارەكانی دی خواروی عێراق بڵاو دەكەنەوە یان لێكدانەوەی بۆ دەكەن، بەخۆپیشاندانی عێراقیەكان ناوزەدیان كردووە.

تا ئێستاش خۆپیشاندانەكان، شێوەیەكی زەقی گائیفییان هەیە‌و تەنیا شیعە، یان هەندێك دەستەی شیعەن، كەلە شارە شیعە نشینەكاندا، هانی ڕەشۆكی خەڵكی شیعە دەدەن، دژی ئەو شیعانەی باڵەكانی حیزبی دەعوە، كەلە دوای ڕووخانی سەدامەوە‌و تا ئێستا دەستەڵاتیان لەدەست دایە.

هەتا ئێستا هیچ شارێكی عارەبی سوننەی وەك: ڕومادیی، فەللوجە، سامەڕا، تكریت، موسل بەشداری دەربڕینی ناڕەزایەتییەكانیان نەكردووە. ئەو وردە خۆپیشاندانەی كەركوكیش، تەنیا هەندێك عارەبی شیعەی هێندراو بۆ شارەكە كردیان. حەویجەییەكان‌و توركمان‌و كوردیان لەگەڵ نەبوو. 

ئامانجە نادیارەكانی پشت هاندانی ناڕەزایەتیەكان، بریتیە لەلادانی دەستەیەكی شیعە‌و هاتنی دەستەیەكی دی شیعە

هەروەك تا ئێستاش، ئەجێندای خۆپیشاندانەكە نادیارە. بەدڵنیایی، بەشی هەرە زۆری خۆپیشاندەران، كەسانی بێكار‌و برسین‌و لەو دەستەڵاتە ناڕازین. بێگومان هەموو داخوازی ئەم جۆرە كەسانەش، داخوازی ڕەوای كۆمەڵایەتیی‌و سیاسیین. هەمیشەش هەر وابووە، كەكەسانی لەمجۆرە دەبنە كورەی ڕاپەڕین‌و بەئاسانی ئاراستە دەكرێن.

كێ لەپشت ئاراستە كردنی خەڵكە؟

بە گومانی هەرە زۆر، ئامانجە نادیارەكانی پشت هاندانی ناڕەزایەتیەكان، بریتیە لەلادانی دەستەیەكی شیعە‌و هاتنی دەستەیەكی دی شیعە. لەوانەیە موقتەدا صەدر، قەناعەتی هاتبێت كەكاتی ئەو هاتووە‌و دەتوانێت دەستەڵاتێكی تۆتالیتێر، بەناوی مەرجەعیەت دابمەزرێنێت‌و بەكەمێك خۆ دوور خستنەوە لەئێران‌و نزیك كەوتنەوە لەدەوڵەتانی عارەبی كەنداو، بتوانێت خۆی بگرێت. 

بێگومان بەعسیەكانیش، وەك هەمیشە، لەڕێگای كەناڵی (الشرقیە)‌و ژمارەیەكی دی لەكەنالی ئاسمانی‌و سایتەكانی ئینتەرنێتی بەعسیەكان، لەئیمارات، ئوردەن‌و توركیا، هانی خۆپیشاندەران دەدەن‌و ڕووداوەكانی ناوی، بەئاراستەیەكی وەگەنی‌و ناگائیفی لێكدەدەنەوە، بەو نیازەی لەمەلەی ناو ئەو ئاوە شێلوەدا، جارێكی دیش بتوانن بگەڕێنەوە سەر دەستەڵات.

جارێ زۆر زووە، بتوانین دەرەنجامێكی باشتر لەوەی سەرەوە، لەخۆپیشاندانەكان‌و ناڕەزایەتییەكان وەدەست بێنین.




تۆڕی هەواڵی ژیان بەرپرس نییە لە ناوەڕۆکی ئەم نوسینە