عادل عەبدولمەهدی دەرگای بەڕووی دۆزەخدا كردەوە

هەڵۆ ئەبوبەكر

بەدەست لەكاركێشانەوەی عادل عەبدولمەهدی، سەرۆك وەزیرانی عێراق، عێراق دەچێتە قۆناغێكی هەستیارەوە نەسەرەتاكەی دیارە‌و نە كۆتاییەكەی، دیار نیە بەومانایەی هەموو شتێك لەعێراقدا بەدۆخێكی ناهەموار‌و نادیار‌و ئاڵۆزدا تێپەڕدەبێت، هیچ كەس‌و لایەنێك ناتوانێت مەزەندەی داهاتویەكی باش بۆ عێراق بكات.

دەست لەكاركێشانەوەی عادل عەبدولمەهدی، لەژێر فشاری خۆپیشاندەراندا هەنگاوێكی ئەرێنیە تەنها وەك شتێكی رەمزی، بەتایبەت لەمێژوی عێراقدا یەكەمجارە سەرۆك وەزیرانێك خۆی دەستلەكاربكێشێتەوە، بەڵام پرسیارەكە ئەوەیە دەستلەكاركێشانەوەی مەهدی چی لەدۆخی عێراق دەگۆڕێت؟

پێش هەرشتێك عادل عەبدول مەهدی بوو بەقوربانی، ئەو ئەگەرچی لەسەرەتادا وەك چەتری كۆكەرەوەی سەرجەم لایەنە سیاسیەكان‌و پێكهاتەكانی عێراق دەركەوت  كاتێك هێز‌و لایەنە سیاسیەكان نەدەگەیشتن بەرێكەوتن لەسەر یەكلاكردنەوەی كەسێك بۆ پۆستی سەرۆك وەزیران، بەڵام لەهەمان كاتیشدا چاوەڕێكراوبوو رۆژی بەم رۆژە بگات، بەتایبەت ئەو نوێنەرایەتی هیچ هێز‌و لایەن‌و فراكسیۆنێكی پەرلەمانی نەدەكرد، ئەوەش لەعێراقدا كاری نەكردەیە، تۆ بتوانیت لەسەر كورسی سەرۆك وەزیران بمێنیتەوە، بەبێ ئەوەی نوێنەرایەتی پێكهاتەیەك، لایەنێكی سیاسی بكەیت.

عادل عەبدول مەهدی بوو بەقوربانی

هەرچۆن بێت عادل عەبدولمەهدی، بەدەستلەكاركێشانەوەی دەرگا ی بەڕووی بوركانێك لەكێشەدا كردەوە، لەراستیدا ئەوە دروسترین هەنگاو بوو سەرۆك وەزیران هەڵیگرت بۆ خۆی، بەو پێیەی لەماوەی دوو مانگی رابردوودا رووی ناڕەزاییەكانی خۆپیشاندەران لەعادل عەبدولمەهدی بوو، بەڵام لەم ساتە بەدواوە هیچ لایەن‌و سەركردە‌و تەنانەت مەرجەعیەتیش پارێزراو نیە لەبەردەم توڕەیی‌و ناڕەزایی خۆپیشاندەراندا، بەمانایەكی تر خواست‌و داواكاری خۆپیشاندەران بەرزتر دەبێتەوە‌و لەمەودوا داوای دەستلەكاركێشانەوەی یەك لەدوای یەكی سەرۆكایەتیەكانی عێراق دەكەن‌و چاوەڕێ ناكرێت بەوەش بوەستن.

لەم دۆخەدا دەكرێت چاوەڕێی چ داهاتویەك بۆ عێراق بكەین؟ بێگومان كەس نیە پێشبینی داهاتویەكی باش بۆ عێراق بكات، عێراقێك بۆتە ناوەندی ململانێی ئەمریكا‌و ئێران‌و عێراقێك ناوماڵی شیعەی دەسەڵاتدار پەرتەوازەیە‌و ماڵی سوننە زامدارە ناكرێت پێشبینی داهاتویەكی باشی بۆ بكرێت، كورد دەڵێت" لەم قوڕە هەر ئەو تۆزە هەڵدەستێت"، ئەم پەندە هاوكاریمان دەكات بۆ ئەم دۆخەی عێراق ناكرێت چاوەڕێ بكەین لەعێراقدا كەسانێك بێنە سەر حكوم نمونەی حكومەتێكی لیبراڵی دیموكراسی مەدەنی بێت.

توڕەیی خۆپیشاندەران بەئاسانی لەعێراقدا دانامركێتەوە، عێراق رووبەرووی مەترسی گەورەتر دەكاتەوە، ئێستا لەهەركات زیاتر عێراق لەبەردەم ئەوەدایە بەرەو شەڕی تائیفی‌و ناوخۆیی هەنگاو بنێت، تەنانەت بەدوور نازانرێت جارێكی تر لەعێراقدا كودەتا رووبدات‌و دەسەڵاتی سەربازی حوكمی عێراق بگرێتەوە دەست، ئێستا ژینگەی عێراق لەهەركات لەبارترە بۆ زیندووبونەوەی رێكخراوە تیرۆرستیەكان‌و بەتایبەت داعش، ئێستا لەهەركات لەبارترە بۆ بەهێزكردنی دەسەڵاتی میلیشیا شیعیەكان لەبەرامبەر دەسەڵاتی سوپا‌و هێزە ئەمنیەكانی حكومەتی عێراقدا.

هەرچی لەعێراقدا رووبدات، لەو راستیە ناگۆڕێت، لەبنەڕەتدا عێراق وەك دەوڵەتێكی یەكگرتووی خاوەن ناسنامەیەكی هاوبەش بونی نەبووە

بەمانایەكی تر عێراق تادێت دەسەڵاتی حكومەت‌و دامەزراوەكانی لاواز دەبێت لەبەرامبەر  دەسەڵاتی حیزب‌و میلیشیا‌و گروپە چەكدارەكان‌و هێزە ئیقلیمی‌و نێودەوڵەتیەكان، ئەوەش وادەكات شەڕی بەرژەوەندییەكانی ئەو لایەنانە عێراق بسوتێنێت.

ئەوەی گرنگە‌و تازەیە لەخۆپیشاندانەكانی ئەم دوو مانگەی عێراقدا ئەوەیە، هێزە سیاسیەكان، سەركردە سیاسیەكانی ئێستای عێراق، تەنانەت مەرجەعیەت‌و ناوەندە ئاینیەكان، هەمویان كەوتونەتە بەر توڕەیی خۆپیشاندەران، بەڵام پرسیارەكە ئەوەیە بەدیلی هەموو ئەو شتانە چیە خۆپیشاندەران رەتیدەكەنەوە؟ ئەوە كێشە سەرەكیەكەیە هیچ بەدیلێك لەعێراقدا ئامادە نیە، ئەنجام هەر ئەو كەسانە دێنەوە سەر دەسەڵات گەلی عێراق لەدوای 2003 وە ئازارییان بەدەستەوە دەچێژن‌و بەپێچەوانەی چاوەڕوانیەكانیانەوە عێراقی دوای بەعس نەبوو بەو بەهەشتەی چاوەرێیان دەكرد.

هەرچی لەعێراقدا رووبدات، لەو راستیە ناگۆڕێت، لەبنەڕەتدا عێراق وەك دەوڵەتێكی یەكگرتووی خاوەن ناسنامەیەكی هاوبەش بونی نەبوە، هەموو ئەو كەسانەش بەهەڵەدا دەچن پێیانوابێت عێراق بەم پێكهاتەیەی ئێستاوە داهاتویەكی دەبێت، لەراستیدا ئەو عێراقەی سەد ساڵ پێش ئێستا بەخواستی ئیمپریالیزمەكان دروستكرا، وڵاتێكی دەستكردە‌و لەهەركاتێكدا بێت دەبێت هەڵبوەشێتەوە، بۆیە پێشبینی هیچ داهاتویەكی جێگیر بۆ عێراق ناكرێت.





تۆڕی هەواڵی ژیان بەرپرس نییە لە ناوەڕۆکی ئەم نوسینە