یەكێتی ئیهمالترین حزب

هاوكار قادر

یەكێتی وەك ئەوەی بڕیاری لێداوە بەنیازە ئەگەر گونجا و تێكی نەدەن ئەوا لەم نزیكانەدا كۆنگرەی چوارەم ببەستێت، لە وەرزێكدا كە بەرەو بەستن دەڕۆین و حزبەكەش خۆی لە دۆخی بەستوییدایە.

یەكێتی 45 ساڵ لەمەوبەر لە هاوینێكی گەرمدا لەدایكبوو، گەرموگوڕی وەرزەكە تێكەڵ بە گەرموگوڕی هێز و باوەڕی بوو، بەڵام وەك هەر بونەوەرێكی دیكە لەگەڵ هەڵكشانی تەمەنی، بەرەو سستی و ساردی و سڕی هاتوە، تەماشای هەندێك پلە و پایە مەكە، كە هەر چۆنێك بێت بەدەستیهێناوە لەناو حوكمڕانیی هەرێم و عیراقدا، بەڵكو تەماشای هەناوی بكە، لە پێگەی جەماوەری بڕوانە، لە ناوەندە گرنگەكانی سێكتەرەكانی كۆمەڵگە بڕوانە، بزانە پێگەكەی ها لە كوێ؟

پێویست ناكات لەم كورتە نوسینەدا بچینە داتا و ئاماركاری و لێكدانەوە بۆ دۆخەكەی بكەین، كە هۆكارەكانی پاشەكشێی زیاتر خۆكرد و ناوخنین و یەكەم و ئاخیر هەر خودی سەركردایەتییەكەی لێی بەرپرسن، ئینجا ئەو كەسانەی كە دەسەڵاتیان كەم تا زۆر بۆ شۆڕكراوەتەوە و چۆن بەكاریانهێناوە و لە بری خزمەت و نیعمەت، چۆن بونەتە بەڵا و نەگبەتی بۆ خودی حزبەكە و كۆمەڵگەی كوردستانیش. ئەگەر كۆنگرە ببێتە وێستگەیەك بۆ لێپرسینەوە و پاداشت و سزا بۆ خراپەكاران ئەوا كۆنگرەی چوارەم باشترین دەرفەتە رەش و سپی تێدا بخرێتەڕو، ئەگەر وەك دۆخەكەش درێژەپێدەری ئەوەی رابردو بێت، ئەوا هەر ئیهمالی لێ چاوەڕوان دەكرێت.

 ئەگەر كۆنگرە ببێتە وێستگەیەك بۆ لێپرسینەوە و پاداشت و سزا بۆ خراپەكاران ئەوا كۆنگرەی چوارەم باشترین دەرفەتە رەش و سپی تێدا بخرێتەڕو

ئیهمالییەكی دیكەی یەكێتی، كە بە جدی دەبێت لە كۆنگرەدا حسابی تایبەتی بۆ بكرێت، دڵگرانی و دوركەوتنەوە و پشتگوێخستن و پشت تێكردنی ئەو لەشكرە كادر و چالاكوانەیە، كە بەدرێژایی ساڵانی پاشەگەردانی لە یەكێتی دورخراونەتەوە یان بوغزێنراون و لە بَزاریدا رایانكردوە لە دەست بەرپرسی نا بەرپرس و نەبونی پاداشت و سزا.

ئیهمالییەكی دیكەی یەكێتی پشتگوێخستنی كادری راگەیاندن و بیر و هزرە و روناكبیریی و رۆشنبیرییە

لەوەش خراپتر، كە یەكێتی بە ئیهمالترین حزب تێیدا دەردەكەوێت، پشتگوێخستنی كادری راگەیاندن و بیر و هزرە و روناكبیریی و رۆشنبیرییە، لە بری ئەوەی بەشی هەرە زۆری توانا و پارە و داهات و بایەخی بۆ ئەو كادرانە تەرخان بكات، كە مام جەلال بە خەباتكارانی بیر و هۆشیاری ناوی دەبردن، هەموو تەركیزی خستوەتەسەر عەشیرەت و هۆز و چەكدار و قەرەباڵغی دیوەخانەكان، لەكاتێكدا یەكێتی لە دروستبونیدا هەم بایەخی بەو لایەنانەی كۆمەڵگە دا و هەم شۆڕشێكی فیكری بوو، ئێستا كڵۆڵترین راگەیاندنی هەیە و بێ نازترین كادری میدیاكاری هەیە.




تۆڕی هەواڵی ژیان بەرپرس نییە لە ناوەڕۆکی ئەم نوسینە