بزوتنەوەی گۆڕان: شكستی نوخبەیەكی سیاسیی نوێ

مەریوان وریا قانع و ئاراس فەتاح

گەرچی دواھەمین ھەڵبژاردنی پەرلەمان یەكێكە لە ڕووداوە سیاسییە گرنگەكانی دونیای دوای ڕاپەڕین، كەچی بەدەگمەن نەبێت گفوگۆیەكی عەقڵانیی لەبارەوە نەكرا. بایكۆتكردنی بەرفراوانی ئەم ھەڵبژاردنە ڕووداوێكی سیاسیی گرنگ بوو. پەنابردنی گەورە و سیستماتیكیش بۆ تەزویر، بۆ ڕزگاركردنی وێنەی ھەڵبژاردنەكە و بۆ درێژەدان بە دەسەڵاتی دوو پارتە سیاسییە باڵادەستەكە، لانیكەم ئەوەمان پێدەڵێت كە ئەم دوو ھێزە، نەك تەنھا متمانەی سیاسیی و ئەخلاقیی خۆیان لەناو كۆمەڵگای ئێمەدا لەدەستداوە، بەڵكو ھێما بۆ لەدایكبوونی دۆخێكیش دەكات كە ھیچ دیماگۆگییەت و درۆیەكی سیاسیی لەناویدا ناتوانێت خۆی وەك ھەقیقەت بە كۆمەڵگا بفرۆشێت. گرنگ نییە ئەو درۆ و دیماگۆكییە لە كوێوە دێت، لە ھێزە حوكمڕانەكانەوە یان لەو ھێزانەوە كە سەردەمانێك ئۆپۆزیسیۆن بوون. ئەمڕۆ درۆی سیاسیی وەك درۆیەكی بێدەمامك و ڕووت، وەك درۆیەك كە ھیچ گوتارێك ناتوانێت ڕزگاریبكات، كەوتۆتە ناو ڕووبەری گشتیی كۆمەڵگای ئێمەوە.

لەسەرێكەوە ئەوەی دەیبینین دروستبوونی كۆمەڵگایەكە لە ڕێگای تەڵاقدانی سیاسەتەوە لە بۆشاییەكی سیاسیی گەورە و ترسناكدا دەژیی و خەمێكی مێژوویی ڕاستەقینە بۆ دروستكردنی ”ژیانی گشتیی“ عەقڵانیی لەئارادا نەماوە. لەسەرێكی دیكەوە جۆرێك لە گیرخواردنی قووڵ و ھەمەلایەن بەدەست تەفاسیلە ڕۆژانەییەكانی ئیشكردنی كایەی سیاسەتەوە لە كۆمەڵگای ئێمەدا لەئارادایە. لە فۆرمی ئێستایدا سیاسەت نەك توانای چارەسەركردنی ھیچ كێشەیەكی لە كوردستاندا نەماوە، بەڵكو خۆشی بووە بە ئامرازی بەرھەمھێنانی كێشەی نوێ و ترسناك، ھەم بۆ ناو كایەی سیاسیی خۆی و ھەم بۆ كۆمەڵگاش. لەوانە بۆ نموونە، ململانێی نێوان منداڵانی خێزانە سوڵتانییەكان لەگەڵ باوكان و پیرەكانی ناو حیزبدا و ململانێیان لەنێوان خۆیاندا و ململانێشیان لەگەڵ منداڵانی خێزانە سوڵتانییەكانی تردا. ئەم ململانێ تازەیە بووە بە یەكێك لەو كێشە سەرەكیی و گەورانەی كە ڕووبەڕووی ئەمڕۆكەی كۆمەڵگای ئێمە بوەتەوە: كێشەی چەسپاندنی تەواوەتی تەوریس و سوڵتانیزمی سیاسیی. ئەم پرۆژەی ”دەستگۆڕكێ“ ناوەكییەی ناو دەسەڵات لەنێوان منداڵەكان و پیرەكاندا، ڕەنگە نەتوانێت بەبێ پێكدادان و شەپۆلێكی گەورە لە توندوتیژی تێپەڕێت، ھاوكات چەندەھا دابەشبوونی تازە دەخاتە ناو كۆمەڵگای ئێمەوە و بڕێكی زۆریش لە دابەشبوونە كۆن و تەقلدییەكان توندتر و تۆختر دەكاتەوە. منداڵەكان لەم ساتەدا لە پرۆسەی دروستكردنی لەشكری تایبەت و میدیای تایبەت و پێگەی ئابوریی و سیاسیی تایبەت بەخۆیاندان، خەریكی گەشەدانن بە پەیوەندیی ئیقلیمیی و نێودەوڵەتیی تایبەت و لەناو حیزبیشدا باڵی تایبەت بە خۆیان دروستدەكەن. ھەموو ئەمانەش بە كۆمەڵێك تەماحی سیاسیی قەبەوە گرێدەدەن، كە ئابوریی لێڵ و تاریكیی نەوت و بەكۆمپانیاكردنی كۆمەڵگا و بازرگانیكردن بە ھەمووشتێكەوە ژێرخانەكەیان دەستنیشاندەكات.

بزوتنەوەی گۆڕان گۆڕا بۆ ھەڵقەیەكی تری پرۆژەی دروستكردنی خێزانێكی سوڵتانیی تازە لە ھەرێمدا. وەكچۆن بارزانی ”بارەگای بارزانی“ ھەیە و لەو بارەگا ناڕەسمییەوە ئاراستەی حكومەت و پێگە سەرەكییەكانی دەسەڵات لە ھەرێمدا دەكات، بەھەمان شێوە كوڕەكانی نەوشیروان مستەفا، بەبێ بوونی ھیچ پێگەیەكی ڕەسمیی لەناو گۆڕاندا، لە ماڵەكەی باوكیانەوە لە گردەكە، بڕیار لەسەر پرسە سەرەكییەكانی ناو بزوتنەوەی گۆڕان دەدەن

ئەگەر لەسەردەمی دروستبوونی بزوتنەوەی گۆڕانەوە بەگشتیی و لەدوای حەڤدەی شوباتەوە بەتایبەتی، بەشێكی گەورەی كۆمەڵگای ئێمە بە ”نھێنی“ لەگەڵ ئەم دەسەڵاتدارانە و فۆرمی حوكمڕانییەكەیاندا نەبووبێت، ئەوا لە دواھەمین ھەڵبژاردنی پەرلەماندا بە ”ئاشكرا“ خۆی لەم فۆرمە حوكمڕانییە و سەرجەمی نوخبەكانی دابڕیی.

دروستبوونی بزوتنەوەی گۆڕان لە ساڵی 2009دا تەنھا ساتەوەختی لەدایكبوونی گوتار و دید و زمانێكی تر بۆ سیاسەت نەبوو، تەنھا پێشنیاركردنی پلان و بەرنامەیەكی مێژوویی نەبووە، تەنھا ساتەوەختی بەرھەمھێنانی سایكۆلۆژیایەكی سیاسیی نوێش نەبوو، تەنھا دۆخی ھاتنەكایەی جۆرێك لە حەماسەتی سیاسیی و كۆمەڵایەتییش نەبوو كە سنوورە ئەستورەكانی ترسی سیاسیی لە كوردستاندا تێكشكاند، بەڵكو ساتەوەختی دروستبوونی ”نوخبەیەكی سیاسیی نوێ“ش بوو لە بەرامبەر هەردوو نوخبه سوڵتانییه حوكمڕانەكەی ھەرێمدا. لەگەڵ دروستبوونی بزوتنەوەی گۆڕاندا نەوەیەك لە گەنجانی سەر بە خێزانەكانی چینی خوارەوە و چینی ناوەڕاست، بوون بە بكەری سیاسیی نوێ و لەناو كایەی سیاسیی و ڕووبەری گشتیی و‌ لە میدیا تازەكەی دوای دروستبوونی بزوتنەوەی گۆڕاندا دەركەوتن. دروستبوونی ئەم نوخبە تازەیە، لەپاڵ ئەو گوتار و بەرنامە و سایكۆلۆژیا و حەماسەتە تازەیەدا كە دروستبوو، ھەم كۆمەڵێك كێشەی بۆ نەخشە تەقلیدییەكەی دروستبوونی نوخبەی سیاسیی لە ھەرێمدا دروستكرد، ھەم ھیوا و چاوەڕوانییەكی گەورەشی بە كۆمەڵگای ئێمە بەخشیی بۆ چارەسەركردنی ھەندێك لە كێشە سەرەكییەكانی. ئەم نەوە تازەیە چونكە پێگە سیاسییەكانیان بە تۆڕە مافیایی و گەندەڵكارییە گەورەكانی ناو ھەرێمەوە تێكەڵ نەبووبوو، چونكە لەناو ھیچ پرۆسەیەكی تەوریسیی سیاسیشەوە نەھاتبوون، چونكە نوێنەرایەتی نەوەیەكی نائومێد و دڵشكاو و توڕەی نەناسراوی كۆمەڵگای دوای ڕاپەڕینی ئێمەیان دەكرد، بۆیە كێشەیەكی ئەوتۆیان لەگەڵ دید و گوتار و زمانە ڕادیكاڵەكەی بزوتنەوەكەدا نەبوو. دروستبوونی ئەم نوخبە تازەیە، كە پێكھاتبوون لە ئەندامانی پەرلەمانی ئەم بزوتنەوەیە و لە كەسە دیار و چالاكەكانی ناو بزوتنەوەكە خۆی و بە تایبەتیش لەوانەی لەناو میدیای گۆڕاندا كاریاندەكرد و دەردەكەوتن، شەپازلەیەكی گەورەبوو لە میكانیزمەكانی دروستبوونی نوخبە لە دونیای ئێمەدا و ناكۆكیش بوو بەو ھەندەسە سیاسییە باڵادەستە كە دروستبوونی نوخبەی سیاسیی بەتوندیی بە پرۆژەی بەھێزبوونی خێزانە سوڵتانییە سیاسییەكانەوە گرێدەدا.

زوتنەوەی گۆڕان لە ئێستادا و به مانا سیاسییه تەقلیدییەكەی ”خیانەت“ له ستراتیژ و سیاسەتی ئەم ساتەی خۆی ناكات، بەڵكو به پێچەوانەوە زۆر ڕاستگۆیانه پەیڕەوی ئەو سیاسەته نوێیەی تەوریسی سیاسیی و بەخێزانییكردنی حیزب و گرێدانی سیاسەت بە دەسكەوت و پێگەی ئابوورییەوە دەكات

بزوتنەوەی گۆڕان لەماوەیەكی كورتدا بوو بە ”پارتێكی باڵادەست“، بەڵام لەوەدا سەرنەكەوت ببێت بە ”پارتێكی حوكمڕان“. ئەم جیاوازییە لەنێوان ”پارتی حوكمڕان“ و ”پارتی باڵادەست“دا گرنگییەكی میتۆدیی ھەیە. بزوتنەوەی گۆڕان نەیتوانی باڵادەستەیی خۆی بگۆڕێت بۆ حوكمڕانییكردن، چونكه تا ئەمڕۆ ھێزی حوكمڕان لە دونیای ئێمەدا هێزێكه جومگه ئابووریی و سەربازیی و ئەمنیی و ئیدارییەكانی مۆنۆپۆڵكردوە و لەڕێگای ئەم مۆنۆپۆڵكردنەشەوه كۆمەڵگاكە ئاراستەدەكات. ھەرچی ”پارتی باڵادەست“ە هێزێكه هەیمەنەی لەناو ”ڕووبەری گشتیی“دا هەیه و لەڕێگای گوتارەكانیەوه ڕووداو دروستدەكات. حیزب دەكرێت لەناو خەڵك و كۆمەڵگادا باڵادەست بێت، دەشێت گوتارەكانی ببنە گوتاری باڵادەست، زمانەكەی ببێت بە زمانی قسەكردنی زۆرینەی كۆمەڵایەتیی، دەشێت نوخبەیەك دروستبكات لەناو ڕای گشتییدا شوێنی باوەڕ و متمانە بێت، بەڵام لە دونیای ئێمەدا تا ئەم ساتە مەرج نییە ئەم شتانە بیگۆڕن و بیكەن به”پارتێكی حوكمڕان“ و بیگەیەنن بە دەسەڵات. گەیشتن بە دەسەڵات و بوون بە ”پارتی حوكمڕان“ لە دونیای ئێمەدا میكانیزمی تریان لە پشتە. ئەگەر دیموكراسییەت ئەو سیستمە بێت كە ھەموو پارتە سیاسییەكان بتوانن ھەڵبژاردن بدۆڕێنن، ئەوا لە ھەرێمی كوردستاندا تا ئەم ساتە ئەم دۆڕاندنە شمولی ”پارتە حوكمڕانەكان“ ناكات، ئەوان بە دەیەھا شێوە ناھێڵن بدۆڕێن و دۆڕاندن تەنھا شمولی ئەوانە دەكات كە دەشێت ”باڵادەستبن“ و دەیانەوێت به میكانیزمی ئاشتییانه بەدەسەڵات بگەن و ببن به حوكمڕان.

بێگومان ”پارتی حوكمڕان“ دەشێت شتێك لە لیبرالیزمی سیاسیی دەستەبەربكات، بۆ نموونە ھەڵبژاردن ئەنجامبدات، ڕێگەبدات زیاد لە پارتێكی سیاسیی بوونی ھەبێت و بەشداری ھەڵبژاردنەكانیش بكەن، دەشێت بڕێكی كەم لە ئازادیی مەدەنییش دەستەبەربكات، بەڵام ھاوكات ناھێڵێت سیستەمێك دروستببێت تیایدا دەستگۆڕكێی دەسەڵات ڕووبدات. ”پارتی حوكمڕان“ لە شوێنێكی وەك كوردستاندا، تا ئێستاش دەتوانێت ڕێگە لە دەستگۆڕكێی دەسەڵات و لە ململانێی سیاسیی یەكسان و بەیاساڕێكخراو بگرێت. دەشتوانێت تەزویری گەورە و سیستماتیك ئەنجامبدات و چۆنیشی ویست بەوشێوەیە دەستكاریی ئەنجامی دەنگدانەكان بكات.

لەگەڵ دروستبوونی بزوتنەوەی گۆڕاندا ڕاستەوخۆ ھەوڵدان بۆ پەكخستنی ھەمەلایەنەی پرۆسەی گۆڕانكاریی و بێنرخكردنی بكەرە سیاسییە تازەكانی ناو ئەم بزوتنەوەیە دەستیپێكرد. كڕینی كەسانی سەر بە نوخبە تازەكەی ناو گۆڕان لەلایەن هەردوو هێزه حوكمڕانەكەوە، بەتایبەتی لەلایەن پارتییەوە، بە شێوەیەكی سیستماتیك دەستیپێكرد. لە ماوەی چەند ساڵێكی كەمدا پارتی لەوەدا سەركەوت ژمارەیەك لە ناوە دیار و تازەكانی ناو ئەم بزوتنەوەیە بكڕێت و بیانھێنێتە ناو ڕیزەكانی خۆیەوە. ھەندێك ناوی تریش بەھۆی ناڕازیبوونیان لە چۆنیەتی ئیشكردنی ناوەكیی بزوتنەوەكەوە وازیانھێنا. لە دوای مرنی نەوشیروان مستەفا خۆشییەوە، نوخبە سیاسییەكەی ناو بزوتنەوەكە بە لەدەستدانی كاریزما سیاسییەكەیان لەڕووی سیاسییەوە ھەتیوكەوتن. كۆچی دوایی نەوشیروان مستەفا تەنها بزوتنەوەكەی لاواز و بێئیرادە و بێپلان نەكرد، بەڵكو نەوشیروان خۆشی وەكو باوكێكی بایۆلۆژیی پێگەی هەردوو كوڕەكەی بەچەشنێكی مەترسییدار بەهێزكرد و ئەو مۆدێلەی لە تەوریسی سیاسیی بۆ بزوتنەوەكە بەجێھێشت كە بەدرێژایی تەمەنی سیاسیی خۆی دژایەتیی دەكرد. بەمردنی نەوشیروان مستەفا بزوتنەوەكە تەنھا توشی ئیفلیجبوونێكی گەورە نەبوو، بەڵكو بەو بڕیارانەش تووشی شۆك بوو كه نەوشیروان بەر لە مردنی دایبوو. نەوشیروان مستەفا لەڕێگای تەوریسكردنی موڵك و ماڵ و دەزگا سەرەكییەكانی بزوتنەوەكەوە بۆ كوڕەكانی، ھەڵەیەكی ستراتیژیی كوشندە و كارەساتێكی سیاسیی هێجگار گەورەی ئەنجامدا، كە مۆدێل و ئاكاری بزوتنەوەكەی لەدوای مردنی خۆیەوە تەواو گۆڕی. لەچركەساتی دەركردنی قەسامی شەرعیی گردەكەوه بۆ كوڕەكانی، ڤایرۆسی تەوریسی سیاسیی لەناو ئەم بزوتنەوەیەدا كەوتە ئیش و ھەمان ئەو فۆرمەی لە ململانێ دروستكرد كە لەنێوان منداڵی خێزانە سوڵتانییەكان و نەوەكانی بەر لەخۆیان لەناو یەكێتی و پارتیدا ئامادەیە. پرۆسەی تەوریسكردنی سیاسیی لەناو گۆڕاندا ئەو فیشەكی رەحمەتە بوو كە بە كەللەسەری نوخبە سیاسییە تازەكەی ناو گۆڕانەوە نرا. گروپێكی دێماگۆگی ناو نوخبە تازەكە بوون بە پیادەكەر و پارێزەری پرۆژەی تەوریسیی سیاسیی لەناو ئەم ھێزەدا و پاساوی یاسایی و سیاسیی و ئەخلاقییان بۆ ئەم پرۆسەیه دادەتاشیی. ئەو ئەندام و ھەوادارانەش كە ئەم پرۆسەیەیان بەكوشتنی سیاسیی بزوتنەوەكە دەزانی، یان دەستیان لەكار كێشایەوه، یان ماڵی سیاسیی گۆڕانیان بەجێهێشت و گەڕانەوە ماڵی شەخسیی خۆیان. بەشێكی تریشیان بەھۆكار و پاساوی جیاواز بۆ دۆزینەوەی كار، تا ئەمڕۆ لەناو گۆڕاندا ماونەتەوە. كەسە بەتەمەنەكانیش دەستیان بە كڵاو و تەماحە شەخسییەكانی خۆیانەوە گرتوە، تاوەكو بای تەوریسكردن نەیبات.

بزوتنەوەی گۆڕان نەیتوانی باڵادەستەیی خۆی بگۆڕێت بۆ حوكمڕانییكردن، چونكه تا ئەمڕۆ ھێزی حوكمڕان لە دونیای ئێمەدا هێزێكه جومگه ئابووریی و سەربازیی و ئەمنیی و ئیدارییەكانی مۆنۆپۆڵكردوە و لەڕێگای ئەم مۆنۆپۆڵكردنەشەوه كۆمەڵگاكە ئاراستەدەكات

لە پرۆسەی چەسپاندنی ئەم پرۆژە تەوریسییەدا بزوتنەوەی گۆڕان گۆڕا بۆ ھەڵقەیەكی تری پرۆژەی دروستكردنی خێزانێكی سوڵتانیی تازە لە ھەرێمدا. وەكچۆن بارزانی ”بارەگای بارزانی“ ھەیە و لەو بارەگا ناڕەسمییەوە ئاراستەی حكومەت و پێگە سەرەكییەكانی دەسەڵات لە ھەرێمدا دەكات، بەھەمان شێوە كوڕەكانی نەوشیروان مستەفا، بەبێ بوونی ھیچ پێگەیەكی ڕەسمیی لەناو گۆڕاندا، لە ماڵەكەی باوكیانەوە لە گردەكە، بڕیار لەسەر پرسە سەرەكییەكانی ناو بزوتنەوەی گۆڕان دەدەن و ئاراستەی سیاسیی ناوخۆیی و دەرەكیی بزوتنەوەكەش دیارییدەكەن. بەمجۆرە لەماوەی دە ساڵدا بزوتنەوەی گۆڕان لە ھێزێكی سیاسیی تازە و ڕادیكاڵەوە گۆڕا بۆ ھێزێكی نیمچە سوڵتانیی. لەمڕۆشدا كاركردن بۆ چەسپاندنی تەواوەتی تەوریسی سیاسیی بەشێكی زۆر لە جوڵە و ئاكار و ھەڵوێستە سیاسییەكانی ئەم بزوتنەوەیە دەستنیشاندەكات.

گەورەترین سەرمایەی ڕەمزیی سیاسەت متمانەیه. هەر هێزێكی سیاسییش ئەم سەرمایەی لەدەستدا، ناتوانێت ببێت به بكەرێكی سیاسیی بۆ گۆڕانكاریی. لەكاتی نەخۆشكەوتنی نەوشیروان مستەفادا، بەتایبەتی پاش كۆچی دوایی و خستنەگەڕی پڕۆسەی تەوریسی سیاسییەوە، بزوتنەوەی گۆڕان گەورەترین سەرمایەی ڕەمزیی خۆی كه شانازیی پێوەدەكرد و خەباتی بۆ دەكرد، لەدەستدا. سەرمایەیەك كە بریتیی بوو لە دژایەتییكردنی تەوریسی سیاسیی و بەگژاچوونەوەی سیستەمی سوڵتانیی. ئیتر یەكێك لە كۆڵەكە ھەرە سەرەكییەكانی بەرنامە و دونیابینی ئەم بزوتنەوەیە، كە ڕێگرتن بوو لە تەوریسی سیاسیی، ڕووخا. ھاوكات لەدوای مردنی نەوشیروان مستەفاوه ژمارەی هەڵە ستراتیژییەكان و نەبوونی ئیرادەیەكی سیاسیی بەھێز و چالاك بۆ كاری سیاسیی، لەناو بزوتنەوەكەدا لە گەشەیەكی بەردەوامدایە. سەرەتای گۆجبوونی سیاسیی گۆڕان لە بەشدارییكردن له حكومەت و شكستی خەباتی پەرلەمانیی و قفڵكردنی پەرلەمانەوه دەستپێدەكات. پاشان هەر لە نەبوونی دیدگایەكی ئەڵتەرناتیڤەوه بۆ ریفراندۆم بیگرە، تا دەگات به لەدەستدانی ئەو هەله مێژووییه كه گۆڕان دوای شانزەی ئۆكتۆبەرەوە سەركردایەتی دروستكردنی بەرەیەكی ئۆپۆزیسیۆنی گەوره دژ به شكسته مێژووییەكانی دەسەڵاتدارانی هەرێم بكات. دوای ئەوانەش دۆڕانی دوو هەڵبژاردن و كەمكردنی ژمارەی كورسییەكانی بۆ نیوه، قبوڵكردنی هەموو ئەو تەزویر و ساختەچێتییەی پرۆسەی ھەڵبژاردن و ئامادەنەبوونی هیچ یەكێك له سەركرده نوێكانی ئەم بزوتنەوەیە بۆ داننان بەو شكسته سیاسییه گەورەیەدا و دەست لەكار نەكێشانەوەی ھیچ یەكێكیان. لەم كۆتاییەشدا گەڵاڵەكردنی سەفەقەی سیاسیی لەگەڵ پارتیدا بۆ پێكهێنانی حكومەتی نوێ و زیندوكردنەوەی سەرۆكایەتی ھەرێم لەژێر ھەیمەنەی خواست و تەماحەكانی پارتیدا. هەموو ئەمانه نەك هەر بوون بەهۆكاری ئەوەی گۆڕان ئەو سەرمایه ڕەمزیی و سیاسییە گەورەیەی خۆی لەدەستبدات كه هەیبوو، بەڵكو بوون بەهۆكاری بەرهەمهێنانی كولتوورێكی سیاسیی زۆر خراپیش كه متمانەی دەنگدەر تیایدا دەكرێت بە قوربانی بەرژەوەندیی گروپ و تاقمی تایبەت و بە قوربانیی بەخێزانیكردنی دەسەڵات. ئەم كولتووره له داهاتوودا تەنها متمانەی دەنگدەر به ئەخلاقیی سیاسیی و چەمكی ئۆپۆزیسیۆن لەقناكات، بەڵكو كۆی پرۆسەی سیاسیی و خەباتی مەدەنیی و پەرلەمانتارییش لە ھەموو شێوەكانیدا بەتەواوی بێنرخدەكات.

بەبۆچوونی ئێمه بزوتنەوەی گۆڕان لە ئێستادا و به مانا سیاسییه تەقلیدییەكەی ”خیانەت“ له ستراتیژ و سیاسەتی ئەم ساتەی خۆی ناكات، بەڵكو به پێچەوانەوە زۆر ڕاستگۆیانه پەیڕەوی ئەو سیاسەته نوێیەی تەوریسی سیاسیی و بەخێزانییكردنی حیزب و گرێدانی سیاسەت بە دەسكەوت و پێگەی ئابوورییەوە دەكات. ھەموو ئەمانە بە خێراییەكی زۆر لەدوای مردنی نەوشیروان مستەفاوه لەناو ئەم بزوتنەوەیەدا دروستبوون و بوون بەهۆكاری شكستێكی گەورە بۆ نوخبەیەكی سیاسیی نوێی ناو كۆمەڵگای ئێمە.




تۆڕی هەواڵی ژیان بەرپرس نییە لە ناوەڕۆکی ئەم نوسینە