پۆلیسی پارێزگای هەولێر لە ڕوونكردنەوەیەكدا ئاماژە بەوە دەدات: ''دوای ئاگادارکردنەوەی بەڕێوەبەرایەتیی پۆلیسی پارێزگای ھەولێر لە ونبونی کەسێک بە ناوی ''بێستون حەوێز بەکر'' لەلایەن بنەماڵەکەیەوە کە لە ڕێکەوتی 7/1/2023 لە ماڵەوە دەرچووە و نەگەڕاوەتەوە و بڕی 50 ھەزار دۆلاری ئەمریکیشی لابووە، تیمێک لە ھێزەکانی بەڕێوەبەرایەتیی پۆلیسی پارێزگای ھەولێر پێک ھێنرا بە مەبەستی بەدواداچوون بۆ کەسی ونبوو.''

ئاماژە بەوەش دراوە کە لە ڕۆژی دووشەممە ڕێکەوتی 16/1/2023 هێزەکانی پۆلیس تەرمی ناوبراویان لە بناری چیای سەفین لە گوندی قەراسنجی سەروو دۆزیوەتەوە.

لە ڕوونکردنەوەکەی پۆلیسی هەولێردا ئەوەش خراوەتە ڕوو کە ''لە دەرئەنجامی لێکۆڵینەوەی ھێزەکانمان دوو تۆمەتبار دەستگیر کران و پەڕاوی لێکۆڵینەوەیان بۆ ڕێک خرا و ڕەوانەی بەردەم دادوەری لێکۆڵینەوەی ھەولێر کراوە بۆ تەواوکردنی لێکۆڵینەوەکە.'' بە پێی زانیارییەکان ناوبراو کادری پارتی دیموکراتی کوردستانە