بەپێی بڕیارێكی بانكی ناوەندی عیراق كە لەلایەن جێگری پارێزگاری بانكی ناوەندییەوە ئاڕاستەی كۆمپانیاكانی ئاڵوگۆڕی دراو كراوە لە جۆری (A)، لەڕۆژی 5ی ئاداری 2023وە پشكی هەفتانەی ئەو كۆمپانیایانە دەكرێتە 2 ملیۆن دۆلار، ئەمەش وەك هەوڵێك بۆ زیادكردنی خستنەڕووی دۆلار‌و پاراستنی بەهای دیناری عیراقی.

هاوكات بڕیارێكی بانكی ناوەندی عیراق نوسراوێكی ئاڕاستەی هەردوو بریكاری سەرەكی كۆمپانیاكانی حەواڵەی دارایی جیهانی (وێسترن یونیۆن و مەنی گرام) كردوە‌و تیایدا تەئكیدی كردۆتەوە، دەبێت پابەندبن بەنرخی ڕەسمی گۆڕینەوەی دۆلار كە 132 هەزار دینارە بەرامبەر 100 دۆلار بۆ سودمەندی كۆتایی حەواڵەی هاتوو و دەرچوو، بە پشتبەستن بەو ڕێنماییانەی بانكی ناوەندی دەریكردوە‌و داواكارییەكانیان بەمەبەستی بەهێزكردنی باڵانسەكانیان لەگەڵ كۆمپانیاكانی سەرەوە، بەپێی ئەو مەرج‌و ڕێنماییانەی ئەمساڵ دەركراون.