بەبۆنەی یادی راپەڕینی گەلی کوردستان بارەگای بارزانی لە راگەیەندراوێکدا دەڵێت، جێگەی داخێکی زۆرە لەیادی ڕاپەڕیندا حزب و لایەنە سیاسیەکان و لایەنگرانیان هەوڵی ئەوە دەدەن کە ئەو یادە بە حزبی بکەن
دەقی راگەیەندراوی بارەگای بارزانی:
بەناوی خودای بەخشندە و میھرەبان
جێگەی داخێکی زۆرە لەیادی ڕاپەڕیندا حزب و لایەنە سیاسیەکان و لایەنگرانیان هەوڵی ئەوە دەدەن کە ئەو یادە بە حزبی بکەن و هەریەکەو بە جۆرێک لە جۆرەکان خۆی بە خاوەن و ئەنجامدەری ڕاپەڕین لە قەڵەم بدات.
ڕاپەڕین دەرئەنجامی یەکڕیزی و تێکۆشانی هەمەلایەنەی جەماوەر و لایەنەکانی ناو بەرەی کوردستانی و پێشمەرگە و ڕێکخستنە نهێنییەکان و سەرجەم چینوتوێژە جیاجیاکانی کوردستان و، درێژکراوەی خەباتێکی دوورودرێژ و بەردەوامی گەلی کوردستان بوو.
پەیام و ئامانجەکانی ڕاپەڕین بەرز و گرانبەها و نیشتیمانی و نەتەوەیین و، نابێ بە حزبی و بچووک بکرێنەوە و لە مانا و جەوهەر بەتاڵ بکرێن. ڕاپەڕین بە ڕەنج و ماندووبوون و هەوڵی ھەموو لایەک سەرکەوت، بۆیە خاوەن و ئەنجامدەری ڕاستەقینەی ئەو ڕووداوە مەزنە، کوردستانە بە هەموو حزب و لایەن و کەسایەتی و هاووڵاتیانیەوە.
بارەگای بارزانی
٦ی ئاداری ٢٠٢٣