بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی پێشوازی لە فۆتوشی ماتسۆمۆتو، باڵیۆزی ژاپۆن لە عیراق کرد.
بەپێی ڕاگەیەندراوی نووسینگەی ڕۆژنامەوانی سەرۆکی یەکێتیی نیشتمانیی کوردستان، لەدیدارەکەدا دوایین پێشهات و گۆڕانکارییە سیاسییەکانی هەرێم و عیراق گفتوگۆی لەبارەوەکرا و جەخت لە لێکتێگەیشتن و دیالۆگی بەردەوامی نێوان لایەنەکان کرایەوە بەئامانجی چارەسەرکردنی کێشەکان و زاڵبوون بەسەر ئاڵنگارییەکاندا.
بافڵ جەلال تاڵەبانی سەبارەت بە یەکخستنی هەوڵە نیشتمانییەکان بۆ چارەسەکردنی کێشەکانی هەرێم و پرسی هەڵبژاردن، هەڵوێستی یەکێتی روونکردەوە و رایگەیاند، زەمینەیەکی لەبار بۆ گەیشتن بە سازان و رێککەوتنی نیشتمانی هاتووەتە ئاراوە و هەموو هەوڵێکیشمان لەپێناو گەیشتن بە ئەنجامێکی ئەرێنی و خزمەتکردنی زیاتری هاوڵاتییاندایە.
بافڵ جەلال تاڵەبانی وتیشی، گفتوگۆکان لەبارەی بەڕێوەچوونی هەڵبژاردن لەهەرێم بەردەوامە و هیوادارین ئەو خاڵانەی ناکۆکی لەسەرە، بەزووترین کات رێککەوتنی لەسەر بکرێت و هەڵبژاردنێکی بێگەرد لە وادەی خۆیدا بەڕێوەبچێت.
هەر لە دیدارەکەدا بەهێزترکردنی ژێرخانی ئابووریی هەرێم و پەرەپێدانی پەیوەندییە ئابووری و سیاسییەکانی نێوان هەردوولا تاوتوێکرا.