بەشێك لە ئەندامانی لیژنە هاوبەشەكانی قەیمقامیەتی سلێمانی گۆڕدران و قایمقامی سلێمانیش رایگەیاند، ئامانجی لیژنە هاوبەشەكان سزادان و داخستن نیە بەڵكو ئامانجەكە باشتركردنی جێبەجێكردنی رێنمایی و كەمكردنەوەی سەرپێچیەكانە.
ئاوات محەمەد، قائیمقامی سلێمانی، ئەمڕۆ پێنجشەممە، لە دیوانی قائیمقامیەت لەگەڵ تیمە نوێكانی لیژنە هاوبەشكانی قائیمقامیەتی سلێمانی كۆبوویەوە و رایگەیاند: هەموو شەش مانگ جارێك ژمارەیەكی زۆری ئەندامانی لیژنه هاوبەشەكان گۆڕانكاریان بەسەردادێت، ئەندامە نوێكان درێژە پێدەری كارەكانی ئەندامانی پێشووی لیژنەكانن كە ئەركێكی نیشتمانی پێشكەش بە هاوڵاتانی شارەكە دەكەن.
ناوبراو وتیشی: ئامانجی سەرەكی لیژنە هاوبەشەكانی قائیمقامیەتی سلێمانی سزادان یان داخستنی شوێنەكان نییە، بەڵكو گەیشتنە بە ئاستێكی باش لە پابەندبونی خاوەن شوێنەكانە بە رێنماییەكانی كاركردن و كەمكردنەوەی سەرپێچییەكان.
ئاوات محەمەد روونیكردەوە: بەپێی بەدواداچوونی لیژنەكان بەشێكی زۆری سەرپێچییەكان كەمتەرخەمیی خاوەن شوێن و ئەوكەسانەیە كە كاری تێدادەكەن نەك چاوچنۆكی، بەڵام لەئێستادا بەشێكی زۆری شوێنەكان پابەندی مەرج و رێنماییەكانی.
قایمقامی سلێمانی ئاماژەی بۆئەوەشكرد: قورسترین بڕیار بڕیاری داخستنی شوێنەكەیە، چونكە ئامانجی كاركردنەكانمان زیان گەیاندن نییە بە هیچ كەسێك بەڵام لەپێناو بەرژەوەندی گشتی و پاراستنی تەندروستی هاوڵاتیان ناچارین جێبەجێی بكەین.
لیژنه هاوبەشەكانی قائیمقامیەتی سلێمانی لەساڵی (2007)ەوە دروستكراوە و تا ئێستا لە كاركردنیان بۆ چاودێریكردنی ناوەندە بازرگانی و خزمەتگوزاریەكانی شارەكە بەردەوامە.