لەبارەی وەرگرتنی پارە لە خوێندکارانی ئاکرێ بۆ پشکنینی کۆرۆنا ڕوونکردنەوە دەدرێت

  2020-08-04  | 
دهۆک
 مازن شنگالی
بەڕێوەبەرایەتی تەندروستی قەزای ئاکرێ لەبارەی وەرگرتنی پارە لە ژمارەیەک خوێندکار لەپێناو پشکنینی تایبەت بەکۆرۆنا بۆیان، روونکردنەوەیەکی بڵاوکردەوە و رایگەیاند، رووداوەکە بەهەڵە و بەهۆی لێکتێنەگەیشتنەوە بووە.

لە روونکردنەوەکەدا هاتووە، دوای ئەوەی لە لایەن ژمارەیەک لە خوێندکاران لە گوندەکانی تلبۆک و گۆرانکێ لە سنوری قەزای ئاکرێ داوا لە بەڕێوەبەرایەتی تەندروستی قەزاکە کرا، تیمێک بنێرێت بۆئەوەی پشکنینی تایبەت بە ڤایرۆسی کۆرۆنایان بۆبکرێت، تەندروستی ئاکرێ داواکەیانی جێبەجێکرد و لەبەرامبەردا پڕە پارەیەکیان بۆ ئەو مەبەستە لێوەرگیراوە.

ئاماژەی بەوەشکراوە کە بەهەڵە ئەو پارەیە لەو خوێندکارانە وەرگیراوە و بەهۆی ئەوەبووە کە لێکتینەگەیشتن لە نێوان تیمەکانی تەندروستی و خوێندکاراندا دروستبووە .

ئەوەش خراوەتەڕوو، دوای ئەوەی بەدواداچوون بۆ بابەتەکە کراوە، لەلایەن تەندروستی ئاکرێوە، پارەکە بۆ ئەو خوێندکارانە گەڕێندراوەتەوە .

ئەوە لە کاتێکدایە لە ماوەی دوو ڕۆژی ڕابردوودا و بەهۆی دەستنیشانکردنی ١٩ حاڵەتی تووشبوون بە ڤایرۆسی کۆرۆنا لە هەردوو گوندی تلبۆک و گۆرانکێ لە سنوری قەزای ئاکرێ، دوو گوندەکە کەرەنتین کراون و زیاتر لە ٨٠ سامپڵ لەو دوو گوندە لەو کەسانە وەرگیراون کە گومانی ئەوەیان لیدەکرا، بەرکەوتەی تووشبووەکان بن .