داستان بەرزان
شانۆنامەیەكی مۆلێر هەیە بە ناوی (بۆرژوای نەجیبزادە) چیرۆكی ئەم شانۆنامەیە بە كورتی: باس لە كوڕە نەجیبزادەیەك دەكات، كە دەیەوێت لە ڕێگای پارەوە لە زۆر بواردا بەهرەمەند بێت و بەو هۆیەشەوە سەرنجی ئەو كچە ڕابكێشێت كە خۆشیدەوێت، بۆ ئەو مەبەستە پەنادەباتە بەر ئەوەی مامۆستای جیاواز لە بوارە جیاوازەكانی وەكو (موزیك، فیزیا، فەلسەفە...) بگرێت و ڕۆژانە هەریەك لە بواری خۆییدا وانەی دابدەن، بەڵام ئەوەی جێگەی نیگەرانی كاكی نەجیبزادەیە ئەوەیە كە ناتوانێت لە هیچ كام لەو بوارانە تەنانەت فێرخوازێكی باشیش بێت و تێبگات چی دەگوزەرێت، واتە ئەوەی ئەو هەیەتی تەنیا پارەكەیە، ئەویتر كە پێویستە لە بەهرە و توانای كەسی نییەتی، لە ئەنجامدا یارییەكی كۆمیكی سەیرنجڕاكێش لە نێوان نەجیبزادە و مامۆستاكاندا دەگوزەرێت، كە بینەر دەخاتە پێكەنین و هاوكات بەزەیی هاتنەوەش بە دۆخی كوڕە نەجیبزادەكەدا. ئەمەش درێژەی دەبێت تاكو ئاستی قەشمەربوونی كوڕەی نەجیبزادە. كرۆكی ئەم شانۆنامەیە پێمان دەڵێت: پارە دەتوانێت زۆر شتمان بۆ بەدەست بێنێت، بەڵام هەرگیز ناتوانێت بەهرە و لێهاتووییمان تێدا دروست بكات...
ساڵانە دەبیستین كوڕان و كچانی دەوڵەمەندەكان دەچنە زانكۆ باش و گرانبەهاكانی ناوەوە و دەرەوەی وڵات، بەڵام كوان لێهاتوویی و بەهرەیان و جێگە دەستیان لەو بوارانەی كە تێیدا دەخوێنن؟ ئایا تەنیا پارە بە فیڕۆنادەن و لە ئەنجامدا ناوێكی گەورەش كە هیچ نییە لە ڕووكەشێكی ناوەخن بۆش؟ دواتر هەر ئەو دەرچووانەن ناتوانن تەلارێكی باش و جوان دیزاین بكەن، یان هەر ئەوانەن نەشتەرگەرییەكی بچوك لە ژێر دەستیاندا دەمرێت...
یەكێك لە میدیا جیهانییەكان بەم دواییە سەرنجی بۆ بابەتێك ڕاكێشام، ئەوەی كە ساڵانە زۆرێك لە دەواڵەمەند و سیاسییەكانی وڵاتێك ڕێژەیەكی زۆر پارە دەدەن بۆ ئەوەی خەڵكانێك كتێبیان لە شێوەی ڕۆمان و یاداشت و...هتد بۆ بنووسن، تاكو ئەوانیش بە ناوی خۆیانەوە چاپ و بڵاویان بكەنەوە، ئەمەش لە ئارەزووی ئەوانەوە سەرچاوە دەگرێت بۆ حەزی نووسەربوون و بەهرەمەندبوون لەو بوارانەدا، تەنانەت ئاماژە بەوە درابوو كە كەسانێك تەنیا كاریان ئەوەیە بنووسن و بەناوی ئەوانەوە بڵاوبكەنەوە، بۆ ئەوەی بڕە پاریەك وەربگرن...
لای خۆشمان دەبیستم هەندێك دەوڵەمەند و بەرپرس پارەیان لەو بوارەدا سەرفكردووە، بەڵام هێشتا نەبۆتە دیاردەیەك كە قسەی لەسەر بكرێت.
بەهرەمەندەكان پێویستە دڵخۆش بن، چونكە ئەوەی ئەوان لە نوانایاندا هەیە بە پارە ناكڕدرێت، خۆشبەختانە زۆرجاریش منداڵانی هەژار خاوەن بەهرەن و ئەوان دەبنە سەرمەشقی دەیان منداڵی دەوڵەمەند، ئەمەش لە زۆر بواردا ڕاستە، هەر بۆ نمونە یەكەمیینەكانی دوانزەی ئامادەیی ساڵانە كەمترین منداڵانی بەرپرس و زۆر دەوڵەمەندەكانی تێدایە و زۆرینەیان منداڵانی هەژار و تەنانەت دوورە شارەكانیشن.
بەهرە و لێهاتوویی پڕۆسەیەكی خودییە و لە مرۆڤێك بۆ یەكێكیتر دەگۆڕدرێت، ڕاستە ڕێگایەك هەر بۆ بەهێكردن و برەودان بە بەهرە، بەڵام ئەو ڕێگایە هەمووی نییە، لە ئەنجامدا پێویستە كەسەكە خۆیشی خۆلیا و توانای هەبێت و ئەو ڕێگایە بكاتە هۆكارێك بۆ زیاتر پەرەسەندنی بەهرەكەی.
بەم بەسەرهاتە كۆتایی بەم باسە دەهێنم، كاتێك خوێندكاری زانكۆ بووم، چەندین جۆری خەڵكمان تێدابوو، كە هاتبوون بۆ خوێندنی هونەر، (خۆشبەختانە هونەریش لەو بوارانەیە كە بەبێ بەهرە و لێهاتوویی تایبەتی هیچی لێ سەوز ناكەیت و مایەپووچ لێی دەگەڕێیتەوە) ڕاستە هەموو ئەوانەی لە پۆلێكدابوون بە خوێندكاری هونەر ناو دەبران، بەڵام لە ناوەڕۆكدا تەنیا دوو بۆ سێ كەسێكیان فێربوونی هونەر و بڕەودان بە بەهرەكانیان مەبەست بوو، ئەوانی دیكە ئامانجیان تەنیا بڕوانامە یان نمرەكەیان هەر ئەوەی تێدا دەبوو، یاخود بۆ خۆدەرخستن و ئەوەی بڵێن ئێمەش خوێندكاری كۆلێژین، ئەوەبوو لەو ساڵەوەی ئێمە لە زانكۆ دەرچووین، زۆرینەی ئەو كەسانەم تەنانەت وەك بینەرێكیش نەبینیوەتەوە، چ جای ئەوەی كاری هونەری بكەن.