بڕیارە لە ئایندەیەكی نزیكدا دەزگای چاپ و پەخشی سەردەم دوو كتێب بۆ وەرگێڕ (سەباح ئیسماعیل) چاپ بكات كە هەریەكەیانی لە زمانی عەرەبییەوە وەرگێڕاوە بۆ زمانی كوردی، كتێبەكان بە ناوەكانی (تراژیدیای نووسەرانی ڕووس) و (ڕۆمان لە نێوان ئەندێشەو واقیعدا)ن.
لە پێشەكی كتێبی (تراژیدیای نووسەرانی ڕووس)دا سەباح ئیسماعیلك وەرگێڕی كتێبەكە دەڵێت: ئەدەبی بەرگری، ئەدەبی شۆڕشگێڕی، ئەدەبی زیندان، ئەدەبی ساتیری.... ناوەیلێكن بۆ ئەو ئەدەبەی دژ بە ڕژێمە ستەمكارەكان نووسراون، هەمیشە نووسەرەكانیان باجی نووسینەكانیان داوەتەوە، هەر لە لەداردانەوە، تاكو زیندانی و دوورخستنەوە و شاربەدەركردن و سووتاندنی كتێبەكانیان و قەدەغەكردنی نووسینەكانیان.
ئەدەب بەگشتی و قەدەغەكراوەكەی بە تایبەت، لە كات و سەردەمی سەركوتی دڕندانەدا، تا ڕادەیەكی زۆر ئەڵتەرناتیڤی ئۆپۆزسیۆنی سیاسی بووە.
فەیلەسووفی ئیتاڵی، جیۆردانۆ برۆنۆ بەهۆی داننانی بە دروستیی سووڕانەوەی زەوی بە دەوری خۆردا كڵێسای كاسۆلیكی بە زەندیقیان دانا و سووتاندیان.
تۆماس مۆر لەسەر نووسینی كتێبی "یۆتۆپیا" لە ملی درا. ڤۆڵتێر بەرگریكاری سەرسەختی چاكسازیی كۆمەڵایەتی، لە سۆنگەی كارەكانیەوە تووشی گرتن و دوورخستنەوە هات.
هەروەها لە پێشەكی كتێبی (ڕۆمان اە نێوان ئەندێشە و واقیعدا) كە نووسەری كتێبەكە د. جەودەت هۆشیار نووسیوویەتی، هاتووە: ئەم كتێبە سەبارەت بنەماكانی هونەری ڕۆمان و تەكنیكە نوێیەكانە لە نووسینی ڕۆمانی هاوچەرخدا. هەڵبەت لە نووسینیدا (بە بڕوای خۆم) شێوازێكی نوێم گرتووەتە بەر، ئەویش ئەوەیە، هەر بەشێك لە كتێبەكە دەكرێت وەكو لێكۆڵینەوەیەكی سەربەخۆ بخوێنرێتەوە، هەرچەندە كتێبەكە سەرلەبەر تەرخانە بۆ یەك تەوەر، ئەویش هونەری ڕۆمانە.
ئێمە لە چاخی خێراییداین، ڕووكردنە خوێندنەوە زۆر سست بووە، ئەمەش لە سۆنگەی دەركەوتنی ئامرازە زیرەكەكانی گەیاندن و ڕاگەیاندنی دیجیتاڵەوە، كە وا لە وەرگر دەكەن لە چەند چركەیەكدا زانیارییەكی زۆری بكەوێتە بەردەست.
سەرقاڵی ژیان لێناگەڕێت خەڵك ڕووبەرێكی گەورەیان لە كات بۆ خوێندنەوەی كتێبێكی چەند سەت لاپەڕەیی هەبێت، ئامرازە دیجیتاڵییە تازەكان كاتی حەسانەوەی مرۆڤی هاوچەرخ دەبەن، پێدەچێت ناوەڕۆكی ئەم ئامرازانە خۆشتر و بەدواداچوون و تێگەیشتنیان ئاسانتر بێت. بەڵام تەنیا یەكەم سات، چونكە ئەوی كەناڵە ئاسمانی و ئیستگە و تەلەفۆنە زیرەكەكان پێشكەشی دەكەن، هەر زوو لەبیر دەچنەوە، وەكو كتێب لە زیهندا نامێنن، بۆیە لە ڕێكخستنی بەشەكانی ئەم كتێبەدا وام كردووە.