بەغدا رێژەی ناردنی نەوتی سپی بۆ هەرێمی کۆردستان، لە 50 ملیۆن لیترەوە بۆ 150 ملیۆن لیتر زیادکرد.
هەڤال ئەبوبەکر پارێزگاری سلێمانی ڕایگەیاند، ئەمشەو لە فڕۆکەخانەی نێودەوڵەتی هەولێر بەهاوڕێیەتیی پارێزگارانی هەولێر و دهۆک و بەڕێوەبەری گشتیی ناوەندی هەماهەنگیی قەیرانەکان، پێشوازیانکردووە لە وەزیرانی پلاندانان و کۆچ و کۆچبەرانی حکومەتی فیدڕاڵی و وەفدی هاوڕێیان.
ئاماژەی بەوەشکردووە، لە دیدارەکەدا وەزیری پلاندانانی حکومەتی فیدڕاڵی پێی ڕاگەیاندوون کە لەسەر داوای مستەفا کازمی سەرۆک وەزیرانی عێراق و رێبەر ئەحمەد وەزیری ناوخۆی حکومەتی هەرێمی کوردستان و پارێزگاری سلێمانی بۆ بەدواداچونی داخوازیی پارێزگاکان، ئەم سەردانەیان ئەنجامداوە.
ئاشکراشیکردووە، پاش داواکاریی پارێزگاری سلێمانی و حکومەتی هەرێمی کوردستان بۆ زیادکردنی بڕی نەوتی تەرخانکراو بۆ پارێزگاکانی هەرێمی کوردستان، حکومەتی فیدڕاڵی و وەزیری نەوت، بڕی تەرخانکراویان لە ٥٠ ملیۆن لیترەوە بۆ ١٥٠ ملێۆن لیتر، بە سێ بەشی یەک لەدوای یەک زیادکردووە.