پەرلەمانی كوردستان لەبارەی سوتاندنی ئاڵای كوردستان و بارەگاكانی پارتی راگەیەندراوێكی بلاوكردەوە داوا دەكات ئەو كەسانەی هێرشەكەیان كردووە سزا بدرێن.
پەرلەمانی كوردستان ئیدانەی سووتاندنی ئاڵای كوردستان و بارەگای پارتی لەبەغدا دەكات و دەڵێت: وێڕای بەتوندی شەرمەزاركردنی ئەو پەلامارەو سووتاندنی ئاڵای كوردستان كەسومبولی گەلی كوردستانە، داوا لەحكومەت و پەرلەمانی فیدرالی دەكەین بەدواداچوون بۆ ئەم كارە نایاساییە بكەن.
راگەیەندراوەكەی پەرلەمانی كوردستان ئاماژەی بەوەكردووە، ئەنجامدەرانی بەسزای یاسایی خۆیان بگەیەنن. بیانووی پەلاماردەران هەرچییەك بووبێت، رێگەی دیكەی مەدەنی و میدیایی و سیاسی و پەرلەمانی هەبوو بۆ وەڵامدانەوە.
پەرلەمانی كوردستان ئەوەشی راگەیاندووە كە "داواكارە حكومەتی فیدرالی رێگە نەدات هێزێكی یاخی و لەیاسا دەرچوو زیان بەپێكەوە ژیان و بنەماكانی دەستوورو رەنگاڵەیی و فرەیی نەتەوەیی و ئاینی و مەزھەبیی عێراق بگەیەنێت".