میدیاکانی ئێران لەزاری ناهید خۆداکەرەمی سەرۆکی لیژنەی تەندروستی لە شورای شاری تاران بڵاویانکردەوە، لەئێستادا شەش هەزار توشبووی کۆرۆنا لە نەخۆشخانە تایبەت و حکومییەکانی تاران خەوێندراون کە باری تەندروستی سێ هەزار کەسیان ناجێگیرە و لەژێر تەندروستی وردی پزیشکیدان.

ناوبراو ئاماژەی بەوەشکردووە کە تەنها رێگەچارە بۆ کەمکردنەوەی ئاماری توشبوون و گیان لەدەستدان، گرتنەبەری رێوشوێنی توند و جددی و کەرەنتینکردنی تارانە بۆ ماوەی دوو هەفتە.

سەرۆکی لیژنەی تەندروستی لە شورای شاری تاران راشیگەیاندووە، بەپێی ئەو ئامارانەی لەبەردەستدایە، تاوەکو ئەمڕۆ زیاتر لە ١٧ هەزار و ٧٥٤ توشبووی کۆرۆنا تەنها لە شاری تاران گیانیان لەدەستداوە و ئەگەر رێکاری نوێ نەگیرێتەبەر، دۆخەکە خراپتر دەبێت.

بەپێی دواین ئاماری وەزارەتی تەندروستی ئێران، لە ٢٤ کاتژمێری رابردوودا نۆ هەزار و ٤٥٠ کەسی دیکە لەو وڵاتە تووشی کۆرۆنا بوون و بەوەش کۆی گشتیی توشبووانی کۆرۆنا گەیشتووەتە ٦٧٣ هەزار و ٢٥٠ کەس. هەر لەو ماوەیەشدا ٤٢٣ کەسی دیکە لە سەرتاسەری ئێران بە کۆرۆنا گیانیان لەدەستداوە و بەوپێیەش تاوەکو ئەمڕۆ ٣٧ هەزار و ٨٣٢ توشبووی کۆرۆنا لە وڵاتەکە گیانیان لەدەستداوە.