سەرۆكایەتی كۆماری عێراق رایگەیاند، تێپەڕاندنی یاسای پڕكردنەوەی كورتهێنانی دارایی بێ كورد پێشینەیەكی مەترسیدارە لە كاری سیاسی.
سەرۆكایەتیی كۆماری عێراق سەبارەت بە پەسندكردنی یاسای پڕكردنەوەی كورتهێنانی دارایی راگەیەندراوێكی بڵاوكردەوە و تیایدا دەڵێت: جەخت لەرێگەچارەیەكی بنەڕەتی دەكەینەوە كە رێگە لەدووباربوونەوەی قەیرانی موچەی فەرمانبەران بگرێت ، چونكە قەرزكردن بەتەنها بەس نییە بۆ روبەڕوبوونەوەی ئەم قەیرانە.
لە راگەیەندراوەكەدا داوای ئەوەی كردووە پشت بە چاكسازیەكی گشتیر ببەسترێت بۆ چارەسەری ریشەیی قەیرانی دارایی و دەشڵێت: ئەم یاسایە بێ رەچاوكردنی سازانی نیشتمانی، بەدیاریكراویش بەبێ خواستی كورد پەسەندكرا و تێپەڕێندرا . ئەمەش پێشینەیەكی مەترسیدارە لە كاری سیاسی عێراقدا.
ناوبراو ئەوەشی وتووە "دابینكردنی موچەی فەرمانبەران لە عێراق بەبێ چارەسەری موچەی فەرمانبەرانی هەرێم كارێكی ناتەواوە چونكە ئەوانیش هاوڵاتی عێراقن و مافەكانیان لەدەستوردا جێگیركراوە.
ئەو دووپاتیدەكاتەوە كە پێویستە تەواوی هاوڵاتیان بەدوور بن لە ململانێی سیاسی و راشیگەیاند: تەئكید لەچارەسەركردنی كێشە هەڵواسراوەكانی نێوان حكومەتی فیدراڵ و هەرێم دەكەینەوە، بەدیاریكراویش دۆسیەی نەوت و رێكخستنەوەی بەشێوەیەكی شەفاف و بەگوێرەی دەستوور.