دەزگای خۆراک و دەرمانی سعودیە ڕەزامەندی لەسەر تۆمارکردنی ڤاکسینی دژی کۆرۆنای کۆمپانیاکانی فایزەر و بایۆنتیک نیشاندا و هاوردە دەکرێت بەمەبەستی بەکارهێنانی.
ئاژانسی هەواڵی سعودی بڵاویکردەوە دەزگای خۆراک و دەرمان دوای چەندین لێکۆڵینەوە و کۆبونەوە لەگەڵ پسپۆڕان و شارەزیان ڤاکسینەکەی پەسەندکرد.
ئاماژەی بەوەشکردوە ئەم پەسەندکردنە لەدوای داوایەکی کۆمپانیا فایزەردێت لە رۆژی 24 مانگی ڕابردوو کە داوای لە سعودیە کرد لێکۆڵینەوە لە ڤاکسینەکە بکات و پەسەندیبکات.
هەروەها ڕاشیگەیاندوە لەدوای پەسەندکردنەکە بەرپرسانی تەندروستی پەیوەندیدار دەستدەکەن بەڕێوشوێنەکانی هاوردەکردنی ڤاکسینەکە بەپێی ستاندارد و پێداویستییە دیاریکراوەکان.
ئاشكراشیکردوە پێویستە ڤاکسینەکە پێش بەکارهێنانی نمونەکانی شیبکرێتەوە بەمەبەستی دڵنیابوون لە کوالیتیەکەی.
ئەوە لەکاتێکدایە تا ئێستا چەندین وڵات ڕەزامەندیان لەسەر بەکارهێنانی ڤاکسینی هەردوو کۆمپانیای فایزەری ئەمریکی و بایۆنتیکی ئەڵمانی دەربڕیووە.