بڵیسە جەبار فەرمان پەرلەمانتاری یەکێتی لە پەرلەمانی عێراق لە نوسینێکدا دەڵێت" بەپێی ڕاپۆرتی شەفافیەتی نێودەوڵەتی عێراق بە یەكێك لە گەندەڵترین وڵاتانی جیهان دەژمێردرێت و ئەم پەتایە نەك هەر دامەزراوەكانی حكومەتی لە ناوەوەی وڵات بەتەواوی گرتۆتەوە، بەڵكو باڵیۆزخانە و نوێنەرایەتییەكانیشی لە دەرەوە گرتۆتەوە.

ئەو پەرلەمانتارە ئاماژەی بەوەکردوە نوێنەرایەتییەكان خەرجییەكی ئێجگار زۆریان هەیە و نوێنەرەكان پلەكانیان لە پلەی وەزیران باڵاترە و واپێویستە بینای نوێنەرایەتییەكان هەمیشە لە شوێنی زۆر گرانبەهادا بن، چونكە شكۆی وڵاتەكانی خۆیانن .

ئاشکراشیکردوە عیراق 88 بارەگای نوێنەرایەتیی لە وڵاتاندا هەیە و گەندەڵیش زۆربەی نوێنەرایەتییەكانی عیراقی گرتۆتەوە و لە هەندێک وڵات نوێنەرایەتی هەیە کە هیچ بەرژەوەندیەکی لەگەڵیان نیە بۆ نمونە وڵاتی کینیا، لەگەڵ ئەوەی باڵیۆزی عێراق و 34 کارمەند لەو وڵاتە کاردەکەن بەڵام تەنها چوار هاوڵاتی عێراقی لەوێ نیشتەجێن.

هەروەها عیراق نوێنەرایەتیی لە رۆمای پایتەختی ئیتاڵیا و هەروەها نوێنەرێكی ئیسلامی لە ڤاتیكان هەیە، كە تەنها چەند مەترێك لە یەكترییەوە دوورن .

ئەو پەرلەمانتارە ئاماژەی بەوەشکردوە یەكێكی دیكە لە گەندەڵیەکان لە باڵیۆزخانەکان بریتییە لەو كارمەندانەی لەوێ پلەی بەرزیان هەیە و بێ هیچ مەرجێكی دیپلۆماسی دانراون.

بەشی هەرە زۆریان منداڵ و خێزانی سیاسییەكانن و هیچ ئەزموونێكیان لەبواری پەیوەندیی و دیپلۆماسییدا نییە و لە باڵیۆزخانەکاندا دانراون.

بڵێسە جەبار فەرمان پێشنیار دەکات عێراق نوێنەرایەتیەکانی لە هەندێک وڵات دابخات کە پەیوەندی ئابوری لەگەڵیاندا نیە و هەندێکیان کەمبکاتەوە و ئاڵوگۆڕیان پێ بکات.