وەزارەتی پەروەردەی حکومەتی هەرێمی کوردستان لە رێگەی دەرکردنی بڕیارێکی نوێ، ماوەی داشکاندنی رێژەی 10 ٪ی کرێی خوێندنی لە خوێندنگا و پەیمانگا ناحکومییەکان لە ٢٨ی٥ی ٢٠٢٠ بۆ ٣٠ی٧ی٢٠٢٠ درێژکردەوە.
ئاماژەی بەوەشکردووە، لە هەندێک لە خوێندنگا و پەیمانگاکان ئەو بڕیارە وەک خۆی جێبەجێ نەکراوە و پاش سکاڵای هاوڵاتیان و بەدواداچوون چەندین سەرپێچی لەو بوارەدا دەستنیشانکراون، بۆیە وەزارەتی پەروەردە سزای ماددی ئەو خوێندنگا و پەیمانگایانە دەدات و مافی وەرگرتنی خوێندکار-یان بۆ ساڵی خوێندنی داهاتوو لێدەسێنێتەوە.
ئەوەشی خستووەتەڕوو، ئەم بڕیارە ئەو خوێندکارانە ناگرێتەوە کە لە ساڵی خوێندنی ٢٠١٩-٢٠٢٠ وەک شەخسی داشکاندنیان بۆکراوە.
هەر بەپێی بڕیارەکەی وەزارەتی پەروەردەی هەرێمی کوردستان، داشکاندنەکە لەسەر کۆی گشتی کرێی خوێندنە نەک خوێندنی وەرزی دووەم، هەروەها کرێی خواردن و گواستنەوە بۆ مانگی ٣ و ٤ و ٥ نابێت وەربگیرێت.