لەمەودوا ئەمریكا بۆ دامەزراندنی فەرمانبەران پشت بە بڕوانامە نەبەستێت

  2020-06-27  | 
 تۆڕی هەواڵی ژیان
سەرۆكی ئەمریكا فەرمانێكی بۆ شێوازی دامەزراندن لە وڵاتەكەی دەركرد و چیتر بڕوانامە مەرجی یەكەم نابێت، مەرجی یەكەمی بڕوانامەش بە شێوازێكی كۆن و لە كاركەوتوو دەزانێت.



دۆناڵد ترەمپ، فەرمانێكی نوێی بۆ حكومەتی وڵاتەكەی دەركرد كە چیتر پێویستە پشت بە لێهاتووی و ئەزمونی فەرمانبەر و كارمەند ببەستن و مەرجی یەكەم بڕوانامە نەبێت.

حكومەت رادەسپێرێت بە پێداچوونەوەی شێوازی دامەزراندن بۆ ئەوەی كارمەند و فەرمانبەری نوێ لە سەر بنەمای توانا و لێهاتوویی دابمەزرێنرێن و بەتەنیا رەچاوی بڕوانامەكانیان نەكرێت، هاوكات مەرجی بڕوانامەش بۆ دامەزراندنەكان هەر دەمێنێتەوە بەڵام پێشەنگی مەرجەكان نابێت.

ترەمپ دوای واژۆ كردنی بڕیارەكە رایگەیاند: ئێمە ئەم هەنگاوە گرنگە دەنێین بۆ ئەوەی چاكسازی لە هێزی كاری حكومەتی فیدراڵیدا بكەین دامەزراندن لەسەر بنەمای بڕوانامە كە بەڕاستی زۆر كۆن و لەكاركەوتووە.

ئەو وتیشی، لێرە بەرەودوا شێوازی دامەزراندن لەسەر بنەمای توانا و لێهاتوویی جێبەجێدەكەین. چیتر حكومەت چاوی لەسەر ئەوە نابێت بڕوانامەكە لە كام زانكۆ و خوێندنگە بەدەستهێناوە.

حكومەتی فیدراڵی ئەمریكا دوو ملیۆن و 100 هەزار فەرمانبەر وكارمەندی هەیە كە پێویستیان بە شەهادە و لێهاتووی هەیە جگە لەو فەرمانبەرانەی كە بە جیاواز مامەڵەیان لەگەڵ كراوە.