نەجمەدین کەریم ڕەتیدەکاتەوە فەرمانی دەستگیرکردنی بۆدەرچووبێت

  2020-07-25  | 
نەجمەدین کەریم پارێزگاری پێشووی کەرکوک
ئەرشیڤ
کەرکوک
 تۆڕی هەواڵی ژیان
نەجمەدین کەریم ڕەتیدەکاتەوە فەرمانی دەستگیرکردنی بۆدەرچووبێت و رایگەیاند، ئەو هەواڵە دوورە لە راستییەوە و هیچ بنەمایەکی نییە.

نوسینگەی راگەیاندنی نەجمەدین کەریم لە روونکردنەوەیەکدا بڵاویکردەوە، لە چەند دەزگا و سایتێکی راگەیاندن، ھەواڵێك بڵاوکراوەتەوە، کە گوایە لەم رۆژانەدا لەلایەن دادوەری دادگای دەستەی دەستپاکی کەرکوک فەرمانی دەستگیرکردن بۆ نەجمەدین کەریم و چەند کەسانێکی تر لە بەرێوبەرایەتیەکانی کەرکوک دەرکراوە لەسەر پڕۆژەی سەقەڕ کەرکوک، بۆیە بەپێویستمان زانی بۆ شاری کەرکوکی خۆشەویست و کوردستان رابگەیەنین، کە ئەو ھەواڵە دوورە لە راستیەوە و ھیچ بنەمایەکی راستی و دروستی تیانیە.

ئاماژەی بەوەشکردووە، بەھیچ جۆرێک ناوی نەجمەدین کەریم لەو فەرمانەدا نیە، بەڵکو فەرمانەکە تایبەتە بە چەند فەرمانگە و بەڕێوبەرایەتیەکی کەرکوک کە لیژنەی جێبەجێکردن و بەدواداچوون بوون بۆ پرۆژەی سەقەڕ لە کەرکوک .

هەر لە روونکردنەوەکەدا هاتووە، بەداخەوە وەک پێشەی رۆژانەیان ئەو دەزگا راگەیاندنانە، بەردەوام ھەواڵی بێ بنەما و دوور لە راستی بڵاودەکەنەوە بۆئەوەی راستی بابەتەکان بشێوێنن و بۆ ئامانجی سیاسی بەکاری بھێنن  و ئەمە یەکەمجاریان نیە دەبنە بەشێک لە بڵاوکردنەوەی پروپاگەندە و ھەوڵی درۆینە.

نوسینگەی راگەیاندنی نەجمەدین کەریم راشیگەیاندووە، داوا لە ھەموو دەزگاکانی راگەیاندن دەکەین، کە پیشەییانە کاربکەن و ئەمانەتی راگەیاندن بپارێزن و خۆیان بەدوور بگرن لە ھەواڵی ناڕاست، تا نەبنە مینبەری بڵاوکردنەوەی ھەواڵی درۆ و دروستکراو .

ئەم روونکردنەوەیە دوای ئەوەدێت کە لە چەند رۆژی رابردوودا، بڵاوکرایەوە کە دادوەری دادگای دەستەی دەستپاکی کەرکوک فەرمانی دەستگیركردنی بۆ نەجمەدین کەریم پارێزگاری دوورخراوەی كەركوك و ژمارەیەك بەرپرسی ئیداری شارەكە لەسەر دۆسیەیەكی گەندەڵی دەرکردووە.