رۆژهەڵاتی کوردستان.. کۆڵبەرێکی دیکە بەتەقەی هێزە ئەمنییەکانی ئێران کوژرا

  2020-07-30  | 
وەزیر محەمەدی ئەو کۆڵبەرە کوردەی بەتەقەی هێزە ئەمنییەکانی ئێران کوژرا
ئەرشیڤ
کرماشان
 تۆڕی هەواڵی ژیان
لە ناوچە شاخاوییەکانی شارۆچکەی نەوسوود سەر بە شاری پاوە لە پارێزگای کرماشان، کۆڵبەرێکی کورد بە تەقەی ڕاستەوخۆی هێزە ئەمنییەکانی ئێران کوژرا .

ڕێکخراوی مافی مرۆڤی هەنگاو بڵاویکردووەتەوە، سەر لەبەیانی ئەمڕۆ پێنجشەممە ٣٠ی٧ی٢٠٢٠، هێزەکانی سوپای پاسدارانی ئێران لە کوێستانەکانی  ناوچەی ملەقەندی شاری نەوسوود، تەقەیان لە کاروانێکی کۆڵبەران کردووە و لە ئاکامدا کۆڵبەرێک کوژراوە .

ئاماژەی بەوەشکردووە، ناوی ئەو کۆڵبەرە وەزیر محەمەدییە کە تەمەنی ٢٩ ساڵ و خەڵکی گوندی حەشمیر-ی سەر بە شاری سەلاسی باوەجانی بووە، وەزیر خێزاندار و باوکی منداڵێک بووە .

ئاشکراشیکردووە، بەوتەی سەرچاوەیەکی ئاگادار و ئەو وێنانەی دەست رێکخراوی مافی مرۆڤی هەنگاو کەوتووە، هێزەکانی سوپای پاسدارانی ئێران لە نزیکەوە تەقەیان لە وەزیر محەمەدی کردووە و سەری ناوبراویان کردووەتە ئامانج .

بەپێی ئاماری ڕێکخراوی مافی مرۆڤی هەنگاو، لە سەرەتای ئەمساڵەوە و لە ماوەی حەوت مانگی رابردوودا، لانیکەم ٢١ کۆڵبەر لە سنورەکانی شارۆچکەی نەوسوود کوژراون و برینداربوون.