جێگری سەرۆكی حكومەتی هەرێمی كوردستان، رەتیدەكاتەوە هیچ بەریەككەوتنێكی لەگەڵ لاهور شێخ جەنگی هەبێت و دەشڵێت لە داهاتوو لە داهاتووشدا بە پشتگیری هەردوو برای هاوسە‌رۆكم ڕوبەڕووی هەموو ئەوانە دەبینەوە كە رێگرن لە كارەكانمان.
قوباد تاڵەبانی، روونكردنەوەیەك بڵاودەكاتەوە و تیایدا دەڵێت: هەندێك دەیانەوێت بە خەیاڵی خاوی خۆیان وا نیشان بدەن بەریەككەوتن هەیە لەنێوان من و شێخ لاهوری هاوسەرۆك و برا و هاوڕێمدا.
ئەو روتیدەكاتەوە هیچ ئاڵۆزیەك لە نێوانیاندا هەبێت و دەڵێت: پێشتریش وتوومە و ئێستاش دووپاتی دەكەمەوە كە؛ ئێمە سێ براین و هیچ هێزێك نییە بتوانێت رۆژێك لە رۆژان درز بخاتە نێوان برایەتیمانەوە.
ئەوەش دوای ئەوەهات كە لە ساڵیادی كۆچی دوایی مام جەلال تاڵەبانی، یەكەمین سەرۆك كۆماری كوردی عێراق، قوباد تاڵەبانی وتی: هەندێك خەڵكی پیسخۆر دەیانەوێت ئاستەنگ بۆ كارەكانم دروست بكەن.
تاڵەبانی وتوشیەتی "لە داهاتووشدا بە پشتگیری هەردوو برای هاوسە‌رۆكم ڕوبەڕووی هەموو ئەوانە دەبینەوە كە رێگرن لەبەردەم جێبەجێكردنی ئەرك و پلانەكانمان لەناو حكومەت و پلان و ستراتیژەكانمان لەناو یەكێتی".
دەقی روونكردنەوەكە:
بۆ خەیاڵ خاوەكان
ماوەیەكە هەندێك پەیج و سۆشیال میدیای ئاراستەكراو بە لێكدانەوەی چەوت بۆ وتەیەكی من كە بۆ یادی سێ ساڵەی كۆچی دوایی باوكم نووسیبووم، دەیانەوێت بە خەیاڵی خاوی خۆیان وا نیشان بدەن بەریەككەوتن هەیە لەنێوان من و شێخ لاهوری هاوسەرۆك و برا و هاوڕێمدا.
پێشتریش وتوومە و ئێستاش دووپاتی دەكەمەوە كە؛ ئێمە سێ براین و هیچ هێزێك نییە بتوانێت رۆژێك لە رۆژان درز بخاتە نێوان برایەتیمانەوە. بە دڵنیاییەوە لە داهاتووشدا بە پشتگیری هەردوو برای هاوسە‌رۆكم ڕوبەڕووی هەموو ئەوانە دەبینەوە كە رێگرن لەبەردەم جێبەجێكردنی ئەرك و پلانەكانمان لەناو حكومەت و پلان و ستراتیژەكانمان لەناو یەكێتی.