ئاڵدار خەلیل و ساڵح موسلیم لە هەوڵێکی تیرۆرکردن ڕزگاریان بوو

  2020-10-22  | 
ئاڵدار خەلیل و ساڵح موسلیم لە هەوڵێکی تیرۆرکردن ڕزگاریان بوو
ئەرشیڤ
رۆژئاوای کوردستان
 تۆڕی هەواڵی ژیان
هێزەکانی ئاسایشی ڕۆژئاوای کوردستان لە ئۆپەراسیۆنێکی تایبەتدا سیخوڕێکیان دەستگیرکرد، کە لەلایەن دەزگای هەواڵگریی میتی تورکیاوە بۆ تیرۆرکردنی سیاسەتمەدارانی پەیەدە، ئاڵدار خەلیل و ساڵح موسلیم ڕاسپێردرابوو.

میدیاکانی نزیک لە پەکەکە بڵاویانکردەوە، لەماوەی ڕابردوودا لەئەنجامی ئۆپەراسیۆنێکی تایبەتی هێزەکانی ئاسایشی ناوخۆی باکور و ڕۆژهەڵاتی سوریا، چەندین تۆڕی سیخوڕیی دەستگیرکراون، کە لە بەرامبەری پارەدا، کاری سیخوڕییان بۆ دەزگای هەواڵگریی میتی تورکیا کردووە، لەو چوارچێوەیەشدا سیخوڕێک دەستگیرکراوە، کە ئامادەکاریی بۆ تیرۆرکردنی ئاڵدارخەلیل و ساڵح موسلیم کردووە.

روونیشیانکردووەتەوە، سیخوڕێک بەناوی س . ع تەمەن ٥٥ساڵ، کە لە ئۆپەراسیۆنەکەدا دەستگیرکراوە، دانی بە چەندین پیلانی مەترسیداردا ناوە، کە لەلایەن میتی تورکیاوە بۆیان داڕێژراوە .

س.ع لە سەرەتاکانی شۆڕشدا لەنێو ڕیزەکانی ئاسایشدا بووە و دواتر دەبێتە شۆفێری هاوسەرۆکی کۆنسەری بەڕێوبەری خۆبەڕێوبەریی، ئەو سیخوڕە دانی بەوەدا ناوە، دوای شەڕی سەرێکانی، چاوی بە سیخوڕەکانی میتی تورکیا کەوتووە و داوایان لێکردووە، کە کاری سیخوڕییان بۆ بکات .

س.ع لە دانپێدانانەکانیدا ئاشکرایکردووە، کە کەسێک بە ناوی ب.ئ تەمەن ٥٠ساڵ لە سەرێکانی کاری سیخوڕیی و تیرۆر کردنی بۆ دەزگای میتی تورکیا کردووە و هەتا ئێستاش بەردەوامە لە سیخوڕییکردن .

ئەو سیخوڕە هەروەها ڕایگەیاندووە، کە ب.ئ داوای لێکردووە، لەسەر شوێنی مانەوەی ئاڵدار خەلیل ئەندامی کۆنسەی بەڕێوبەریی پەیەدە  و ساڵح موسلیم، زانیارییان بۆ بنرێت، هەروەها لەسەر شوێن و ناوەندەکانی خۆبەڕێوبەریی دیموکراتیک و خاڵەکانی قەسەدە بە جی پی ئێس شوێنەکانیان ئاشکرا بکات .

بەپیی میدیاکانی نزیک لە پەکەکە، هێزەکانی ئاسایشی رۆژئاوای کوردستان لە ئۆپەراسیۆنەکەیاندا، دەستیان بەسەر تەلەفۆنێکی  س.ع -دا گرتووە، کە تێیدا دیمەنێک هەبووە کە بۆ میتی ناردووە و لە ژێریدا نووسیویەتی “پێش ئەوەی بۆردوومانی بکەن ئاگادارم بکەنەوە، کە لەو شوێنە دوور بکەومەوە”.

س.ع لە دانپێداننانەکانیدا راشیگەیاندووە کە سێخوڕێکی دیکە بە ناوی ئەبو .ئو کە بازرگانی جگەرەی قاچاخ و ئۆتۆمبیل بووە لە تورکیا، کەسێکی بەناوی ئەبو.ئا لە زورگان بۆ لای ئەو ناردووە  و بڕێک پارە و تەلەفۆن و سیمکارتێکی تورکی و بڕێک پارەی ڕادەست کردووە، پاشان ئەبو. ئا لە سەر ئەو سیمکارت و تەلەفۆنە پێوەندی پێوە کردووە و پێی ڕاگەیاندووە، بۆئەوەی کەس نەتوانێت چاودێریی ئەو بکات، دەبێت ئەو تەلەفۆنە بەکار بێنێت و ئەو بڕە پارەشیان وەک پاداشت بۆی بەڕێکردووە.

س.ع، هەروەها ئاشکرایکردووە، کە سیخوڕی میت ئەبو.ئا، لەسەر تەلەفۆن پەروردەی کردووە، کە چۆن بتوانێت بە جی پی ئێس شوێنی سیاسەتمەدارانی ڕۆژئاوای کوردستان و خاڵەکانی قەسەدەیان بۆ ئاشکرا بکات .

بەوشێوازە سیخۆڕی میت س.ع بەردەوام زانیاریی لەسەر خاڵەکانی قەسەدە و شوێنی مانەوەی سیاسەتمەدارانی ڕۆژئاوای کوردستانی بۆ میت بەڕێکردووە.

ئەمە جاری یەکەم نییە کە تورکیا لەڕێگەی سیخوڕەکانییەوە شۆڕشگێڕان و سیاسەتەمەدارانی کورد دەکاتە ئامانج، لە ماوەی ڕابردووشدا بە تایبەتی لە ساڵی ٢٠١٣ لە پاریس، ساکینە جانسز و هەڤاڵانی بەپیلانی میتی تورکیا کۆمەڵکوژ کران، لە هەرێمی کوردستانیش چەندین جار ئەندامانی پەکەکە کراونەتە ئامانج و شەهید کراون.