بەڕێوەبەرایەتیی گشتیی وەبەرهێنانی سلێمانی لە راگەیەندراوێکدا بڵاویکردەوە، چەند رۆژێکە کە چوینەتە ناو هەڵمەتی هەڵبژاردنەوە کەناڵێک بە هەق و ناهەق و بەڕاست و چەپ پەلاماری سلێمانی ئەدات، هەر جارەی هەواڵێکی ناڕاست و بابەتێکی دوور لە ڕاستیی دائەتاشێت ، دوێنێش بابەتێکی لەسەر پرۆژەکانی کەمئەندامان بە شێواوی بڵاو کردۆتەوە کە سەرلەبەری ناڕاستە، بۆیە بە پێویستمان زانی ئەم چەند خاڵە بخەینەڕوو:

1- سلێمانی جوانترین و گەشاوەترین شاری هەرێمی کوردستانە، سروشتەکەی وایکردوە هەمیشە گەشەکردن تیایا بەردەوام بێت، بۆیە کەس ناتوانێ بە ئیرەیی لە جوانی سلێمانی کەم بکاتەوە .

⁠2- سلێمانی لە دوو ساڵی ڕابوردودا بە شایەتی سەرۆکایەتی حکومەتی هەرێمی کوردستان پلەی یەکەمی هێناوە لە پرۆژەکانی وەبەرهێناندا، ئەم دەستکەوتە بە کەس کەم ناکرێتەوە، با ئەو کەناڵە خۆی هیلاک نەکات.

3- ⁠پرۆژەکانی وەبەرهێنان لە سلێمانی سەرەڕای یەکەم بونیان لەسەر ئاستی هەرێم، هەزاران هەلی کاریان ڕەخساندوە، ئەمەش بوەتە هۆی ئەوەی رێژەی هەلی کار لە سلێمانی لە پێش شارەکانی ترەوە بێت.

4- ⁠تەنها لە سلێمانی3  پرۆژەی گەورە وەبەرهێنان بۆ کەمئەندامان و کورتە باڵاکان کراوە، سێ سیتی گەورە کە هەر یەکەیان نزیکەی یەک هەزار یەکەی نیشتەجێبوون لە خۆ دەگرێت ، ئەمانە بەشێکن لەو پرۆژانەی کە بەڕێز قوباد تاڵەبانی کاری بۆ کردون و گەیشتونەتە ئەنجام.

5- ⁠بۆ یەکەم جار لە کوردستان و عێراقدا یەکەی نیشتەجێ بدرێ بە کەمئەندام و کورتەباڵا بە قیستی 45  ساڵ و بە مانگانەی تەنها 150 هەزار دینار، ئەمەش هەوڵی بەڕێز قوباد تاڵەبانی بوو.

6- کەرتی وەبەرهێنان گەورەترین بەرەو پێش چونی بەخۆیەوە دیوە لە سلێمانی و گەرمیان و هەڵەبجەو ڕاپەڕین، ئەم ڕاستیەش بەکەس ناشاردرێتەوە.